4. Talaga Kasin Labay na Dios ya Manirap Tayo?

No Akin ya Importantin Naebatan Itan

Say ebat ed sayan tepet et walaan na epekto ed panmoria tayod bilay.

Isipen pa

Kasin makatunongan ya nonoten a say Dios ya nanggawa ed marakdakep iran bengatla ed mundo et labay ton manirap tayo?

Gagawaen ya rason na saray aliwan relihyoson totoo so paniirap pian kuestionen so motibo na Dios odino pruebaan ya anggapoy Dios. Papanisiaan da ya say paniirap et prueba ya (1) anggapoy pakayari na Dios ya patundaen itan, (2) aglabay na Dios ya patundaen itan, odino (3) anggapoy Dios.

Kasin saratan labat so posiblin rason no akin ya maniirap iray totoo?

No Antoy Ibabaga na Biblia

Ag-itayo ginawa na Dios pian manirap.

Labay ton na-enjoy tayoy bilay.

“Anggapo lay mas maabig ed sikara nen say panliket tan panggawa na maong legay bilay da, tan balang sakey et nepeg a mangan tan oninum tan manliket ed amin a pansasagpot to. Saya et regalo na Dios.”​—ECLESIASTES 3:12, 13.

Inter na Dios ed unonan duaran too so amin ya pankaukolan da pian ag-ira manirap.

Agto labay ya manirap ira tan saray ananak da.

“Inkuan [na Dios] ed sikara: ‘Manbunga kayo tan manparakel kayo, pano yoy dalin tan uleyan yo.’”​—GENESIS 1:28.

Pinili na unonan duaran too ya ag-unoren so Dios.

Kanian grabe so impanirap da tan saray ananak da.

“Diad panamegley na sakey a too et linmoob ed mundo so kasalanan, tan say patey ed panamegley na kasalanan, ontan met a say patey et kinmayat ed amin a totoo lapud nankasalanan iran amin.”​—ROMA 5:12.a

Ag-itayo ginawa na Dios ya walaan na abilidad ya igiya so sarili tayo.

Ag-itayo pinalsa na Dios ya uleyan so sarili tayo, no panon ya agto tayo pinalsa ya nabilay ed dalem na danum.

“Agkanepegan na too ya igiya so dilin kupbang to.”​—JEREMIAS 10:23.

Aglabay na Dios ya manirap itayo.

Labay to ya napaliisan tayo ray problema anggad posible.

“No dengelen mo labat komon iray ganggan ko! Diad ontan, say kareenan mo et magmaliw a singa ilog.”​—ISAIAS 48:18.