Amtaen No Antoy Tua

No Antoy Problema

Maslak ya walay diskriminasyon na totoo lapud aliwan tua iran impormasyon. Singa bilang:

Iisipen na arum ya kompanya ya saray bibii et agda sarag ya gawaen iray trabaho ya mankaukolan na dunong, biskeg tan talino.
Diad Europe nensaman, inakusaan iray Judio ya nansamal ed saray bobon tan angikayat na sakit. Diad uley na Nazi, inakusaan lamet iray Judio. Tetetelen da ira ya lapud sikara et inmirap so ekonomiya ed Germany. Lapud saratan et nagmaliw ya biktima na diskriminasyon tan panangidumaduma iray Judio, ya sankapatnagan ni anggad natan.
Iisipen na dakel a totoo ya amin ya walaay kapansanan et maermen tan kaskasian day sarili da.

Saramay manisia ed saratan et manaanap na paneknek pian nasuportaan so papanisiaan da. Tan iisipen da ya saramay agmanisia ed sikara et ignorante.

Prinsipyo ed Biblia

“Say too ya andiay kakabatan et aliwan maabig.”—PROVERBIO 19:2.

Antoy labay ya ibaga na satan? No agtayo amtaen iray tuan impormasyon, ompan aliway resulta na saray desisyon tayo. No basta ti labat panisiaan iray narerengel tayo ya agti la aamtaen iray tuan impormasyon, ompan nahusgaan tayo laingen iray totoo.

Makatulong no Antam Iray Tuan Impormasyon

No amta tayo iray tuan impormasyon nipaakar ed totoo, agtayo basta-basta panisiaan iray ibabaga na arum nipaakar ed sikara. Tan no naamtaan tayo ya aliwan tua so imbaga na arum nipaakar ed sakey ya grupo, mas labay tayon amtaen so tuan impormasyon nipaakar ed arum nin grupo na totoo.

Eksperiensya: Jovica (Europe)

Si Jovica, ya abitla ed gapo na sayan serye et binmaleg ed lugar ya puros negatibo so ibabaga na saray kabaleyan to, saray balita, tan saray programa ed telebisyon nipaakar ed sakey ya grupo na totoo. “Talagan walay panangidumadumak ed saratan ya totoo tan kabkabusol ko ni ira ingen,” so imbaga to. “Tan inisip ko ya duga met labat iman ya naliliknak ed sikara.

“Balet nen wala ak ed militar, wala ray akaibak ya sundalo ya nanlapud satan ya grupo. Lapud trabaho mi, naynay ko ran nakakaiba. Akabkabat ko ran maong, inaral ko ni ingen so lenguahe da pati saray kansion da. Labalabay ko la ran kaulop tan anguman so pakanengneng ko ed sikara. Balet, amtak ya nayarin ompawil so naliliknak ya diskriminasyon ed sikara. Kanian agak la ondedengel ed saray balita ya negatibo so ibabaga da nipaakar ed saratan ya totoo. Ontan met, agak la manbabantay na saray pelikula odino saray makapalek ya palabas ya mamabalaw ed sikara. Amtak ya no ag-naekal so naliliknak ya panangidumaduma, nayarin mansumpal itan ed sanok tan pambusol.”

No Antoy Nagawaan Mo

Nayarin ibaga na arum ya aliwliway ugali na sakey ya grupo. Balet tandaan, aliwan amin ed satan a grupo et makapuy so ugali to.
Tandaan ya limitado labat so antam nipaakar ed arum.
Seguroen ya napantiwalaan iray reperensya ya pangalaan moy impormasyon.