Ipanengneng so Pililikna
No Antoy Problema
No masyado tayon manpokus ed saray agtayo pamparehoan ed arum, nayarin aliway epekto na satan ed pakanengneng tayo ed sikara. Ompan abebbeba la laingen so pakanengneng tayo ed saramay duma ed sikatayo. No negatibo lay pakanengneng tayo ed arum, nayarin mairap lan ipanengneng so pililikna ed sikara. No anggapoy pililikna tayo, nayarin sintomas itan ya naalisan itayo la na sakit ya panangidumaduma odino diskriminasyon.
Prinsipyo ed Biblia
“Miliket kayo ed saramay manliliket; miakis kayo ed saramay onaakis.”—ROMA 12:15.
Antoy labay ya ibaga na satan? Say labay ton ibaga et ipanengneng so pililikna. Say pililikna et abilidad ya iyan moy sarilim ed situasyon na arum tan nalikna no antoy nalilikna ra.
No Panon ya Makatulong so Pililikna
No walay pililikna tayo ed sakey ya too, nanengneng tayo ya wala manayay pamparehoan tayo ed sikato diad saray nononoten tan nalilikna tayo. No walay pililikna tayo, ipasen tayo so amin ya klase na totoo bilang kabiangan na sakey a pamilya. No say pampokusan tayo et no anto ray pamparehoan tayo ed arum, makatulong itan ta pian agtayo ira nahusgaan.
Sakey ni, no walay pililikna tayo, respetoen tayo so arum. Dati, si Anne-Marie ya taga ed Senegal, et abebay pakanengneng to ed saray mairap bilay. Imbaga to no panon ya akatulong ed sikato so pililikna. “Nen anengneng ko so paniirap na saramay mairap so panagbilay da, tinepetan koy sarilik, ‘Panon to no onman met so kipapasen kod sikara?’ Lapud satan et atalosan ko ya agko dapat isipen ya mas maong ak ni nen say sikara. Agko met pinili odino nansagpotan iyan kipapasen na panagbilay ko.” On, no pansagpotan tayon talosan no akin ya mairap so kipapasen na arum, mas nipanengneng tayo so pililikna ed sikara imbes ya balawen ira.
No Antoy Nagawaan Mo
No negatibo so pakanengneng mo ed sakey ya grupo na totoo, salim ya amtaen iray pamparehoan yo. Singa bilang, imadyin mo pa no antoy nalilikna da no:
No walay pililikna tayo, ipasen tayo so amin ya klase na totoo bilang kabiangan na sakey a pamilya
saniiba iran mamangan kaibay pamilya da
kayari dan nantrabaho ed sanagew
kaiba da ray kakaaro da
dedengelen da iray paborito dan kansion
Insan salim ya ipasen so sarilim ed situasyon da. Tepetan moy sarilim:
‘Antoy gawaen ko no ipasen ak na arum ya anggapoy kanak?’
‘Antoy naliknak no husgaan ak na arum anggano agda ak nin talaga kabat?’
‘No kaiba ak ed saman ya grupo na totoo, antoy labay kon pantrato na arum ed siak?’