Palaknab Moy Pikakaarom

No Antoy Problema

No papaliisan tayo iramay totoon negatibo so pakanengneng tayo ed sikara, ompan lalon onloor so panangidumaduma tayo. No say pikakaaroan tayo labat et saramay say ugali da et pareho ed sikatayo, ompan isipen tayo ya say paraan tayo labat na panagnonot, nalilikna, tan kagagawa so duga.

Prinsipyo ed Biblia

‘Ilukas yon maong so puso yo.’—2 CORINTO 6:13.

Antoy labay ya ibaga na satan? Say “puso” tayo et nayarin ontukoy ed emosyon tayo tan nalilikna tayon panangaro. No say aaroen tayo labat et saramay totoon pareho ed sikatayo, magmaliw ya sarado so puso tayo. Pian napaliisan tayo itan, kaukolan tayon mikaaro ed saramay duma ed sikatayo.

No Akin ya Importantin Palaknaben so Pikakaaro Tayo

No kabaten tayon maong so arum ya totoo, natalosan tayo no akin ya duma ira ed sikatayo. Tan legan ya onaapit tayo ed sikara, naar-aro tayo ra tan aliwa la ran duma ed sikatayo. Mas lalon napabli tayo ira, tan no maliket ira, maliket tayo met, tan no maermen ira, maermen tayo met.

Imanoen pay alimbawa nen Nazaré. Dati, walay panangidumaduma to ed saray immigrant. Oniay imbaga to ya akatulong ed sikato: “Akatulong imay impiulop ko ed sikara tan saniiba kamin nankimey. Talagan duma ira ed maslak ya iisipen na totoo ed lugar mi nipaakar ed sikara. No kaaroen mo iramay totoo ya duma so kultura da, nanengneng mo ya agmet manaya ira parepareho. Kanian, kada sakey ed sikara et mas naarom tan napablim.”

No Antoy Nagawaan Mo

Manggawa kay paraan pian nakatongtong mo iramay nanlapud arum ya bansa, saramay duma so lahi odino lenguahe da. Nayarin oniay gawaen mo

Mantepet kad sikara pian nakabat mo ra.
Imbitaan mo iran mangan.
Dengel kad saray istorya da tan amtaen mo iray importante ed sikara.

No talosan mo no akin ya nagmaliw iran onman lapud saray agawgawa ed bilay da, magmaliw lan positibo so pakanengneng mo ed saratan ya totoo.

Eksperiensya: Kandasamy tan Sookammah (Canada)

“Binmaleg kami ed South Africa legan na panaon na apartheid. Saray totoon duma so lahi da et puersaan ya imbiig ed komunidad. Lapud satan et nagmaliw ya walay diskriminasyon diad baetan na saray totoon nandumaan so lahi da. Aliwa kamin amputi, balet kabkabusol mi ray amputin totoo ta maslak ed sikara et melmelag so pakanengneng da ed sikami. Diad saman, say amta mi et aliwa iman ya diskriminasyon. Tan inisip mi ya sikami so biktima na diskriminasyon.

“Pian nauman mi iyan ugali mi, sikami lay unonan nanggaway paraan ya manpalaknab tan mikaaro ed saramay duma so lahi da. Tan sanen miuulop kami la ed saray amputin totoo, atalosan mi ya amayamay manaya so pamparehoan mi. Amin mi et pareho so situasyon mi tan pareho so dadalanen min problema.

“Wala ni ingen so sanasawan amputi ya pinatuloy mi ed abung mi tan abayag iran nanayam ed sikami. Akabkabat mi ran maong, ya anggad nagmaliw kamin sankakaaro tan aliwa la ran duma ed sikami. Manlapu la ed saman, positibo lay pakanengneng mi ed amin ya amputin totoo.”