Saray Nagawaan Mo Pian Naliknam so Inkakontento
Amin tayo—balanglan single odino walaay asawa, ugaw odino matatken—et labay tayoy magmaliw ya maliket tan kontento. Labay met na Amalsa ya ontan so nalikna tayo, kanian inikdan to tayo na saray balibalin bilin.
Makuli ya Mantrabaho
“Sikatoy mansagpot, a manggawa na maabig a kimey diad panamegley na saray lima to, pian walay inabang to ed siopaman a mankaukolan.”—EFESO 4:28.
Labay na Amalsa ya pablien tayoy trabaho tayo. Akin? On ta no say sakey et makuli, sikatoy maliket ta nitatarya toy pankaukolan to tan na pamilya to. Ompan natulongan to ni ingen iray mankaukolan. Sikatoy labalabay met na amo to. Kanian no say sakey et makuli, mas baleg so posibilidad ya agnaekal ed trabaho to. Saray maabig ya resulta na inkakuli na sakey et adeskribe ed Biblia ya “regalo na Dios.”—Eclesiastes 3:13.
Magmaliw a Matua
“Matalek kami a matua so konsiensia mi, unong a labay mi manbilay a matua ed amin a bengatla.”—HEBREO 13:18, paimanod leksab.
No matua tayo, walay respeto tayod sarili tayo, agtayo aburido, tan mas masamit so ugip tayo no labi. Niarum ni, pantiwalaan tan respetoen itayo na arum. Balet saramay aliwan matua et aliwan ontan so bilay da. Nayarin nakokonsiensia ira, tan ompan lanang ira ya natatakot ya walay makadiskobre ed aliwan gagawaen da.
Agmo Iisipen ya Sankaimportantian so Kuarta
“Komon ta agnapatnagan ed kabibilay yo so panangaro ed kuarta, tan mankontento kayo ed saray bengatlan walad sikayo.”—HEBREO 13:5.
Kaukolan tayoy kuarta pian walay isaliw tayoy naakan tayo tan inagew-agew ya pambilay tayo. Balet, say “panangaro ed kuarta” et delikado. Nayarin say sakey et upoten toy panaon tan biskeg to pian makalmo na mas dakel ya kuarta. Lapud satan, nayarin naapektoay relasyon dan sanasawa, anggapo lay panaon tod ananak to, tan ompan mansakit ni ingen. (1 Timoteo 6:9, 10) Aliwan satan labat, no inaro to lay kuarta, ompan natukso ya manggaway aliwa. Oniay imbaga na sakey a makabat ya too: “Say matoor a too et makaawat na dakel a bendisyon, balet samay maganat ya onyaman et agmansiansian andiay kasalanan.”—Proverbio 28:20.
Pilim so Sankaabigan ya Edukasyon
“Alwaran mo so makanan karunongan tan say abilidad a mannonot.”—PROVERBIO 3:21.
Say maabig ya edukasyon et tulongan to tayon magmaliw ya responsablin too tan maong ya ateng. Balet anggan say sankaabigan lan edukasyon ed sayan mundo et agto niiter so amin ya kaukolan tayo pian magmaliw tayon maliket. Pian magmaliw ya maaligwas so amin ya gagawaen tayo, kaukolan tayoy edukasyon ya iiter na Dios. Ibabaga na Kasulatan ya no say sakey et dedengelen to so Dios, “amin a gawaen to et onaligwas.”—Salmo 1:1-3.