Akin ya Maniirap, Ontatatken, tan Ompapatey Tayo?

Maniirap Tayo Lapud Ginawa na Inmunan Atateng Tayo

“Diad panamegley na sakey a too et linmoob ed mundo so kasalanan, tan say patey ed panamegley na kasalanan, ontan met a say patey et kinmayat ed amin a totoo.”—ROMA 5:12.

Nen pinalsa na Dios si Adan tan Eva, saray inmunan atateng tayo, inikdan to ra na perpekton nonot tan laman. Pinan-ayam to met ira dia ed paraison dalin ya tatawagen ya hardin na Eden. Imbaga na Dios ed sikara ya sarag dan kanen so bunga na amin ya kiew puera labat ed sakey ya kiew. Balet, pinili nen Adan tan Eva ya kanen so bunga na saman ya imbawal ya kiew, kanian nankasalanan ira. (Genesis 2:15-17; 3:1-19) Lapud benger ira, pinalayas ira na Dios ed hardin, tan inmirap so bilay da. Diad inlabas na panaon, awalaan ira na ananak, tan nanirap met ira. Amin ira et tinmatken tan inatey. (Genesis 3:23; 5:5) Kanian mansasakit, ontatatken, tan ompapatey tayo lapud atawir tayo itan ed si Adan tan Eva.

Maniirap Itayo Met Lapud Saray Gagawaen na Mauges Iran Espiritu

“Say interon mundo et walad pakayari na samay mauges.”—1 JUAN 5:19.

Saman ya “mauges” et tatawagen ya Satanas. Sikatoy datin anghel, balet ta nanrebelde ed Dios. (Juan 8:44; Apocalipsis 12:9) Wala met iray anghel ya sinmuporta ed impanrebelde nen Satanas, tan tinawag ira ya demonyo. Uusaren na sarayan mauges ya espiritu so pakayari da pian lokoen iray totoo tan agda unoren so Amalsa. Iimpluensyaan da iray dakel ya totoo ya manggawa na mauges. (Salmo 106:35-38; 1 Timoteo 4:1) Labalabay nen Satanas tan saray demonyo to ya pairapen iray totoo.

No Maminsan, Maniirap Tayo Lapud Saray Aliwan Desisyon Tayo

“Antokaman so itatanem na sakey a too, saya met so anien to.”—GALACIA 6:7.

Naamtaan tayo la ya maniirap tayon amin lapud atawir ya kasalanan tan impluensya nen Satanas ed mundo. Pero no maminsan saray totoo met lanlamang so mamapairap ed bilay da. Panon? No manggawa iray mauges tan aliwan duga iray desisyon da, mabetbet ya makapuy ya resulta so aanien da. Balet no manggaway maong iray totoo, maong met so anien da. Alimbawa, no say sakey ya asawan laki tan ama et matua, makuli, tan inar-aro toy pamilya to, sikatoy man-ani na dakel ya maong a bengatla tan magmaliw ya maliket so pamilya to. Pero no sikatoy mabisyo, mainum, odino mangiras, manirap so pamilya to. Kanian pankaabigan tayo no ondengel tayo ed Amalsa. Labay to ya dakel ya maong a bengatla so anien tayo, kaiba lay “abalbaleg ya kareenan.”—Salmo 119:165.

Manbibilay Tayo Lad “Kaunoran Iran Agew”

“Diad kaunoran iran agew . . . , saray totoo et magmaliw a maaro ed sarili ra, maaro ed kuarta, . . . agmatulok ed atateng da, . . . anggapoy kontrol da ed sarili ra, masesebeg ira, agda aaroen so kamaongan.”—2 TIMOTEO 3:1-5.

Ontan la so ugali na dakel ya totoo natan. Palatandaan iratan ya manbibilay tayo la ed “kaunoran iran agew” na sayan mundo. Impasakbay met la na Biblia ya wala ray nagawan guerra, eras, yegyeg, tan sakit. (Mateo 24:3, 7, 8; Lucas 21:10, 11) Lapud sarayan nagagawa, maniirap tan ompapatey iray totoo.