NAPNOY PROBLEMA SO MUNDO

3 | Agpapaulyanan so Relasyon Mod Arum

NO AKIN YA IMPORTANTE

Legan ya onggragrabe iray makapaaburidon problema ed mundo, agnamamalayan na dakel ya naaapektoan la manaya so relasyon da ed arum.

Iyaarawi na totoo so sarili da ed kakaaro da.
Mabetbet ya mankokolkol iray sanasawa.
Ngalngali agnapapansin o talagan agnapapansin na atateng ya nai-stress la ray anak.

No Antoy Dapat Mon Naamtaan

Importante so pankakaaro pian onligsa ka tan ag-onkapuy so liknaan mo, lalo la diad mairap iran panaon.
Lapud saray makapa-stress ya problema ed mundo, nasubok so elet na aroan na pamilya.
Lapud saray makapa-stress ya balita, ompan agmo namamalayan ya grabe la manayay panaaburido na anak mo.

No Antoy Nagawaan Mo

Ibabaga na Biblia: “Say tuan kaaro et mangaaro ed amin a panaon tan sakey ya agi a nailaloan diad panaon na gonigon.”—Proverbio 17:17.

Makatulong iray kakaaro ta naikdan da tayo na praktikal ya advice. Amay antam labat ya walay mangaaro tan manmamalasakit ed sika et baleg lay nagawaan to pian makpel mon naarap iray problema.

NO PANON YA NASARAG—Tips

Diad mairap ya panaon, agpapaulyanan so relasyon mod arum. Makatulong iraya

PAELETEN SO RELASYON YON SANASAWA

Paeleten so relasyon yon sanasawa

Ibabaga na Biblia: “Mas maong ni duara nen say sakey . . . Ta no natumba so sakey ed sikara, sikatoy ipaalagey na kaiba to.” (Eclesiastes 4:9, 10) Dapat, say sanasawa et singa pilot tan copilot ya mantulongan tan saksakey so plano da. Aliwan singa duaran fighter jet ya uusaren ed guerra tan mankalaban.

No nai-stress kayo, agyo ipapangget o ibubunton ed sakey tan sakey. Baleg so nagawaan na anos tan pampasensia.
Pantongtongan yo iray kailangan yon ayosen, anggan maminsan ed sakey simba. Tandaan, say atakien yo et amay problema, aliwan say sakey tan sakey.
Mangi-set kayo na oras ya gawaen yon dua iray labalabay yo.
Nodnonot yo ray balibalin agawad bilay yo. Singa bilang, nengneng yo ray litrato na kasal yo odino iramay agyo nalinglingwanan ya panaon.

“No maminsan aliwan parehoy opinyon na sanasawa. Pero agto labay ya ibagan aliwa la ran manka-team. Sarag day saniban mandesisyon, insan da pankimeyan so apantongtongan da pian maong so pansumpalan.”—David.

PANSIANSIAEN YA MALET SO ULOPAN YON SANKAKAARO

Pansiansiaen ya malet so ulopan yon sankakaaro

Pian aliwan sika labat so makaawat na tulong na kakaarom, manisip kay paraan pian sika met so makapangiter na tulong. Diad tua, no suportaan tan pabiskegen moy arum, sikan mismo et napabiskeg met.
Kada agew, kontak mo ray pigaran kakaarom pian nakumustam ira.
Tepetan mo ray kakaarom no panon dan nasasarag iray probleman parepareho yon dadalanen.

“No walay singa bagyon problema, wadtan iray kakaaro ya onalalay ed sika. Sarag da kan ikdan na advice tan anggano antam la iratan, balibali no panonotan da ka. Imamalasakit ka na kakaarom tan amta da ya imamalasakit mo met ira.”—Nicole.

TULONGAN IRAY ANAK MO

Tulongan iray anak mo

Ibabaga na Biblia: “Agbengatbengat a mansalita, matantan a manpasnok.” (Santiago 1:19) Diad unaan, ompan manalangan iray anak mo ya ibagay pakakatakotan tan pakakaaburidoan da. Pero no maanos mo ran dengelen, natulongan mo ra ya mankusan ibagay tuan nalilikna da.

Manggawa kay paraan pian agnatatakot iray anak mo ya ibesngaw so nalilikna da. Mankusan mitongtong iray anak no relaks kayo, singa bilang no manbiabiahe odino manaakar kayo, imbes ya no arap-arapan iran komprontaen.
Agmo papaulyanan ya mabetbet a makabantay o makarengel na makapaaburido iran balita iray anak mo.
Ipaamtam ed ananak mo no anto ray planom ya gawaen pian naprotektaan so pamilya yo.
Manplano parad saray emergency, tan ipraktis itan kaiba iray anak mo.

“Katongtong mo ray anak mo. Pulyan mo ra labat ya ibaga day nalilikna da. Ompan agda ipapahalata ya natatakot, nai-stress, odino nasyosyodotan ira. Ipasegurom ed sikara ya naliliknam met iratan. Ibagam met no antoy akatulong ed sika.”—Bethany.