NAPNOY PROBLEMA SO MUNDO

4 | Agka Naeekalay Pag-asa

NO AKIN YA IMPORTANTE

Lapud saray problema ed mundo, apektadoy laman tan emosyon na totoo. Say pakalikna na dakel et anggapo lay pag-asa da. Kanian antoy reaksion da?

Agla labay na arum ya isipen no antoy nagawad arapen.
Pian nalingwanan da ray problema da, ipapangget da itan ed paninum na alak o pan-drugs.
Mas labay la na arum so ompatey. Kuan da: “Maong lay ompatey, kato met lanlamang.”

No Antoy Dapat Mon Naamtaan

Temporaryo labat so arum ya problema tan manguman lanlamang so situasyon.
No bilang ta agmanguman so situasyon, wala ray nagawaan mo pian nasarag moy problema.
Mangiiter na tuan pag-asa so Biblia—say permanentin solusyon ed problema na totoo.

No Antoy Nagawaan Mo

Ibabaga na Biblia: “Agkayon balot mapagpaga nipaakar ed ontumbok ya agew, ta wala ni ray kapagaan ed ontumbok ya agew. Magenap la ray problema ed kada agew.”—Mateo 6:34.

Sansakey agew labat. Agka ompapayag ya napaulyanan mo laingen iray responsibilidad mo natan lapud iyaaburidoan mo lay nabuas.

No manaburido ka ya ompan walay mauges ya nagawa anta agmet ni agawa, lalo kan na-stress tan naekalan ka laingen na pag-asa.

NO PANON YA NASARAG—Tips

ISIP MO RAY POSITIBO

Ibabaga na Biblia: “Amin ya agew na samay maniirap et mauges, balet samay maligligsa so puso to et naynay ya manpipiesta.” (Proverbio 15:15) No mannegatibo ka, ompan agmo nanengneng iray solusyon. Pero no positibo ka, ompan makanonot kay paraan pian nasarag moy situasyon mo.

Bawasan moy panagbantay tan panagbasam na balita.
Diad sampot na kada agew, mangisulat ka na duara o taloran bagay ya pisalsalamatan mo.
Manggawa kay listaan na gawaen mo, tan isulat mo ditan no antoy nagawaan mo ed sayan agew. Apag-apag mo ray baleg ya kimey pian nanengneng mo lan tampol so resulta na impansagpot mo kayari sanagew.

PATULONGAN KA

Ibabaga na Biblia: “Siopaman ya isisian toy inkasikato et . . . ipupulisay toy amin a makanan karunongan.” (Proverbio 18:1) Aliling to no naplag kad abot, agka makakalab ya bukor, pero no walay ontulong ed sika, makaagwat ka.

Patulongan kad kapamilyam o kakaarom.
Mananap ka met na paraan ya natulongan mo ra. No ontulong kad arum, magmaliw ya dugay pangipasen mod problemam.
No pakaliknam et anggapo lay pag-asam tan anggapo lay ganam ya manbilay, marakep no manpa-checkup ka. No maminsan et sintomas itan ya walay sakit mo, singa say depression. Dakel so atulongan nen nampatambal ira.a

a Agmangirerekomenda so Onliing! na klase na panagpatambal.

Mangiiter na Tuan Pag-asa so Biblia

Oniay imbaga na sakey ya nansulat ed Biblia diad pikakasi to ed Dios: “Say salitam et sakey a silew ed salik, tan liwawa ed dalan ko.” (Salmo 119:105) Akin et nibagan ontan so Biblia, say Salitay Dios? Nengnengen tayo:

No labi ya ambilbilunget, makatulong so silew pian amta tayoy dakatan tayo. Mipadpara, naromog ed Biblia iray singa silew ya praktikal a karunongan ya mangigiya ed sikatayo no manggagawa tayo na mairap iran desisyon.

Say silew et naliwawaan toy dadalanen tayo pian nanengneng tayoy arawi. Ontan met, say Biblia so mangiiter na liwawa pian ag-itayo naekalan na pag-asa.

Say Biblia et sagradon libro tan aglabat nabasa ditan so history na too manlapud gapo, noagta mangiiter met itan na tuan pag-asa. Eebatan to irayan tepet:

Panon?

No panon ya ginmapo so kairapan: Ibabaga na Biblia ya “diad panamegley na sakey a too et linmoob ed mundo so kasalanan, tan say patey ed panamegley na kasalanan, ontan met a say patey et kinmayat ed amin a totoo lapud nankasalanan iran amin.”—Roma 5:12.

Akin?

No akin ya agnasolusyonan na saray totoon manuuley so problema tayo: Ibabaga na Biblia ya “agkanepegan na too ya igiya so dilin kupbang to.” (Jeremias 10:23) No imanoen tayo ray problemad mundo, napatunayan tayo ya duga itan.

Anto?

No antoy gawaen na Dios pian solusyonan so situasyon: Nabasa ed Biblia ya “punasen to so amin a lua ed kamataan da, tan anggapo lay patey, anggapo met lay panermen tan panakis tan panotot.”—Apocalipsis 21:4.