Ginmapon Nanggawa so Dios

AMIN ya walad sikatayo et nanlapud Dios. Ginawa toy agew pian sanagew a maliwawa, tan bulan tan bibitewen pian maliwawa no labi. Ginawa met na Dios so dalin pian panayaman tayo.

Balet aliwan say agew, bulan, bibitewen tan dalin so inmunan ginawa na Dios. Antam no anto? Ginawa to nin unona iray anghel. Sikaray espiritu ya singa sikato. Agtayo ira nanengneng, ya singa say Dios ya agtayo nanengneng. Ginawa ira na Dios pian manayam ed tawen a kaiba to.

Say sankaunaan ya anghel et espisyal ya maong. Sikato so panguloan ya Anak na Dios, tan saniba ran nankimey. Tinulongan toy Dios a nanggawa ed agew, bulan, bibitewen, dalin, tan arum ni ra.

Antoy itsura na dalin nensaman? Diad gapo, agnapanayaman so dalin. Puros kadanuman. Balet, labay na Dios ya panayaman na totoo so dalin. Kanian, imparaan to itan. Antoy ginawa to ey?

Unona, kaukolan na dalin so liwawa. Kanian, pinasinag na Dios so liwawa na agew ed dalin. Ginawa to itan pian walay agew tan labi. Kayari to, pinapaway na Dios so kadalinan diad tapew na dayat.

Nen inmuna, anggapoy karga na dalin. Singa sayay nanenengneng mo ed litrato. Anggapo ni ray rosas, kakiewan, odino ayayep. Anggapo ni ingey sira ed dayat. Amayamay so kaukolan a gawaen na Dios pian ombalibali so dalin a panayaman na ayayep tan totoo.