Abraham—Kaaro na Dios

SAKEY ed saray lugar ya nanayaman na totoo kayari Delap et diad Ur. Nagmaliw itan ya mayaman a syudad tan marakdakep iray kaabungan ditan. Balet saray totoo ditan et mandadayew ed aliwan tuan dios. Aliwa ran singa si Noe tan say anak ton si Sem ya nantultuloy ya nandayew ed si Jehova.

350 a taon kayari delap, inatey si Noe. Linmabas so duaran taon, inyanak so laki ya nanenengneng mod litrato. Sikatoy inad-aro na Dios. Say ngaran to et Abraham. Kaiba toy pamilya to ya manaayam ed Ur.

Aminsan, imbaga nen Jehova ed si Abraham: ‘Taynan moy Ur tan saray kakanayon mo, tan onla ka ed bansa ya ipanengneng kod sika.’ Kasin inunor nen Abraham so Dios tan tinaynan toy marakep ya bilay ed Ur? On. Lanang ton uunoren so Dios kanian sikatoy tinawag ya kaaro na Dios.

Akilad si Abraham so tatay ton si Tera, pati say kaanakan ton si Lot. Tan siempre, akila met so asawa ton si Sara. Ag-abayag, akasabi rad Haran, tan ditan inatey si Tera. Arawdawi la rad Ur.

Insan, tinaynan di Abraham so Haran tan akasabi rad lugar a tatawagen ya Canaan. Diman et imbaga nen Jehova: ‘Sikato yay bansan iter ko ed saray anak mo.’ Tan diman et nanayam si Abraham ed saray tolda.

Tinulongan na Dios si Abraham kanian dinmakel iray karnero tan arum ni ran ayayep to, tan nagmaliw ya nilasus so aripen to. Balet anggapoy anak da nen Sara.

Nen mantaon lay 99 si Abraham, impormisa nen Jehova: ‘Gawaen ta kan ama na amayamay a bansa.’ Balet, panon itan ya nagawa ta akulaw lay Sara pian mananak?