Sinubok na Dios so Pananisia nen Abraham

ANTAM no antoy gagawaen nen Abraham dia? Sankaegnaan toy kutsilyo, tan singa pateyen toy anak to. Akin kasi? Nengnengen tayo nin unona no panon ya awalaan na anak si Abraham tan Sara.

Tandaan, impormisa na Dios ed sikara ya nawalaan iray anak. Balet singa imposible itan ta akulaw-masiken la ra. Balet amta nen Abraham ya anggapoy imposible ed Dios. Kanian antoy agawa?

Sanen si Abraham et mantaon na 100, tan si Sara et 90, tinoor na Dios so pormisa to! Awalaan ira na anak a laki a say ngaran to et Isaac.

Balet sanen baleg lay Isaac, sinubok nen Jehova so pananisia nen Abraham. Inkuan to: ‘Abraham!’ Tan inmebat si Abraham: ‘Wadia ak!’ Insan imbaga na Dios: ‘Alam so anak mo, say saksakey ya anak mon inad-arom a maong, si Isaac, tan onla kad palandey ya ipanengneng kod sika. Diman mo pateyen tan ibagat ed siak.’

Seguradon maer-ermen si Abraham ta inad-aro ton maong so anak to. Tan impormisa na Dios ya saray anak nen Abraham et manayam ed Canaan. Balet panon itan ya nagawa no inatey lay Isaac? Ag-iya natalosan nen Abraham, pero siansia nin inunor toy Dios.

Kasabi nen Abraham ed palandey, tinaker toy Isaac tan inyan tod altar ya ginawa to. Insan inala toy kutsilyo. Et sanen kuan to lan pateyen, sikatoy tinawag na anghel na Dios: ‘Abraham! Agmo sasakitan so ugaw. Amtak la natan ya walay pananisiam ed siak, ta agmo insiblet so saksakey ya anak mo.’

Talagan baleg so pananisia nen Abraham ed Dios! Amta ton anggapoy imposible ed si Jehova, tan sarag ton bilayen si Isaac. Balet, agtalaga labay na Dios ya pateyen nen Abraham si Isaac. Kanian, pinaulyanan na Dios so sakey a karnero ya nipanget so saklor to ed abeban kiew, tan imbaga tod Abraham ya satan so ibagat to imbes ya say anak to.