Linmingaw so Asawa nen Lot

SI Lot tan say pamilya to et kaiba di Abraham a nanayam ed Canaan. Aminsan, imbaga nen Abraham ed si Lot: ‘Agla onduga iray ayayep ta ed sayan lugar. Maong no mansian ta la. No onla kad sakey a pasen, onla ak ed sananey.’

Anengneng nen Lot so marakdakep a lugar ya walay danum tan mabunan dikarika parad saray ayayep to. Saya so Distrito na Jordan. Kanian inmalis irad man di Lot kaiba iray ayayep to. Agnambayag et nanayam la rad syudad na Sodoma.

Saray totoo ed Sodoma et mauges. Lapud saya, maer-ermen si Lot ta sikatoy maong a too. Maer-ermen met so Dios. Kanian, angibaki so Dios na duaran anghel ed si Lot pian ibagan naderal so Sodoma tan say kaabay ton syudad a Gomorra lapud mauges ira.

Imbaga na saray anghel ed si Lot: ‘Apuram! Awit moy asawam tan duaran marikit mo tan paway kayo!’ Balet, matantan ira di Lot, kanian inegnaan ira na saray anghel tan impaway da rad syudad. Insan inkuan na sakey ed saray anghel: Batik kayo! Agkayo onlilingaw! Batik kayod kapalandeyan pian agkayo ompatey.’

Kanian batik si Lot tan saray duaran mamarikit to. Ag-iran balot tinmunda, tan ag-ira linmingaw. Balet, agtinmulok so asawa nen Lot. Nen medyo arawi la ra ed Sodoma, sikatoy tinmunda tan linmingaw. Kanian nagmaliw ya pungol na asin, ya singa nanenengneng mod litrato.

Makaaral tayo ed saya. Say ililiktar na Dios et saray manguunor ed sikato, balet saramay agmanguunor et nabalang day bilay da.