Angasawa si Isaac na Maong a Bii

ANTAM no siopa yay bii ya walad litrato? Say ngaran to et Rebeca. Tan sayay lakin onaabet ed sikato et si Isaac. Si Rebeca so magmaliw ya asawa to. Panon iyan agawa?

Labay nen Abraham ya iyanapan na maong ya asawa so anak ton si Isaac. Agto labay ya mangasawa so anak to na biin taga-Canaan, ta ag-ira mandadayew ed tuan Dios. Kanian, tinawag nen Abraham so aripen to tan imbaga to: ‘La kad saray kakanayon ko diad Haran tan iyanapan moy Isaac na asawaen to.’

Angalan tampol so aripen nen Abraham na samploran kamelyo tan nambiahe. Sanen sikatoy asingger la ed panaayaman na kakanayon nen Abraham, tinmundad sakey a bobon. Mansirunget lad saman, tan saray bibii ed syudad et ompapaway pian onasol ed bobon. Kanian nampikasi ed si Jehova so aripen nen Abraham: ‘Komon ta say biin mangiter na nainum ed siak tan ed saray kamelyo so pinilim ya magmaliw ya asawa nen Isaac.’

Kabebekta, nitan lay Rebeca ya onasol. Sanen mikekerew na nainum so aripen, inikdan to. Insan pinainum ton amin iray apaet ya kamelyo. Mairap iman ya trabaho ta dakdakel so iinumen na kamelyo.

Nen asumpal lay Rebeca, tinepet na aripen no siopay tatay to. Tinepet to met no nayari miugip ed sikara. Onyay ebat nen Rebeca: ‘Say tatay ko et si Betuel, tan walay kuarton natuloyan yo.’ Amta na aripen ya si Betuel et anak nen Nahor ya agi nen Abraham.

Diad saman a labi, imbaga na aripen ed si Betuel tan ed agi nen Rebeca, ya si Laban, so rason na imbisita to. Inabuloyan day Rebeca ya mila ed sikato pian magmaliw ya asawa nen Isaac. Antoy imbaga nen Rebeca nen sikatoy tinepetan da? Inkuan to: ‘On, mila ak.’ Kanian diad tinmumbok ya agew, nambiahe la ran papawil ed Canaan.

Onngangarem la nen akasabi ra. Anengneng nen Rebeca so sakey ya lakin manaakar ed alog. Si Isaac iman. Aliketan si Isaac nen anengneng toy Rebeca. Taloy taon ni labat so apalabas sanen inatey so nanay ton si Sara tan siansia nin maer-ermen. Balet natan, naad-aro ton maong si Rebeca, kanian sikatoy maliket lamet.