Binusol si Jose na Saray Kuya To

NENGNENG moy litrato, maer-ermen tan pakaskasi yay laki. Si Jose iya. Inlako na saray kuya to ed lalakin paonlad Ehipto. Diman et magmaliw ya aripen si Jose. Akin et ginawa iya na saray kuya to? Ta akaibeg irad sikato.

Inad-aron maong nen Jacob si Jose. Tan inikdan toy Jose na marakdakep tan andukey ya kawes. Sanen anengneng na 10 ya kuya to ya mas inaro na tatay da si Jose, akaibeg irad sikato tan binusol da. Balet wala ni sakey ya rason no akin a sikatoy kabusol da.

Amiduan nankugip si Jose. Diad kugip to et tinmuek iray kuya to ed sikato. Sanen inistorya nen Jose iray kugkugip tod saray kuya to, lalo dan binusol.

Aminsan, sanen manpapastol iray kuya to, imbaga nen Jacob ed si Jose ya laen to ra. Nen anengneng na saray kuya to ya nitan lay Jose, imbaga na arum ed sikara: ‘Pateyen tayo!’ Balet imbaga nen Ruben, say panguloan da: ‘Aleg, agyo tan gagawaen!’ Kanian, imbuntok day Jose ed amagan bobon. Insan ira nanisip no antoy gawaen dad sikato.

Dugarugan nitan la ray lalakin Ismaelita. Imbaga nen Juda ed saray agagi to: ‘Ilako tayo lad saray Ismaelita.’ Tan ontan so ginawa ra. Inlako day Jose ed 20 piraso na pilak. Mauge-uges ira awa?

Antoy ibaga dad tatay da ey? Amatey ira na kanding tan insawsaw day marakdakep ya kawes nen Jose ed dala na kanding. Insan da insempet so kawes ed si tatay dan Jacob tan imbaga ra: ‘Nalmo mi ya ay. Nengneng yo no aya may kawes nen Jose.’

Abidbir nen Jacob so kawes. ‘Pinatey na masebeg ya ayep si Jose,’ so inyakis to. Tan satan so labay na saray kuya nen Jose ya isipen na tatay da. Maer-ermen si Jacob. Pigay agew ya nanakis. Balet diad tua, ag-inatey si Jose. Nengnengen tayo no antoy agawad sikato.