Inkulong si Jose

SI Jose et mantaon ni labat na 17 sanen inawit ed Ehipto. Diman et inlako dad lakin manngaran na Potifar. Si Potifar et mantratrabaho ed Faraon ya ari na Ehipto.

Makulikuli ya nantrabaho si Jose ed amo ton si Potifar. Kanian nen binmaleg la, sikatoy ginawa nen Potifar ya mangasikaso ed interon abung to. Akin balet et akakulong si Jose ey? Lapud asawa nen Potifar.

Si Jose et guap-guapo, tan labay na asawa nen Potifar so miakdol ed sikato. Balet amta nen Jose ya mauges itan, kanian agto labay ya gawaen. Nampasnok ya maong so asawa nen Potifar. Kasempet na asawa to, sikatoy nantila tan imbaga ton: ‘Papasuoten ak na saman ya mauges ya aripen ya miakdol ed sikato!’ Anisiay Potifar, tan nampasnok ya maong ed si Jose. Kanian impakulong to.

Ag-abayag, anengneng na opisyal ed prisoan ya maong a too si Jose. Kanian ginawa toy Jose ya mangasikaso ed amin ya priso. Aminsan, nampasnok si Faraon ed managserbi na alak tan ed panadero to, kanian impakulong to ra. Sakey ya labi, nankugip irayan dua, balet agda amtay labay ya ibaga na kugip da. Kaimbuasan, inkuan nen Jose: ‘Ibaga yod siak so kugip yo.’ Kayari ran inistorya, diad tulong na Dios et impaliwawa toy labay ya ibaga na kugip da.

Inkuan nen Jose ed managserbi na alak: ‘Kayari taloy agew, ibulos ka la nen Faraon tan ipawil to kad datin kimey mo.’ Kanian kinerew nen Jose: ‘No nibulos ka la, salita mo ak met ed Faraon pian nipaway ak ed sayan pasen.’ Balet onyay imbaga nen Jose ed panadero: ‘Kayari taloy agew, putoten nen Faraon so ulom.’

Kalabas na taloy agew, agawa so imbaga nen Jose. Impaputot nen Faraon so ulo na panadero. Balet imbulos to so managserbi na alak tan nanlingkor lamet ed ari. Pero alingwanan na managserbi na alak si Jose! Agto inistorya ed si Faraon kanian akakulong ni si Jose.