Matoor si Job ed Dios

NENGNENG mo yay lakin mansasakit, kaskasian awa? Say ngaran to et Job, tan sayay bii et asawa to. Imbaga tod si Job: ‘Ayew moy Dios pian ompatey ka la.’ Akin et imbaga to man, tan akin et maniirap ya maong si Job?

Si Job et maong ya too tan matulok ed Dios. Sikatoy manaayam ed Uz, ya asingger ed Canaan. Inaro nen Jehova si Job.

Balet, sikatoy kabusol nen Satanas ya Diablo. Si Satanas et mauges ya anghel ya mamubusol ed si Jehova. Atukso toy Adan tan Eva ya ag-ontulok ed si Jehova, tan iisipen ton sarag to met ya tuksoen so amin. Sarag to kasi? Andi. Isip mo pa iramay matoor ya totoon naaralan tayo. Sige pa, manbitla ka pa.

Sanen inatey lay Jacob tan Jose, si Job so toon sankamatooran ed si Jehova diad interon dalin. Labay ya ipaamta nen Jehova ya agsarag nen Satanas ya gawaen ya mauges so amin, kanian imbaga tod si Satanas: ‘Nengneng moy Job. Talagan sikatoy matoor ed siak.’

Onyay ebat nen Satanas: ‘Matoor ed sika ta bebendisyonan mo tan dakel so kayamanan to. Balet no bawien mo iratan, nengneng mo no agto ka ayewen.’

Kanian imbaga nen Jehova: ‘Sige sirin, alam iray walad sikato. Gawam so mauges ya labay mon gawaen ed si Job. Nengnengen tayo no ayewen to ak. Basta agmo papateyen.’

Unona, impatakew nen Satanas iray baka tan kamelyo nen Job, tan pinatey da ray karnero to. Insan pinatey nen Satanas iray 10 ananak nen Job panamegley na bagyo. Kayari to, inikdan toy Job na manotot iran pelsa. Nanirap ya maong si Job. Kanian imbaga na asawa tod sikato: ‘Ayew moy Dios pian ompatey ka la.’ Balet ag-iya ginawa nen Job. Sinmabi iray taloran kunkunwarin kakaaro to tan imbaga dan sikatoy dudusaen lapud kasalanan to. Balet siansian matoor si Job.

Aliketan ya maong si Jehova ed sikato tan benendisyonan to. Pinaabig to met si Job. Awalaan si Job na 10 ya magaganggana tan guapon ananak, tan adoble so karakel na saray baka, karnero, tan kamelyo to.

Sika ey, kasin lanang kan matoor ed si Jehova a singa si Job? No ontan, bendisyonan ka met na Dios. No magmaliw lan balibali so interon dalin ya singa hardin na Eden, makapambilay ka ya tuloytuloy.