Mandarlang ya Kiew

AKASABI si Moises ed palandey na Horeb pian mananap na dika parad saray karnero to. Ditan to anengneng so mandarlang ya kiew balet agnapopoolan!

‘Makapakelaw iya. Onasingger ak pa pian nanengneng kon maong,’ kuan nen Moises. Nen onaasingger, walay boses manlapud kiew, imbaga to: ‘Agka onaasingger. Ekal mo tay sandalyas mo ta akaalagey kad masanton pasen.’ Mansasalita so Dios panamegley na anghel, kanian sinaniban nen Moises so lupa to.

Insan imbaga na Dios: ‘Anengneng koy paniirap na saray totook ed Ehipto. Kanian ibulos ko ra, tan sika so ibakik ya mangipaway ed sikara diad Ehipto.’ Iyakar nen Jehova so totoo to ed marakep ya dalin na Canaan.

Balet inkuan nen Moises: ‘Siopa ak pian manggawa ed saya? Et no onla ak, siopay ibagak ed saray Israelita ya angibaki ed siak?’

‘Onya so ibagam,’ so ebat na Dios. ‘“Si JEHOVA a Dios nen Abraham, Dios nen Isaac, tan Dios nen Jacob, et imbaki to ak ed sikayo.”’ Tan inkuan ni nen Jehova: ‘Saya so ngaran ko ed andi-angga.’

‘Balet panon to no agda ak panisiaan ya imbaki mo ak?’ kuan nen Moises.

‘Anto tay sankabembenan mo?’ so intepet na Dios.

‘Baston,’ so ebat nen Moises.

‘Ibantak mo,’ kuan na Dios. Tan nen imbantak to, nagmaliw ya uleg. Insan, nanggawa si Jehova na sananey nin milagro. Imbaga to: ‘Isurob moy limam ed kawes mo.’ Insurob sirin nen Moises so lima to, tan nen impaway to, say lima to et aketong! Kayari to, inikdan nen Jehova si Moises na pakayarin manggawa na komatlon milagro. Tan inkuan to: ‘No gawaen mo irayan milagro ed saray Israelita, manisia ira ya imbaki ta ka.’

Kayari na satan, sinmempet si Moises tan imbaga tod Jetro: ‘Abuloyan mo ak pan ompawil ed saray kakanayon ko ed Ehipto pian komustaen ira.’ Kanian pinasipot nen Jetro si Moises.