Tolda a Parad Panagdayew

ANTAM no anto ya? Espisyal iyan tolda parad panagdayew ed si Jehova. Tatawagen met iyan tabernakulo. Asumpal iyan impaalagey na saray Israelita sakey taon kayari intaynan dad Ehipto. Antam no siopay nampagawad saya?

Si Jehova. Sanen walad Palandey Sinai si Moises, imbaga nen Jehova ed sikato no panon iyan ipaalagey. Imbilin ton kaukolan ya mainomay iyan nabagbag pian naawit ed nanduruman pasen tan natuop lamet. Kanian nen onaalis-alis ed nanduruman pasen diad desierto iray Israelita, awi-awit da iyan tolda.

No onnengneng kad loob na melag a kuarto ed sampot na tolda, wadtan so kahon. Tatawagen iyan kaban na sipanan. Diad biek tan biek na satan, walay duaran anghel odino kerubin ya gawad balitok. Insulat lamet na Dios so Samploran Ganggan ed duaran tapyak a bato ta abetag nen Moises iramay inmuna. Sarayan bato et inyatol ed kaban na sipanan. Kaiba met ditan so banga ya walay karga ton mana. Natandaan mo ni no anto may mana?

Say pinili nen Jehova a magmaliw ya atagey a saserdote et si Aaron ya kuya nen Moises. Indaulo toy panagdayew na totoo ed si Jehova. Tan saray ananak to et saserdote met.

Natan, nengneng mo tay mas baleg a kuarto na tolda. Nanenengneng moy kahon ya manasewek? Altar itan ya pampopoolan na saray saserdote na ambalingit iran insenso. Insan walay lamparaan ya walay pitoran silew to. Wadtan met so lamisaan ya pangitatapewan na 12 ya tinapay.

Diad paway na tabernakulo et walay baleg a palanggana ya napnoy danum. Panuurasan itan na saray saserdote. Wala met so baleg ya altar ditan ya pangipopoolan ed saray ayep ya iyaapay ed si Jehova. Say tolda et walad pegley na kampo, tan saray Israelita et manaayam ed kaliberliber na satan.