Inyamot nen Rahab Iray Espiya

SARAYAN lalaki et kaukolan ya ontakas, ta no andi napatey ira. Sikaray Israelitan espiya, tan sayay biin ontutulong et si Rahab. Say abung nen Rahab et walad padir na syudad na Jerico. Amtaen tayo no akin a nadedelikado irayan lalaki.

Akaparaan lan ombaliw ed Ilog Jordan iray Israelita pian onlad Canaan. Balet antis na satan, angibaki si Josue na duaran espiya. Imbaga tod sikara: ‘La kayo, nengneng yoy bansa ra tan say syudad na Jerico.’

Sanen linma ray espiya ed Jerico, linmoob irad abung nen Rahab. Balet walay angidalem ed ari na Jerico. Kanian angibaki so ari na lalaki, tan ingganggan dad si Rahab: ‘Papaway mo ray lalakin wadtad abung mo!’ Balet inyamot nen Rahab iray espiya diad atep na abung to. Et imbaga to: ‘Walan tuay linma diad abung ko, balet agko amta no taga iner ira. Tinmaynan la ra nen mansirunget la, antis ya nikapot so puertay syudad. Apura yo, ompan naabotan yo ni ra!’ Kanian linma ran angusil ed saray espiya.

Kaalis da, nanapuran linmad atep si Rahab. Imbaga tod saray espiya: ‘Amtak ya iter nen Jehova ed sikayo iyan dalin. Nadngelan mi ya pinaekat toy Ambalangan Dayat sanen tinaynan yoy Ehipto, tan pinatey yoy arin Sihon tan Og. Kinasian ta kayo, kanian kasian yo ak met komon. Iliktar yo ray ateng tan agagik.’

Impormisa na saray espiya ya iliktar da ra. Balet, kaukolan a walay gawaen nen Rahab. Imbaga na saray espiya: ‘Iberber mo yay ambalangan lubir ed bintanam, tan tipon mod abung mo so amin a kakanayon mo. Tan sano ompawil kami diad Jerico, nanengneng mi iyan lubir ed bintanam tan agmi pateyen so siopaman ya walad abung mo.’ Sanen akapawil la ray espiya ed si Josue, imbalita day agawa.