Imbaliw ed Ilog Jordan

NENGNENG mo! Ombabaliw iray Israelita ed Ilog Jordan! Balet nakar na danum ey? Pigaran minuto labat so apalabas et aralem so ilog ta mauran ed saman. Balet natan et nakatan! Tan ombabaliw iray Israelita ed amagan dalin ya singa samay imbaliw dad Ambalangan Dayat! Nakar na danum ey? Nengnengen tayo.

Sanen ombaliw la ray Israelita ed Ilog Jordan, onyay impaibaga nen Jehova: ‘Kaukolan a sakbaten na saray saserdote so kaban na sipanan tan onla rad unaan tayo. Sano itaksaw day sali rad Ilog Jordan, ontunday agus.’

Kanian sinakbat na saray saserdote so kaban na sipanan, tan inmuna rad saray totoo. Insan linma rad ilog. Makmaksil so agus tan araldalem so danum. Balet kataksaw dad danum, tinmunday agus! Milagro! Diad bandad unaan na ilog et pinatunda nen Jehova so agus. Kabebekta, anggapo lay danum ed ilog!

Linmad pegley na amagan ilog iramay saserdoten manasakbat na kaban na sipanan. Nanenengneng mo rad litrato? Legan dan akaalagey, binmaliw so amin ya Israelita ed amagan Ilog Jordan!

Nen akabaliw la ran amin, imbaga nen Jehova ed saray 12 ya mabibiskeg a lalaki: ‘La kayod kulaan na saray saserdoten manasakbat na kaban na sipanan. Mangala kayo na 12 ya angkabaleg a bato, tan pantatapewan yod pasen ya pampainawaan yod sayan labi. Pian diad arapen, sano mantepet iray anak yo nipaakar ed sarayan bato, ibaga yod sikaran tinmunday agus na danum sanen imbaliw so kaban na sipanan nen Jehova diad Jordan. No nanengneng yo irayan bato, nanonotan yo iyan milagro!’ Angiyan met si Josue na 12 ya bato ed abay na akaalageyan na saray saserdote diad ilog.

Kayari to, imbaga nen Josue ed saray saserdoten manasakbat ed kaban na sipanan: ‘Sakbit ki lad Jordan.’ Tan nen kaalis dan mismo, inmagus lamet so danum.