Sakey a Matakew ed Israel

NENGNENG mo no antoy ikokotkot na sayan laki ed tolda to! Sakey ya marakdakep a kawes, sakey ya balitok, tan pigaran piraso na pilak. Inala to iraya ed syudad na Jerico. Balet anto komoy nepeg ya gawaen ed saramay walad Jerico? Natandaan mo ni?

Kaukolan ya deralen iraman, tan say balitok tan pilak et awiten ed pananginay kayamanan ed tabernakulo nen Jehova. Kanian ag-inunor na sarayan totoo so Dios. Tinakew day parad si Jehova. Say ngaran na laki et Acan, tan kaiba toy pamilya to. Nengnengen tayo no antoy agawa.

Kayari irayan tinakew nen Acan, angibaki si Josue na lalaki pian milaban ed syudad na Ai. Balet atalo ira. Apatey iray arum, tan saray arum et batik. Maer-ermen si Josue. Sikatoy tinmikleb ed dalin tan nampikasi ed si Jehova: ‘Akin et pinaulyanan mo yan nagawad sikami?’

Imbaga nen Jehova: ‘Alagey ka! Nankasalanan so Israel. Inala ray bengatlan nepeg ya deralen odino iyan ed tabernakulo nen Jehova. Tinakew day marakdakep a kawes tan inyamot da. Agta kayo bendisyonan anggad agyo iraman deralen, pati may nantakew ed saratan.’ Imbaga nen Jehova ya ipaamta tod si Josue no siopa so nankasalanan.

Tinipon nen Josue iray totoo, tan pinili nen Jehova so mauges a toon si Acan. Imbaga nen Acan: ‘Nankasalanan ak. Akanengneng ak na marakdakep a kawes, balitok, tan pigaran pilak. Agusgustoan ko iraya kanian inalak. Naromog yo irayan akakotkot ed dalem na toldak.’

Sanen nalmo iraya tan inyakar ed si Josue, imbaga tod si Acan: ‘Akin et ontay ginawam, tan inlanor mo kami ni? Sika natay dusaen nen Jehova!’ Kanian si Acan tan say pamilya to so tinupak ya anggad inatey. Agta ipapanengneng na saya ya mauges so pangala na agtayo gawa?

Kayari na satan, akilaban lamet so Israel ed Ai. Tan tinulongan ira nen Jehova, kanian analo ira.