Agsinmelek so Agew

NENGNENG moy Josue. Ibabaga to: ‘Agew, agka onseselek!’ Tan agsinmelek so agew. Sanagew itan ya tinmundad pegley na tawen. Si Jehova so nanggawad saya! Balet, amtaen tayo no akin ya labay nen Josue ya ag-onselek so agew.

Nen lusoben la na limaran mauges ya ari na Canaan iray Gibeonita, sikaray angibaki na sakey ya laki pian onkerew na tulong ed si Josue, tan impaibaga ra: ‘Gala dian tampol ta tulongan mo kami! Amin ya ari ed ataragey iran pasen et naniiban milaban ed saray aripen mo.’

Tampol ya linma si Josue tan saray sundalo to. Sanlabi iran nanakar. Kasabi dad Gibeon, ataktakot iray sundalo na limaran ari tan binmabatik ira. Insan angipelag si Jehova na angkakabaleg a kristal, tan mas dakel so inaatey ed satan nen say pinapatey na saray sundalo nen Josue.

Nanenengneng nen Josue ya onseselek lay agew. Ombibilunget la, tan dakel ed saray kalaban ya sundalo so makatakas. Kanian nampikasi si Josue ed si Jehova tan inkuan to: ‘Agew, agka onseselek!’ Lapud agsinmelek so agew, asumpal na saray Israelita so impilaban da.

Ami-amin, 31 a mauuges ya ari ed Canaan so mamubusol ed totoo na Dios. Inmabot ed anemiran taon so impilaban nen Josue tan saray sundalo to. Kayari na saya, inapag nen Josue so dalin na Canaan ed saramay tribu ya agni naikdan.

Kalabas na dakel a taon, inatey si Josue ed edad ya 110. Sanen sikato tan saray kakaaro to et mabilay ni, saray totoo et ontutulok ed si Jehova. Balet nen inatey la irayan maong a lalaki, saray totoo et ginmapon nanggawa na mauges kanian aliway nansumpalan da. Mas kaukolan dad saya so tulong na Dios.