Impormisa na Dios so Paraiso

NAYARIN onya may paraiso ya impanengneng na Dios ed si propetan Isaias. Si Isaias et nambilay kayari nen Jonas.

Say labay ya ibaga na paraiso et “hardin.” Walay nanonotan mod sayan litrato? Kaparpara to may balibalin hardin ya ginawa nen Jehova parad si Adan tan Eva. Balet magmaliw kasin paraiso so interon dalin?

Impaisulat nen Jehova ed si propeta Isaias so nipaakar ed balon paraison parad totoo. Inkuan to: ‘Saray aso ed katakelan tan kordero et makapan-ulop la. Saray kilaw ya baka tan leon et saniban mangan, tan asikasoen ira na ugugaw. Anggan say mansususo nin ugaw et agsakitan na madetan uleg.’

Pero ompan ibaga na arum: ‘Ay, ag-itan nagawa. Ta lanang ya walay gulo tan agla itan nauman.’ Balet isip mo pa: Iner impan-ayam na Dios si Adan tan Eva?

Diad paraiso. Pinapaway ira labat ed balibalin ayaman da sanen agda inunor so Dios, insan ira tinmakken tan inatey. Impormisa na Dios ya iter to ed saray mangaaro ed sikato so abalang nen Adan tan Eva.

Diad balon paraiso, anggapo lay gulo tan irap. Anggapo lay mansakit. Magmaliw lan maliket so amin. Nagawa la so panlabayan na Dios. No kien et naaralan tayo lanlamang no panon iyan gawaen na Dios.