Aderal so Jerusalem

MASULOK lan 10 taon manlapu nen inawit nen Arin Nabucodonosor ed Babilonia so amin a de-aral ya Israelita. Tan natan nengneng moy nagagawa! Apoolan so Jerusalem. Tan inalan priso ed Babilonia iray Israelitan ag-apatey.

Tandaan, impasakbay na saray propeta nen Jehova ya onyay nagawa no ag-ira manguman. Balet ag-ira dinmengel. Siansia nin nandayew irad saray aliwan tuan dios imbes a diad si Jehova. Kanian nepeg labat iran dusaen. Imbaga nen propetan Ezequiel so nipaakar ed mauges a gagawaen na saray Israelita.

Antam no siopa si Ezequiel? Sikatoy sakey ed saray balolaki ya inawit ed Babilonia nen Arin Nabucodonosor. Kabansag toy Daniel, Sadrac, Mesac, tan Abednego.

Diad Babilonia, mamilagron impanengneng nen Jehova ed sikato iray mauges a nagagawa diad templo ed Jerusalem. Tan makapabigla so anengneng nen Ezequiel!

Imbaga nen Jehova ed si Ezequiel: ‘Nengneng mo ray makapadimlan gagawaen na totoo diad templo. Nengneng mo ray padir ya napno na litratoy uleg tan arum ni ran ayayep. Tan nengneng mo ray Israelitan mandadayew ed saratan!’ Et insulat nen Ezequiel so amin ya anengneng to.

Tinepet nen Jehova si Ezequiel: ‘Nanenengneng mo no antoy sekreton gagawaen na saray lider na Israel?’ On, nanenengneng to met iratan. Walay 70 a lalaki ya mandadayew ed saray aliwan tuan dios. Ibabaga da: ‘Ag-itayo nanenengneng nen Jehova. Nilingwanan to tayo la.’

Insan impanengneng nen Jehova iray arum a bibiin walad amianen a puerta na templo. Akayurong ira diman a mandadayew ed dios a Tamuz. Tan nanenengneng nen Ezequiel iray 25 a lalaki diad puerta na templo nen Jehova. Ondadakmomo rad bukig tan dadayewen day agew!

Imbaga nen Jehova: ‘Agak rerespetoen na sarayan totoo. Anta manggagawa la ra lanti na mauges, dia nid mismon templok!’ Kanian impormisa nen Jehova: ‘Nalikna ra so biskeg na pasnok ko. Tan agko ra kasian sano ompatey ira.’

Manga taloy taon kayarin impanengneng nen Jehova iraya ed si Ezequiel, nanrebelde iray Israelita ed si Arin Nabucodonosor. Kanian nilusob to ra. Kayari sakey tan kapalduan taon, akaloob iray taga-Babilonia ed Jerusalem tan pinoolan da so syudad. Dakel iray apatey odino inawit dan priso diad Babilonia.

Akin et inabuloyan nen Jehova a naderal so Israel? Ta ag-ira dinmengel ed sikato tan agda inunor so ganggan to. Ipapanengneng na saya ya importantin lanang ya unoren so ibabaga na Dios.

Nen unaan, wala ray pigaran inabuloyan ya manayam ed dalin na Israel. Tinuro nen Arin Nabucodonosor so Judion si Gedalias a mangasikaso ed totoo. Balet pinatey day Gedalias. Natan et natatakot irad saray taga-Babilonia ya ompan lusoben tan pateyen da ran amin lapud ginawa ra. Kanian, tinmakas irad Ehipto tan pinilit day Jeremias ya milad sikara.

Lapud satan, anggapoy anggan sakey ya atilak ed dalin na Israel. Anggapoy nanayam ditan ed loob na 70 a taon. Balet impormisa nen Jehova ya papawilen to ray totoo to kayari na 70 a taon. Pero, anto kasi agawa ed saray totoo na Dios a walad Babilonia? Nengnengen tayo.