Si Jesus Diad Templo

NENGNENG mo yay ugaw ya mitotongtong ed saray mamasiken. Sikaray managbangat ed templo na Dios ed Jerusalem. Tan sayay ugaw et si Jesus. Sikatoy mantaon na 12 ed saya.

Mankelaw iray managbangat ta dakdakel so amta to nipaakar ed Dios tan Biblia. Pero kulaan di Maria tan Jose ey? Nengnengen tayo.

Kada taon, aawiten nen Jose so pamilya to ed Jerusalem parad espisyal ya selebrasyon a tatawagen ya Paskua. Arawdawi so Jerusalem. Tan anggapo ni luluganan ed saman. Kanian manga taloy agew dan aakaren.

Diad saman et baleg lay pamilya nen Jose. Kanian dakel iray agagi nen Jesus ya kukumisan da. Sanen pasempet la rad Nazaret, say amta ra et akiulop si Jesus ed arum ya manbiabiahe. Balet nen onlalabi la, agda naromog si Jesus. Inanap dad saray kakanayon tan kakaaro ra, pero anggapod man! Kanian pinmawil irad Jerusalem pian anapen.

Aromog dan siansiay Jesus ya ondedengel tan mantetepet ed saray managbangat. Tan mankelaw so amin ed talino nen Jesus. Balet imbaga nen Maria: ‘Anako, akin et ginawam iya ed sikami? Aburido kami nen tatay mon manaanap ed sika.’

Et inmebat si Jesus: ‘Akin et aanapen yo ak? Agyo ta amta ya nepeg a wala ak ed abung nen Amak?’

On, labalabay nen Jesus so onlad lugar ya pakaaralan tod Dios. Di ba dapat ontan met so nalikna tayo? Diad Nazaret et oonlay Jesus ed saray aral pian mandayew ya sinimba-simba. Lapud madengedengel, dakel so naaralan tod Biblia. Maabig sirin no aligen tayoy Jesus.