Dakel so Pinakan nen Jesus

WALAY makapabiglan agawa. Impaputot nen Herodias ya asawa na ari so ulo nen Juan a Managbautismo.

Sanen abalitaan iya nen Jesus, maer-ermen. Linman bukor ed nisulinek a pasen. Balet, tinumbok na totoo. Tan akasian to ra. Kanian intongtong tod sikara so nipaakar ed panarian na Dios, tan pinaabig to ray mansasakit.

Diad saman, imbagad sikato na saray disipulo to: ‘Onlalabi la tan nisulinek iyan pasen, ibakim la ray totoo pian makasaliw iray naakan dad asingger a baryo.’

Et inkuan nen Jesus: ‘Agda la kaukolan so onalis. Ikdan yo ray naakan. Iner so pangaliwan tayoy naakan ya ipakan ed sikaran amin?’

‘Anggano daiset labat so kanen da, balbaleg nin siansiay nagastos tayo,’ so ebat nen Felipe. Inkuan nen Andres: ‘Walay awit na sayan ugaw parad sikatayo ya limaran tinapay tan duaran sira. Pero, ag-iya onsusto.’

‘Payurong yo ray totoo,’ so kuan nen Jesus. Insan akisalamat ed Dios parad tinapay tan sira, tan pinisag-pisag to iratan. Tan impaibunog tod saray disipulo to. Walay 5,000 a lalaki, tan nilibon bibii tan ugugaw. Angan iran amin anggad naksel ira. Nen tinipon na saray disipulo so kera, apano so 12 baskit!

Kayari na satan, pinalugan nen Jesus iray disipulo to diad baloto pian ombaliw ed Dayat na Galilea. Diad saman a labi, biglan binmagyo tan ngalngali nabaliktad so baloto ta angkakabaleg iray daluyon. Manggiwgiw iray disipulo. Insan nen manpegley-labi la, walay anengneng dan manaakar ed tapew na danum. Akaeyag irad takot ta agda amta no antoy nanenengneng da.

‘Agkayo natatakot, siak iya!’ so kuan nen Jesus. Balet agni ran siansia manisia. Kanian imbaga nen Pedro: ‘Katawan, no talagan sika tan, paasingger mo ak pa.’ Et inmebat si Jesus: ‘Gala!’ Tan nanakar si Pedro ed tapew na danum! Balet ataktakot tan onlelereg la, kanian inliktar nen Jesus.

Ag-abayag, amakan lamet si Jesus na nilibon totoo panamegley na pitoran tinapay tan pigaran angkekelag ya sira. Tan naksel lamet so amin. Maong ya mangasikaso si Jesus awa? No man-ari la, anggapo lay panaburidoan tayo!