Inaro To ray Ugugaw

NENGNENG moy Jesus dia ya akalakap ed ugaw. Talagan inaro to ray ugugaw. Saratay lalakin katongtong to et saray apostol to. Antoy ibabaga tod sikara? Nengnengen tayo.

Kakkasabi di Jesus ya nambiahe. Diad dalan et walay pandedebatian na saray apostol. Kanian tinepetan ira natan nen Jesus: ‘Antoy pandedebatian yo nen niman?’ Diad tua, amta nen Jesus no anto itan. Balet tinepetan to ra pian nanengneng no ibaga dad sikato.

Ag-inmesel iray apostol ta pandedebatian da no siopay mas manuna ed sikara. Labay na arum ya apostol a mas maong ira nen say arum. Panon ya ibaga nen Jesus ya aliwan duga itan?

Tinawag toy sakey ya ugaw, tan pinaalagey tod arap da. Insan to imbagad sikara: ‘Ibabagak ed sikayo, no agkayo manguman tan magmaliw ya singa sayan ugaw, agkayon balot makaloob ed panarian na Dios. Say manpaabeba a singa sayan melag ya ugaw so sankamanunaan ed panarian.’ Antam no akin ya ontay imbaga nen Jesus?

Ta balewalad ugugaw no siopay manuna odino mas maong ed sikara. Kanian kaukolan ya aligen na saray apostol iray ugugaw tan ag-ira mankokolkol no siopay manuna odino mas maong ed sikara.

Aminsan, impanengneng lamet nen Jesus ya inad-aro to ray ugugaw. Inawit na arum iray anak da pian nanengneng day Jesus. Balet binano ira na saray apostol. Pero imbaga nen Jesus: ‘Paulyan yo labat ya onasingger ed siak iray ugugaw, ta say panarian na Dios et parad saray totoon singa sikara.’ Insan nilalakap nen Jesus iray ugugaw tan benendisyonan to ra. Balibalin naamtaan awa ya inaro nen Jesus iray ugugaw?