Say Panagbangat nen Jesus

AMINSAN, imbaga nen Jesus ed sakey a laki a nepeg ton aroen so kapara ton too. Impasen na laki ya saray kabaleyan tan karelihyon to labat so kapara ton too. Tinepet toy Jesus: ‘Siopay kaparak a too?’ Amta nen Jesus so iisipen to.

Kanian intongtong nen Jesus so nipaakar ed sakey a Judio tan Samaritano. Naaralan tayo la ya aglabay na maslak a Judio iray Samaritano. Oniay istorya nen Jesus:

Sakey ya agew, walay Judion paonlad Jerico. Balet, sinabat na matatakew. Inala day kuarta to tan binugbog da anggad patey-pateyan la.

Insan nen kien, dinmalan so sakey ya Judion saserdote. Anengneng to may laki. Anto kasi gawaen to? Pinaliisan to tan dinmalan ed sananey. Nitan met lay sakey a relihyoson too. Sakey a Levita. Tinmunda kasi? Andi, tan agto met tinulongan imay laki. Diad litrato, paarawi la may saserdote tan Levita.

Balet siopa yay ontutulong ed Judion binugbog? Sakey a Samaritano. Tatambalen to ray sugat na laki. Insan, inyakar to ed pasen ya nayarin pampainawaan tan pampaabigan to.

Kasumpal nen Jesus ya inistorya iya, tinepet to: ‘Siopa ed sarayan talo so nagmaliw a kaparan too na samay lakin binugbog na matatakew? Kasin samay saserdote, Levita o samay Samaritano?’

‘Samay Samaritano. Sikatoy maomaong ed samay lakin binugbog,’ so ebat na katongtong nen Jesus.

‘Duga. La ka sirin tan ontan met so gawam,’ kuan nen Jesus.

Kasin labay moy panagbangat nen Jesus? Amayamay so importantin naaralan tayo no ondengel tayod ibabaga to ya akasulat ed Biblia.