Abilay si Jesus

ANTAM no siopa iraya? Sayay bii et si Maria Magdalena ya kaaro nen Jesus. Tan sarayay lalakin akaamputi et anghel. Nenengnengen nen Maria so angiponponan ed si Jesus. Say tawag ed sayan melag a kuarto et lubok. Balet anggapo may bangkay nen Jesus! Siopa kasi angala? Nengnengen tayo.

Kayari impatey nen Jesus, imbaga na saray saserdote ed si Pilato: ‘Sanen mabilay ni Jesus, imbaga to ya sikatoy nabilay kayari taloy agew. Iganggan mo sirin a bantayan a maong so lubok pian agnatakew na saray disipulo to so bangkay to tan agda ibagan abilay lamet!’ Kanian angibaki si Pilato na saray sundalo a manbantay ed lubok.

Sanen onliliwawa la diad komatlon agew na impatey nen Jesus, walay sinmabin anghel nen Jehova. Intulin toy baton akasarad lubok. Ataktakot iray sundalo kanian ag-ira akagalaw. Tan nen ninengneng day loob na lubok, anggapo la may bangkay! Linmay arum a sundalo ed syudad pian ibaga iya ed saray saserdote. Antam no antoy ginawa na saray mauges a saserdote? Binayaran da ray sundalo pian mantila. Imbilin da: ‘Ibaga yon tinakew na saray disipulo to so bangkay.’

Legan na satan, binisita na arum a bibiin kaaro nen Jesus so lubok. Mankelaw ira ta anggapoy karga na satan! Kabebekta et nampanengneng so duaran anghel ya maliwliwaway kawes da. Imbaga ra: ‘Abilay lay Jesus. La kayo tan ibaga yod saray disipulo to.’ Batik iray bibii! Balet diad dalan, asabat day Jesus tan inkuan tod sikara: ‘La kayo, ibaga yod saray disipulok.’

Sanen imbaga iya na saray bibii, agmakapanisia iray disipulo. Batik si Pedro tan Juan ed lubok, et anggapon tuay karga na lubok! Kaalis da, tinmilak ni si Maria Magdalena. Ditan to anengneng imay duaran anghel.

Antam no antoy agawad bangkay nen Jesus? Pinaandi itan na Dios. Sanen binilay na Dios si Jesus, inikdan To na balon espiritun laman ya singa saray anghel ed tawen. Balet pian ipanengneng ed saray disipulo ya abilay si Jesus, sikatoy angisulong na laman na too. Satan so aralen tayod onsublay.