Pinmawil si Jesus ed Tawen

DIAD inlabas na saray agew, aminpigan nampanengneng si Jesus ed saray papatumbok to. Aminsan, masulok ya 500 a disipulo so akanengneng ed sikato. Tan antam no antoy intongtong tod sikara? Say panarian na Dios. Imbaki nen Jehova si Jesus diad dalin pian ibangat so nipaakar ed Panarian. Tan intultuloy ton ginawa itan anggan sanen abilay lamet.

Natandaan mo ni no anto tay panarian na Dios? On, say Panarian et tudtuan gobierno na Dios diad tawen, tan si Jesus so pinili na Dios a man-ari. Singa naaralan tayo la, impanengneng nen Jesus ya sikatoy maong ya ari sanen pinakan to ray narasan, pinaabig to ray mansasakit, tan binilay to ni ingen iray inaatey!

Kanian sano man-ari lay Jesus ed tawen diad sanlibon taon, antoy nagawad interon dalin? On, magmaliw a marakdakep ya paraiso. Anggapo lay guerra, krimen, sakit, odino patey.

Asabi lay panaon pian ompawil si Jesus ed tawen. Diad 40 ya agew et nampanengneng ed saray disipulo to kanian segurado ra ya sikatoy abilay lamet. Balet antis ton tinaynan iray disipulo to, imbaga tod sikara: ‘Agkayo onaalis ed Jerusalem anggad agyo naawat so masanton espiritu.’ Say masanton espiritu et aktibon puersa na Dios, singa itan siplog na dagem. Ontulong itan ed saray papatumbok to pian nagawaay panlabayan na Dios. Insan, imbaga nen Jesus: ‘Manpulong kayo anggad sankaarawian a parte na dalin.’

Kayari na saya, walay makapakelkelaw ya agawa. Sikatoy ontatagey paarap ed tawen, ya singa nanengneng mod litrato. Insan sinmanib ed sikato so sakey a lurem tan agla anengneng na saray disipulo to. Pinmawil si Jesus ed tawen, tan diman et ginmapon nan-ari ed saray papatumbok to diad dalin.