Tinupak Day Esteban

SAYAY lakin akatalimukor et si Esteban. Sikatoy matoor a disipulo nen Jesus. Balet nengneng moy nagagawa! Tutupaken da! Akin et kabkabusol day Esteban? Nengnengen tayo.

Tutulongan na Dios si Esteban pian makapanggawa na makapakelaw iran milagro. Ag-itan labay na sarayan lalaki, kanian kinontra day ibabangat ton katuaan. Balet inikdan na Dios si Esteban na karunongan, tan impaamta ton tila so ibabangat da. Lapud saya, lalon pinmetang so ulo ra. Kanian inerel da tan pinauges da.

Tinepetan na atagey a saserdote si Esteban: ‘Kasin tua irayay ibabaga ra?’ Marakdakep so ebat nen Esteban tan inusar toy Biblia. Diad sampot na paliwawa to, imbaga ton nensaman et binusol na mauges a totoo iray propeta nen Jehova. Insan inyarum to: ‘Kaparpara yo iraman a totoo. Pinatey yo so lingkor na Dios a si Jesus, tan agyo inunor so ganggan na Dios.’

Nampasnok a maong iray lider na relihyon! Manngilet ira. Balet tinmangay si Esteban tan imbaga to: ‘Nia! Nanenengneng koy Jesus ya akaalagey diad nikawanan na Dios ed tawen.’ Kanian, pinepetan day layag da tan inambon da. Inggayugoy dad paway na syudad.

Ineekal day latop dan kawes tan impabantayan dad kalangweran a si Saulo. Nanenengneng moy Saulo diad bandad beneg? Insan tinupak day Esteban. Tinmalimukor si Esteban tan nampikasi ed Dios: ‘Jehova, agmo ra dudusaen lapud sayan mauges a ginawa ra.’ Amta ton asugsogan labat na saray lider na relihyon so arum ed sikara. Kayari na satan, inatey si Esteban.

No walay manggawa na mauges ed sika, kasin ombawi ka odino kerewen mod Dios ya ibawian to ka? Aliwan ontan so ginawa nen Esteban tan nen Jesus. Maomaong ira, anggan diad saray mambubusol ed sikara. Aligen tayo ra.