Naderal so Amin ya Mauges

ANTOY nanenengneng mo dia? Dakdakel so akalugan ed amputi iran kabayo. Iner so nanlapuan da? Diad tawen. Tan onleleksab irad saray lurem! Talaga kasin wala ray kabayo ed tawen?

Anggapo, aliwa irayan tudtuan kabayo. Ta saray kabayo et agmakabatik ed lurem. Pero antam no akin ya ibabaga na Biblia ya wala ray kabayo ed tawen?

Kasi, nensaman, saray kabayo et maslak ya uusaren ed panlalaban. Ibabaga na Biblia ya diad tawen et wala ray akalugan ed kabayo pian ipaamtan milaban so Dios ed saray totoo diad dalin. Antam no antoy tawag ed sayan panlalaban? Armagedon. Deralen na saya so amin ya mauges diad dalin.

Si Jesus so manunan milaban diad Armagedon. Tandaan, si Jesus so pinili nen Jehova a man-ari ed gobierno To, kanian aka-korona. Wala met so espada to pian ipanengneng ya pateyen toy amin a kalaban na Dios. Pankelawan tayo kasi ya talagan ekalen na Dios so amin a mauges ya totoo?

Ibukay mo pad Istorya 10. Antoy nanenengneng mo? On, say Delap ya aneral ed mauges ya totoo. Siopa so nandelap? Si Jehova a Dios. Nengneng mo natan so Istorya 15. Antoy nagagawa ditan? Dineral nen Jehova so Sodoma tan Gomorra panamegley na apoy.

Nengneng mo met so Istorya 33. Antoy nagagawad saray kabayo tan karwahe na Ehipto? Siopay nanderal ed sikara? Si Jehova. Ginawa to itan pian protektaan so totoo to. Diad Istorya 76, anggan saray Israelita et aderal lapud mauges ira.

Kanian agtayo pankelawan ya ibaki nen Jehova iray anghel to pian ekalen so amin ya mauges diad dalin. Balet antoy resulta na satan? Nengnengen tayo.