Kapitulo 41

Agew na Panangukom na Dios—Say Magayagan Pansumpalan na Satan!

Pasingawey 15​—Apocalipsis 20:11–21:8

Tema: Say inkalapagan a kioli, Agew na Panangukom, tan saray bendisyon a balon katawenan tan balon dalin

Panaon na kasumpalan: Say Sanlibon Taon ya Uley

1. (a) Anto so abalang na katooan sanen nankasalanan si Adan tan Eva? (b) Anto so ag-anguman a gagala na Dios, tan panoy pakaamta tayo?

BILANG totoo, pinalsa itayo pian manbilay ed ando lan ando. No tinulok komon nen Adan tan Eva iray ganggan na Dios, ag-iran balot komon inatey. (Genesis 1:28; 2:8, 16, 17; Eclesiastes 3:10, 11) Balet sanen nankasalanan ira, abalang da so inkayadyari tan bilay a parad sikara tan saray ilalak da, tan nanari so patey ed amin a katooan bilang maruksan kabusol. (Roma 5:12, 14; 1 Corinto 15:26) Anggaman ontan, ag-anguman so gagala na Dios a manbilay ed ando lan ando so ayadyarin totoo ed paraison dalin. Lapud pirmin panangaro to ed katooan, imbaki to so bogbogtong ya Anak to ed dalin, si Jesus, ya angiter ed ayadyarin bilay to bilang too pian onkanan dondon parad “amayamay” ed saray kailalakan nen Adan. (Mateo 20:28; Juan 3:16) Nayarian lan usaren natan nen Jesus iyan legal a kana na bagat to pian ipawil iray mananisian totoo ed ayadyarin bilay diad paraison dalin. (1 Pedro 3:18; 1 Juan 2:2) Agaylan abig a rason pian say katooan so “manliket tan manggayaga”!—Isaias 25:8, 9.

2. Anto so irereport nen Juan diad Apocalipsis 20:11, tan anto imay “[baleg a] trono ya amputi”?

² Lapud si Satanas et akulong ed kaaralman, makagapo la so maglorian Sanlibon Taon ya Uley nen Jesus. Saya la so “agew” ya inggeter na Dios a ‘pangukom to ed mundo unong ed katunongan, ed panamegley na saman a laki a tinandaan to.’ (Gawa 17:31; 2 Pedro 3:8) Inyabawag nen Juan: “Tan akanengneng ak na sakey a [“baleg a,” NW] trono ya amputi, tan say manyurong ed sikato, a dia ed arap to binmatik so dalin tan say tawen; et anggapoy aromog a pasen a panayaman da.” (Apocalipsis 20:11) Anto iyay “[baleg a] trono ya amputi”? Maseguron anggapoy arum noag say panag-ukoman a trono na “Dios a Manangukom na amin.” (Hebreos 12:23) Natan et ukomen to so katooan pian naseguro no siopa so nagunggonaan ed dondon bagat nen Jesus.—Marcos 10:45.

3. (a) Anto so ipapanengneng na katuaan a say trono na Dios so nibagan “baleg” tan “amputi”? (b) Siopa so mangukom ed Agew na Panangukom, tan ed anton basiyan?

³ Say trono na Dios so “baleg,” a mangidadanet ed inkatalonggaring nen Jehova bilang Soberanon Katawan, tan satan so “amputi,” a mangipapaimano ed nagnap ya inkatunong to. Sikato so supremon Ukom na katooan. (Salmo 19:7-11; Isaias 33:22; 51:5, 8) Anggaman ontan, impabtang To ed si Jesu-Kristo so kimey a panangukom: “Ta say Ama agmangukom na siopaman a too, inter to ingen so amin a panangukom ed Anak.” (Juan 5:22) Kaiba nen Jesus iray 144,000 a pinabtangan na “pakauley a mangukom . . . ed sanlibon taon.” (Apocalipsis 20:4) Balet, siansian saray estandarte nen Jehova so pangibasiyan na pandeside ed no antoy nagawa ed kada indibidual legan na Agew na Panangukom.

4. Anto so kabaliksan na “binmatik so dalin tan say tawen”?

⁴ Panon a “binmatik so dalin tan say tawen”? Saya met lanlamang imay tawen a binmatik odino tinmaynan a singa sakey a lukot diad inkilukas na komanem a selyo—saray manuuley a makapanyarin katooan a “niatol ya onkana ed apoy ed agew na panangukom, tan dia ed kaderal na saray mangaruksan totoo.” (Apocalipsis 6:14; 2 Pedro 3:7) Say dalin et say organisadon sistema na bengabengatla ya onkukurang ed silong na sayan pananguley. (Apocalipsis 8:7) Say kaderal na atap ya ayep tan saray arari ed dalin tan saray armada ra, a pati saramay walaan na tanda na atap ya ayep tan saramay mandadayew ed talintao to, so tutukoyen ya ibatik na sayan tawen tan dalin. (Apocalipsis 19:19-21) Lapud say panangukom ed dalin tan tawen nen Satanas et agawa la, angigana lamet na sananey ya Agew na Panangukom so Baleg ya Ukom.

Say Sanlibon Taon ya Agew na Panangukom

5. Kayarin onlabas so daan a dalin tan daan a tawen, sioparay natilak a naukom?

⁵ Sioparay natilak a naukom kayarin binmatik odino linmabas so daan a dalin tan daan a tawen? Aliwan saray alanaan a nakdaan na 144,000, ta saraya so naukom tan atatakan la. No wala niray alanaan a mabilay ed dalin kayari na Armagedon, agmanbayag et ompatey ira tan awaten da so mangatatawen a tumang da panamegley na kioli. (1 Pedro 4:17; Apocalipsis 7:2-4) Balet, say minilyon a baleg ya ulop ya akapaway la natan ed baleg a kairapan so sankanengneng ya akaalagey ed “arap na trono.” Sikara so nibilang la a matunong parad kililiktar lapud pananisia ra ed nipaagus a dala nen Jesus, balet ta say panangukom ed sikara so nepeg a mantultuloy ed loob na sanlibon taon legan a mantultuloy ya ipaarap ira nen Jesus ed “saray subol na danum na bilay.” Insan, diad kipawil da ed inkayadyari bilang too tan kayari na kasubok da, sikara lay niyabawag a matunong ed sigpot a pantalos. (Apocalipsis 7:9, 10, 14, 17) Saray ananak a makaliktar ed baleg a kairapan tan siopaman ya iyanak na baleg ya ulop legan na Milenyo so nakaukolan met a naukom legan na sanlibon taon.—Ikompara so Genesis 1:28; 9:7; 1 Corinto 7:14.

6. (a) Anton baleg a grupo so anengneng nen Juan, tan anto so tutukoyen na saray salitan “ankekelag tan angkakabaleg”? (b) Panon so seguradon pamaoli ed saray agnabilang a minilmilyon ed pakanodnonotan na Dios?

⁶ Anggaman ontan, naimano nen Juan so sakey a baleg a grupo a mas dakel ni ya aminpigapiga nen saramay akaliktar a baleg ya ulop. Manbilang iya na nilibon minilmilyon! “Tan anengneng ko so saray inaatey, ankekelag tan angkakabaleg, a wala ra ed arap na trono; tan saray libro nibuskag ira.” (Apocalipsis 20:12a) Kabiangan ed “ankekelag tan angkakabaleg” iray prominente tan agtanto prominentin katooan a nambilay tan inatey ed sayan dalin legan na apalabas ya 6,000 a taon. Diad Ebanghelyon insulat nen Juan kayari na Apocalipsis, oniay inkuan nen Jesus nipaakar ed Ama: “Sikato [si Jesus] so inikdan to na pakauley a mangukom, lapud sikato so Anak na too. Agkayo mankelaw ed saya, ta onsabi oras, ya amin so saray wala ed saray [“pakanodnonotan a,” NW] lubok narengel da so boses to, et ompaway ira.” (Juan 5:27-29) Agaylan makapakelkelaw a proyekto—kasunian iya na amin ya ipapatey tan panangiponpon ya agawa ed interon awaran! Segurado a saramay agnabilang a minilmilyon ed pakanodnonotan na Dios so aliwan pinsanan a paolien ta pian say baleg ya ulop—a daiset a tuloy no ikompara ed saratan a napaoli—so makayarin mangasikaso ed saray probleman nayarin onlesa lapud, diad primero, nayarin tendensia na saray apaoli a tumboken so datin estilo na kabibilay da, tekep na saray minumundon kaleteyan tan awawey na satan.

Siopara so Napaoli tan Naukom?

7, 8. (a) Anton libro so buskagen, tan anto so nagawa kayari na satan? (b) Siopara so agnapaoli?

⁷ Inyarum nen Juan: “Tan sananey a libro so nibuskag, a sikato so libro na bilay: tan naukom so saray inaatey unong ed saray bengatla a wala a nisulat ed saray libro, unong ed saray gawa ra. Tan say dayat initer to so inaatey a wala ed sikato; tan say patey tan say Hades initer da so inaatey a wala ed sikara: tan agawa so impangukom ed balang sakey unong ed saray gawa to.” (Apocalipsis 20:12b, 13) Peteg a makapakelkelaw a nenengnengen itan! ‘Say dayat, patey, tan Hades’ so walaan na indibidual a betang, balet imanoen a sarayan termino et agmandudumaan ed kabaliksan.a Si Jonas, sanen walad dalem na eges na sira tan sirin et walad dalem na dayat, et tinukoy toy inkasikato bilang walad Sheol, odino Hades. (Jonas 2:2) No say sakey a too et walad gemgem na Adamikon-patey, no ontan et maseguron sikatoy wala met ed Hades. Sarayan mapropetikon salita so mabiskeg a mangipapaseguro ya anggapoy siopaman ya agnaimano.

⁸ Siempre, wala met iray agnapaoli ya ag-amta so bilang da. Kaiba ed saraya iray agnagbabawin eskriba tan Fariseo ya angipulisay ed si Jesus tan ed saray apostol, say relihyoson “too na kasalanan,” tan saray alanaan a Kristiano a “sinmian.” (2 Tesalonica 2:3; Hebreos 6:4-6; Mateo 23:29-33) Tinukoy met nen Jesus iray kinmanding a totoo diad anggaan na mundo a mamaarap ed “andi-anggaan ya apoy a sikato so imparaan ed Diablo tan saray angheles to,” salanti, “andi-anggaan a kapegpeg.” (Mateo 25:41, 46, NW) Anggapoy kioli na saraya!

9. Panon ya impabitar nen apostol Pablo ya arum so nagkalautlan napaboran ed kioli, tan siopara so kaiba ed saraya?

⁹ Diad biek a dapag, arum so nagkalautlan napaboran ed kioli. Impabitar nen apostol Pablo iya sanen inkuanto: “Wala so ilalok ed Dios . . . a wala naani kioli ed bilay na saray matunong tan agmatunong.” (Gawa 24:15) No nipaakar ed mangaraldalin a kioli, “saray matunong” so mangisakop ed matoor a lalaki tan bibii nensaman—si Abraham, Rahab, tan dakel ni—a niyabawag a matunong bilang kakaaro na Dios. (Santiago 2:21, 23, 25) Kaiba met ed sayan grupo iramay matunong ya arum a karnero ya inaatey a matoor ed si Jehova ed modernon panaon. Maseguro, amin na saratan a manamasiansia na katooran so napaoli ed banda’d gapo na Milenyon Uley nen Jesus. (Job 14:13-15; 27:5; Daniel 12:13; Hebreos 11:35, 39, 40) Seguradon dakel ed sarayan apaolin matunong so napabtangan na saray nikaduman pribilehyo diad pangasikaso ed baleg a kimey nipaakar ed pangipawil ed Paraiso.—Salmo 45:16; ikompara so Isaias 32:1, 16-18; 61:5; 65:21-23.

10. Diad saramay napaoli, siopara so “agmatunong”?

¹⁰ Balet, siopa iramay “agmatunong” ya asaglawi ed Gawa 24:15? Saraya so mangisakop ed baleg a kabiangan na katooan ya inatey ed interon awaran, nagkalautla ed saramay nambilay ed ‘panaon na andi-pikakabat.’ (Gawa 17:30) Lapud pasen a nianakan na saraya odino panaon na impanbilay da, andian ira na pankanawnawa a naaralan so katutulok ed linawa nen Jehova. Kaaruman ni, nayarin walaray akadngel ed mensahe na kisalba balet ta agkinmiwas a sigpot ed saman a panaon odino inatey antis a sikaray inmaligwas ed dedikasyon tan bautismo. Diad kioli, saratan so nepeg a manggawa na kaaruman a pananguman ed panagnonot tan kabibilay da no labay dan nagunggonaan ira ed sayan pankanawnawa a pakagamor na andi-anggaan a bilay.

Say Libro na Bilay

11. (a) Anto so “libro na bilay,” tan siopan kangaranan so nisulat ed sayan libro? (b) Akin a say libro na bilay so nalukasan legan na Sanlibon Taon ya Uley?

¹¹ Sasalitaen nen Juan so “libro na bilay.” Saya so rekord na saramay akalinya a mangawat na andi-anggaan a bilay manlapud si Jehova. Saray kangaranan na alanaan ya agagi nen Jesus, say baleg ya ulop, tan saray matoor a totoo nensaman, a singa si Moises, so nikurit ed sayan lukot odino libro. (Exodo 32:32, 33; Daniel 12:1; Apocalipsis 3:5) Anggapo ni so nisulat ed libro na bilay a kangaranan na saray “agmatunong” ya apaoli. Kanian say libro na bilay so nalukasan legan na Sanlibon Taon ya Uley pian naabuloyan so kisulat na kangaranan na saray arum ya onkualipika. Saramay say kangaranan da et agnisulat ed lukot, odino libro na bilay so “nibantak dia ed dayat ya apoy.”—Apocalipsis 20:15; ikompara so Hebreos 3:19.

12. Anto so pakadeterminaan no kasin say sakey a too et nisulat so ngaran to ed alukasan a libro na bilay, tan panon ya angipanengneng na ehemplo so aturon Ukom nen Jehova?

¹² Anto sirin so pakadeterminaan no kasin say sakey et nisulat so ngaran to ed alukasan a libro na bilay ed satan a panaon? Say manunan basiyan so mipara met ed samay panaon nen Adan tan Eva: say katutulok ed si Jehova. Unong ya insulat nen apostol Juan ed pinabpabli iran kaparan Kristiano: “Say mundo mangangga, tan saray penel to: sabalet so mangunor ed linawa na Dios onsiansia lawas.” (1 Juan 2:4-7, 17) Diad pamaakaran na katutulok, angipanengneng na ehemplo so aturon Ukom nen Jehova: “Anggan [si Jesus] so Anak, inaral to so katutulok lapu ed saray bengatlan intepel to; tan sanen agawa ya ayadyari, nagmaliw a sikato so nanggawa na andi-anggaan a kilalaban ed saray amin ya ontulok ed sikato.”—Hebreos 5:8, 9.

Pangilukas ed Arum Iran Libro

13. Panon so nepeg a pangipatnag na saray apaoli ed katutulok da, tan antoran prinsipyo so nepeg dan tumboken?

¹³ Panon so nepeg a pangipatnag na sarayan apaoli ed katutulok da? Impabitar nen Jesus a mismo iray duaran manunan ganggan, a kuanto: “Say manunaan sikato’ya, Dengel mo, O Israel; say Katawan [“Jehova,” NW] a Dios tayo, say Katawan saksakey. Et sika aroen mo so Katawan a Dios mo ed amin a pusom, tan ed amin a kamarerwam, tan ed amin a nonot mo, tan ed amin a biskeg mo. Say komadua sikato’ya, Aroen mo so kaparam a too a singa sika lanlamang.” (Marcos 12:29-31) Wadtan met iray niletneg lan maong a prinsipyos a nepeg dan tumboken, a singa say pangiwaklit ed panagtakew, panagtila, panagpatey, tan imoralidad.—1 Timoteo 1:8-11; Apocalipsis 21:8.

14. Anto niran libro so nalukasan, tan anto so lugan na saraya?

¹⁴ Anggaman ontan, kapkapansalambit labat nen Juan ed arum niran libro a nalukasan legan na Milenyon Uley. (Apocalipsis 20:12) Anto iraya? Panapanaon, mangiiter si Jehova na espisipiko iran bilin parad partikular iran situasyon. Alimbawa, diad panaon nen Moises et Sikatoy angiter na detalyado iran serye na saray ganggan a mankabaliksan na bilay parad saray Israelita no ontulok ira. (Deuteronomio 4:40; 32:45-47) Legan na inmunan siglo, niiter iray balon bilin pian tulongan iray matoor a manumbok ed saray prinsipyo nen Jehova ed silong na Kristianon sistema na bengabengatla. (Mateo 28:19, 20; Juan 13:34; 15:9, 10) Irereport natan nen Juan a saray inaatey et ‘naukom unong ed saray bengatla a wala a nisulat ed saray libro, unong ed saray gawa ra.’ Mapatnag sirin a say pangilukas ed sarayan libro et mangipalapag ed detalyado iran kakaukolanen nen Jehova parad katooan legan na sanlibon taon. No iyaplika ra ed bilay da iray totontonen tan ganggan ed saraman a libro, nagamoran na saray matulok a totoo so andukey a bilay, a diad kaunoran et nadampot da so andi-anggaan a bilay.

15. Anton klase na panangibangat a kampanya so nakaukolan legan na kioli, tan panon so maseguron kagawa na kioli?

¹⁵ Agaylan nakaukolan so malaknab a kampanya na teokratikon edukasyon! Nen 2005, saray Tasi nen Jehova ed sankamundoan so mangikokondukta, ed promedyo, na 6,061,534 iran panangiyaral na Biblia ed nanduruman lugar. Balet kaleganan na kioli, seguradon ikonduktaan na panangiyaral iray agnabilang a minilmilyon, base ed Biblia tan balo iran libro! Amin a totoo na Dios so nakakaukolan a magmaliw a managbangat tan pampelengan da itan. Legan na iyaaligwas na sarayan apaoli, seguradon mibiang iraya ed sayan malaknab a programa na panagbangat. Maseguro a say kioli so nagawa ed paraan a saramay mabilay so makapanggayaga ed pangabrasa tan pangibangat ed dati iran kapamilyaan tan kabkabat da, tan, saratan met, so mangabrasa tan mangibangat ed saray arum ni. (Ikompara so 1 Corinto 15:19-28, 58.) Say masulok ya anemiran milyon a Tasi nen Jehova ya aktibo ed panangilaknab na katuaan natan so mangileletneg na maabig a pundasyon parad saray pribilehyon iilaloan da legan na kioli.—Isaias 50:4; 54:13.

16. (a) Sioparan kangaranan so agnisulat ed lukot, odino libro na bilay? (b) Siopa iramay say kioli ra et napaneknekan a para “ed bilay”?

¹⁶ No nipaakar ed mangaraldalin a kioli, inkuan nen Jesus a “saray nanggawa na maong, nipaakar ed kioli ed bilay, bang saray nanggawa na mauges, dia met ed kioli ed bilay ed kaukom.” Say “bilay” tan “kaukom” dia et mansumlangan, a mangipapabitar a saramay apaolin “nanggawa na mauges,” kayari iran imbangat ed apuyanan a Kasulatan tan saray libro, so naukom ya agmakanepegan a mangawat na bilay. Saray kangaranan da so agnisulat ed lukot, odino libro na bilay. (Juan 5:29) Onia met so nagawa ed siopaman a datin manutumbok ed matoor a kurang balet, diad antokaman a rason, et kinmasipa legan na Sanlibon Taon ya Uley. Nayarin nabural so kangaranan. (Exodo 32:32, 33) Diad biek a dapag, saramay matulok ya ontumbok ed saray bengatlan nisulat ed saray libro et mansiansian nisulat so kangaranan da ed rekord, say libro na bilay, tan mantultuloy a manbilay. Parad sikara, say kioli so napaneknekan a para “ed bilay.”

Panampot na Patey tan Hades

17. (a) Anton alay abig a nagawa so dedeskribien nen Juan? (b) Kapigan nabakantian so Hades? (c) Kapigan a say Adamikon ipapatey so “nibantak dia ed dayat ya apoy”?

¹⁷ Ontumbok et dedeskribien nen Juan so bengatlan peteg ya alay abig! “Tan say patey tan say Hades nibantak ira ed dayat ya apoy. Saya sikato so ipapatey a komadua, a salanti dayat ya apoy. Tan say ag-aromog a nisulat ed libro na bilay, nibantak dia ed dayat ya apoy.” (Apocalipsis 20:14, 15) Diad kasampotan na milenyon Agew na Panangukom, “say patey tan say Hades” so sigpot lan naandi. Akin a mankaukolan ni iya na sanlibon taon? Say Hades, bilang kaslakan a lubok na amin a totoo, so nabakantian la sano napaoli so unor a too a walad pakanodnonotan na Dios. Balet anggad wala ni epekto na atawir na totoo a kasalanan, wala nin siansia ed sikara so Adamikon ipapatey. Amin na saramay napaoli ed dalin, ontan met ed baleg ya ulop a makaliktar ed Armagedon, so kaukolan ya ontulok ed nisulat ed saray libro anggad sigpot lan niyaplika so kana na dondon nen Jesus diad pangekal ed sakit, itatakken, tan arum ni ran atawir a kaleteyan. Insan say Adamikon ipapatey, pati say Hades, so “nibantak dia ed dayat ya apoy.” Saraya so naandi la ed ando lan ando!

18. (a) Panon a deneskribe nen apostol Pablo so intalona na uley nen Jesus bilang Ari? (b) Anto so gawaen nen Jesus ed perpekto lan pamilya na too? (c) Anto niran bengabengatla so nagawa diad sampot na sanlibon taon?

¹⁸ Diad ontan et sigpot lan nasumpal so programa a dedeskribien nen apostol Pablo ed sulat to ed saray taga-Corinto: “Ta [si Jesus] so nakaukolan a manari, angga ed pakapangiyan to’d saray kabusol to ed silong na saray sali to. Say kaunoran a kabusol a naekal naani say [Adamikon] patey.” Anto so ontumbok a nagawa? “Sano ami ganagana impauleyan la ra ed sikato, sirin say Anak met a dili pauleyan ed [samay Sakey ya] anguley ed ami’ ganagana.” Diad arum a panangibaga, “ipalima nen Jesus so panarian ed Dios tan Ama to.” (1 Corinto 15:24-28) On, si Jesus, ya anaeg la ed Adamikon ipapatey diad panamegley na kana na dondon bagat to, so mangipalima ed perpekto lan pamilya na too ed Ama to, si Jehova. Mabitar a diad saya lan panaon, a kasampotan na sanlibon taon, a si Satanas so nibulos tan nagawa so unor a subok pian nadetermina no sioparan kangaranan so mansiansian permanente a nisulat ed libro na bilay. “Pampilitan yo so onloob” ta pian nilaktip met so ngaran yo!—Lucas 13:24; Apocalipsis 20:5.

[Paimano ed leksab]

[Litrato ed pahina 298]

Nayarin nisulat ed libro na bilay so kangaranan na saray pinaolin “agmatunong” ya ontulok ed saray alukasan a libro legan na Sanlibon Taon ya Uley