Parte 2

Sakey a Dalin a Bulos Manlapud Kairapan

1, 2. Anton nanduruman panmoria na dakel?

ANGGAMAN ontan, nilaksalaksan totoo ed sankamundoan so walaan na duman tuloy a panmoria. Iilaloan da so marakep ya arapen parad katooan. Ikuan dan wala so mundon sigpot a bulos manlapud karelmengan tan kairapan dia a mismo ed ­dalin. Matalek ira a say mauges et asingger lan naekal tan sakey ya interamentin balon mundo so niletneg. Ikuan da ni ingen a say pundasyon na sayan balon mundo so nileletneg la natan!

² Sisiaen na sarayan totoo a say balon mundo so bulos manlapud bakal, inkaruksa, krimen, ag-inkahustisya, tan inkaduka. Magmaliw itan a mundon andian na sakit, ermen, lua, tan anggan patey. Diad atan a panaon et ombulaslas iray totoo ed inkayadyari tan manbilay ya ando lan ando ed liket ed sakey a mangaraldalin a paraiso. Siempre, saraman so inatey so napaoli ni ingen tan nawalaan na pankanawnawan manbilay na ando lan ando!

3, 4. Akin a saratan a totoo so manliknan matalek nipaakar ed panmoria ra?

³ Kasin sayan panmoria ed arapen so sakey a kugip lambengat, a maniilalo ed bengatlan ag­nadampot? Andi, aliwan ontan. Atan so nilet­neg ed masekder a nibasen pananisia a sayan onsasabin Paraiso so asingsingger la. (Hebreos 11:1) Akin ya ontanlan segurado ra? Lapud say makapanyarin-amin a Manamalsa na talba so angisipan ed atan.

⁴ Nipaakar ed saray sipan na Dios, ikuan na Biblia: “Anggapo so sakey a bengatlan sinmaew ed amin a maong a bengabengatlan sinalita ed sikayo nen Jehova a Dios yo. Sikara so agawa ya amin ed sikayo. Anggapo so sakey a bengatlan sinmaew ed sikara.” “Say Dios so aliwan sakey a too a mantila . . . Agta imbaga ton mismo tan agto ta gawaen, tan imbaga to et agto ta sumpalen?” “Angisamba si Jehova na saray ehersito, a kuanto: ‘Petepeteg unong a ninonot ko, ontan so nagawa; et unong ya insimbawak, ontan so peteg a nagawa’”​—Josue 23:14; Numeros 23:19; Isaias 14:24.

5. Antoran tepet so nakaukolan a naebatan?

⁵ Anggaman ontan, no say gagala na Dios et say pangiletneg na mangaraldalin a paraison bulos manlapud kairapan, akin ya inabuloyan to nin nagawa so mauges a bengabengatla? Akin ya inalagar to ni so anem a libon taotaon ya anggad natan pian korihien so mauges? Kasin amin na saraman a siglo na kairapan et mangipanengneng a say Dios so agpeteg a manatalima ed sikatayo, odino no ontan et andi ed kiwawala?