Parte 5

Say Makapakelaw A Regalon Kawayangan A Manpili

1, 2. Anton makapakelaw a regalo so kabiangan na inkagawa tayo?

PIAN natalosan no akin ya inabuloyan na Dios so kairapan tan no anto so gawaen to ed atan, nakaukolan tayon apresyaen no panon to itayon ginawa. Ginawa to so mas nen say impamalsa ed sikatayo a basta walaan na sakey a laman tan utek. Pinalsa to itayo met a tekep na espesyal a mental tan emosyonal iran kalidad.

² Sakey a manunan kabiangan na mental tan emosyonal ya inkagawa tayo et say kawayangan a manpili. On, impasen na Dios ed sikatayo so pakuldad na kawayangan ed panagpili. Atan so peteg a makapakelaw a regalon nanlapud sikato.

Panon So Inkagawa Tayo

3-5. Akin ya apresyaen tayo so kawayangan a manpili?

³ Kunsideraen tayo pa no panon a say kawayangan a manpili so nalalanor ed impangiyabuloy na Dios ed kairapan. Ununa, isipen pa iya: Kasin apresyaen yo so kiwala na kawayangan a pilien no anto so gawaen tan ibaga yo, no anto so kanen tan isulong yo, no anton nengneng na kimey so gawaen yo, tan no iner tan panon so panbilay yo? Odino kasin kaliktan yon wala so sakey a mangidikta ed balang isalita tan ikiwas yo ed kada panaon ed bilay yo?

⁴ Anggapo so normal a toon malabay a sigpot a nabanlongan so bilay to. Akin ya andi? Lapud paraan ya impanggawa na Dios ed sikatayo. Ibaga na Biblia ed sikatayo a pinalsa na Dios so too ed ‘indengan tan olibay’ to, tan sakey ed saray pakuldad a walan mismo ed Dios et say kawayangan ed panagpili. (Genesis 1:26; Deuteronomio 7:6) Sanen pinalsa toray totoo, inikdan tora na saman a parehon makapakelaw a pakuldad​—say regalon kawayangan a manpili. Atan so sakey a rason no akin a naromog tayon makapadismaya so pakaaripen ed manamairap iran manuley.

⁵ Kanian say pilalek parad kawayangan so aliwan aksidente, lapud say Dios so sakey a Dios na kawayangan. Ikuan na Biblia: “No iner so kawalaan na espiritu nen Jehova, diman so kawalaan na kawayangan.” (2 Corinto 3:17) Kanian, inikdan itayo na Dios na kawayangan a manpili bilang kabiangan na mismon inkagawa tayo. Lapud kabat to so dalan na ikiwas na saray kanonotan tan emosyon tayo, kabat ton magmaliw itayon sankaliketan dingan na kawayangan a manpili.

6. Panon so impamalsa na Dios ed utek tayo ya onkurang a mitunosan ed kawayangan a manpili?

⁶ Katekep na kawayangan a manpili, inikdan itayo na Dios na abilidad a manisip, manimbang ed saray bengatla, mandesisyon, tan kabaten so maptek ed mauges. (Hebreos 5:14) Sirin, say kawayangan a manpili so nepeg a nibased matudion panagpili. Ag-itayo agawa a singa andian-nonot iran robot ya andian na dilin panagpili. Nisay apalsa ­itayon onkiwas lapud nisipor a kakabatan a singa saray ayayep. Imbes, say makapakelaw ya utek tayo so dinisenyon onkurang a mitunosan ed kawayangan tayon manpili.

Say Sankaabigan a Gapo

7, 8. Anton maabig a gapo so inter na Dios ed inmunan atateng tayo?

⁷ Pian ipanengneng no panon so pangasikaso na Dios, a pati ed regalon kawayangan a manpili, say inmunan atateng tayo, si Adan tan si Eva, so inikdan na amin a bengatlan makatunongan a labayen na siopakaman. Sikara so impasen ed sakey a maawang, singa-parkin paraiso. Walaan ira na in­kadaakan ed materyal. Walaan ira na ayadyarin kanonotan tan lamalaman, ta pian ag-ira ontat­ken odino mansakit odino ompatey​—akapanbilay ira komon na ando lan ando. Awalaan ira komon na ayadyarin ananak ya awalaan met komon na maliket, andi-anggaan ya arapen. Tan say onlalaknab a populasyon so awalaan komon na ­makapnek a kimey ya agmanbayag et manggawa ed sankadalinan a sakey a paraiso.​—Genesis 1:26-30; 2:15.

⁸ Nipaakar ed nitarya, isalaysay na Biblia: “Anengneng na Dios so amin a bengatla a ginawa to et nia! maong iran tuloy.” (Genesis 1:31) Ikuan met na Biblia nipaakar ed Dios: “Ayadyari so gawa to.” (Deuteronomio 32:4) On, say Manamalsa so angiter ed atooan a pamilya na sakey ya ayadyarin gapo. Anggapo la so magmaong nen atan. Agaylan apaneknekan a sikato so manataliman Dios!

Ageteran a Kawayangan

9, 10. Akin a say kawayangan a manpili so nepeg a suston nabanlongan?

⁹ Anggaman ontan, kasin ingagala na Dios a say kawayangan a manpili so andian na saray limitasyon? Isipen pa so sakey ya okupadon syudad ya andian na saray ley ed trapiko, a ditan et amin so makapanmaneho ed dinanman a direksyon ed antokaman a peles. Kasin labay yo so manmaneho ed leksab na saratan a kipapasen? Andi, atan so baleg a gulo ed trapiko tan seguradon mansumpal ed dakel iran aksidente.

¹⁰ Ontan met ed regalo na Dios a kawaya­ngan a manpili. Say ag-ageteran a kawayangan so mankabaliksan na baleg a gulo ed sosyedad. Kaukolan a walaray ganggan a mangiwanwan ed saray kimey na too. Ikuan na Salita na Dios: “Manugalin singa bulos a totoo, tan agyon balot uusaren so kawayangan yo bilang baraan parad kaugsan.” (1 Pedro 2:16, JB) Labay na Dios a say kawayangan a manpili et nabanlongan parad kaslakan a pankaabigan. Ingagala ton nawalaan tayo, na aliwan sigpot a kawayangan, noagta relatibon kawayangan, a pauleyan ed uley na ganggan.

Siopa so Akanganggan?

11. Siopa so akanganggan ed akadesinyoan tayon tuloken?

¹¹ Siopa so akanganggan ed akadisenyoan tayon tuloken? Ikuan na sananey a kabiangan na teksto ed 1 Pedro 2:16  (JB): “Sikayoray ariripen lambengat na say Dios.” Agkabaliksan na saya so makapairap a panangaripen, balet, imbes, kabaliksan na atan a sikatayo so adisenyon magmaliw a sankaliketan sano pauleyan ed saray ganggan na Dios. (Mateo 22:35-40) Saray ganggan to, a nagkalalo nen dinanman iran ganggan a ginawa na katooan, so mangitarok na sankaabigan a giya. “Siak, si Jehova, a Dios mo, say Sakey ya angibangat ed sika ed kagunggunaan mo, say Sakey ya angitonton ed sika ed dalan a nepeg mon laen.”​—Isaias 48:17.

12. Anton kawayangan ed panagpili so wala ed sikatayo ed loob na saray ganggan na Dios?

¹² Ontan met, mangiyabuloy iray ganggan na Dios parad baleg a kawayangan a panagpili ed loob na saray ketegan da. Mansumpal iya ed pandurumaan tan manggawa ed atooan a pamilyan makapalikliket. Isipen pa iray nanduruman nengneng na tagano, kawesen, musika, arte, tan ­saray ayaman ed sankamundoan. Maseguron labayen tayo so manpili ed ontan iran pamaakaran imbes a say arum so mandeside parad sikatayo.

13. Anton pisikal iran ganggan so nepeg tayon tuloken parad dilin pankaabiganan tayo?

¹³ Kanian sikatayo so apalsa pian magmaliw a sankaliketan sano pauleyan ed saray ganggan na Dios ed kiwas na too. Mipadpara itan ed pagmaliw a pauleyan ed pisikal iran ganggan na Dios. Alimbawa, no ipulisay tayo so ganggan na grabidad (gravity) tan ontaboy manlapud atagey a pasen, sikatayo so nasugatan odino ompatey. No ibaliwala tayo so akindalem iran ganggan na laman tayo tan ontundan mangan na tagano, oninum na danum, odino manlinawa na dagem, sikatayo so ompatey.

14. Panon tayon amta a saray totoo so ag-apalsa pian magmaliw ya independente manlapud Dios.?

¹⁴ Unong a sikatayo so peteg ya apalsan walaan na pankaukolan a manpasakup ed pisikal iran ganggan na Dios, sikatayo so apalsa tekep na pankaukolan a manpasakup ed moral tan sosyal iran ganggan na Dios. (Mateo 4:4) Agpinalsa iray totoo a nisian ed Managgawa ra tan ontalona. Ikuan na say propeta a si Jeremias: “Anggapo ed too so panakar a mangitonton ed saray kurang to. Korihien moak, O Jehova.” (Jeremias 10:23, 24) Kanian diad amin a pamaakaran saray totoo so pinalsa pian manbilay ed leksab na uley na Dios, ya aliwan diad inkasikaran dili.

15. Kasin saray ganggan na Dios so makapabelat ed si Adan tan si Eva?

¹⁵ Say katutulok ed saray ganggan na Dios so agmakapabelat komon parad inmunan atateng tayo. Imbes, atan komon so onkana ed pankaabigan da tan ed interon atooan a pamilya. No komon ta say inmunan sanasawa so nansiansia ed geter na saray ganggan na Dios, amin komon so maabig. Diad tua, sikatayo komon natan so manbibilay ed makapakelaw a paraiso na liket bilang sakey a maaro, nankakasakey ya atooan a pamilya! Anggapo komon so karelmengan, kairapan, tan patey.

[Litrato ed pahina 11]

Say Manamalsa so angiter ed katooan na ayadyarin gapo

[Litrato ed pahina 12]

Kasin labay yo so manmaneho ed trapiko no anggapo so leyes ed trapiko?