Parte 10
Say Makapakelaw A Balon Mundon Gawa Na Dios
1, 2. Anto so nagawa kayari na managlinis a bakal na Armagedon?
KAYARI na managlinis a bakal na Dios ya Armagedon, anto so onsublay? Insan sakey a maglorian balon panaon so onggapo. Saray akaliktar ed Armagedon, ya apaneknekan la so katooran da ed uley na Dios, so nipaarap ed balon mundo. Agaylan makapaliket a balon peryodo na awaran so pagmaliwan na atan legan ya onagus so makapakelaw iran gungguna na Dios ed atooan a pamilya!
2 Diad leksab na panangiwanwan na Panarian na Dios, gapoan na saray akaliktar a tibukelen so sakey a paraiso. Saray enerhya ra so nitalaga ed andi-siblet iran gegemtan a mangungguna ed amin a manbibilay ditan. Onggapon magmaliw so dalin a sakey a marakep, mareen, makapenek ya ayaman parad katooan.
Onsalat so Inkatunong ed Karelmengan
3. Anton tampol a pakainawaan so nalikna kayarin tuloy na Armagedon?
3 Posiblin amin iya diad kaderal na mundo nen Satanas. Anggapo la so manangapag iran palson relihyon, sosyal iran sistema, odino gobgobierno. Anggapo la so satanikon propaganda a mamalikdo ed totoo; amin na saray ahensya a mamapawala ed atan so onlereg a kaiba na sistema nen Satanas. Isipen pa: say interon makasamal ya atmospera na mundo nen Satanas so naekal! Agaylan pakainawaan itan!
4. Deskribien so nagawan pansalat ed panagbangat.
4 Insan say makaderal iran ideya na uley na too so nasalatan na makapaalagey a bangat a manlalapud Dios. “Amin na saray ilalak mo so totoon binangatan nen Jehova.” (Isaias 54:13) Tekep na sayan mabunigas a bilin a tinaon, “say dalin so peteg a napano naani na pikakabat ed si Jehova a singa saray danum sakbongan da so dayat.” (Isaias 11:9) Agla aralen na totoo so mauges, noagta “saray manaayam ed mabungan dalin so manaral na inkatunong.” (Isaias 26:9) Niyugali laray makapaalagey iran kaisipan tan kiwas.—Gawa 17:31; Filipos 4:8.
5. Anto so nagawa ed amin a karelmengan tan marelmeng a totoo?
5 Kanian, anggapo la so panagpatey, karawalan, panagpasoot, panagtakew, odino dinanman ya arum a krimen. Anggapo la so manirap lapud mauges iran gawa na saray arum. Ikuan na Uliran 10:30: “Say matunong anggan kapigan agnatenyeg; balet say marelmeng, agmanayam dia ed dalin.”
Nipawil so Ayadyarin Bunigas
6, 7. (a) Anton mairap ya akoen a katuaan so panganggaen na uley na Panarian? (b) Panon so impangidemostra nen Jesus ed saya legan a wadia ed dalin?
6 Diad balon mundo, wala so pangangga na amin a mauges iran epekto na orihinal ya impanrebelde. Alimbawa, say uley na Panarian so mangekal na sakit tan itatatken. Natan, anggan pangayagaan yo so maabig a bunigas, say mairap ya akoen a katuaan a no ontatatken kayo et onmumuragas iray mata yo, nabubulok iray ngipen yo, onkakapuy so pakadngel yo, onkokomanet iray baog yo, onleletey so akindalem iran organo yo, anggad diad kaunoran et ompatey kayo.
7 Anggaman ontan, saraman a makapagonigon iran epekto ya atawir tayo ed inmunan atateng tayo so agmanbayag et apalabas lan bengatla. Kasin nanonotan yo so indemostra nen Jesus nipaakar ed bunigas legan a sikato so walad dalin? Isasalaysay na Biblia: “Sinmingger ed sikato so baleg ya ulop, a sankaawit daray totoon piley, sikwel, bulag, umel, tan dakel nin arum, tan inggaton da ra ed saliyan to, tan pinaabig to ra; et ontanlan nikelawan so ulop sanen anengneng dan say umel so mansasalita tan say piley so manaakar tan say bulag so makakanengneng.”—Mateo 15:30, 31.
8, 9. Deskribien so liket ya onsabi ed balon mundo sano nipawil so ayadyarin bunigas.
8 Agaylan baleg a liket so onsabi ed say balon mundo unong a naekal ya amin iray beblay tayo! Say kairapan a nansumpalan na makapuy a bunigas so aglan balot mamairap ed sikatayo. “Anggapo la so manaayam a mangikuan: ‘Siak so mansasakit.’” “Diad atan saray mata na bulag so nilukas, tan saray mismon layag na telek so nibuang. Tan diad atan say lupoy so onkalab a singa usa, tan say dila na umel so mankelyaw ed gayaga.”—Isaias 33:24; 35:5, 6.
9 Agta makapaliket so ibangon a kinabuasan tan liknaen a pangayagaan yo la natan so bunigas? Agta makapagayaga ed matatken a totoo so pakaamta a sikara so walan nipawil ed sigpot a biskeg na inkaugaw tan nadampot so inkayadyarin datin nangayagaan nen Adan tan si Eva? Isisipan na Biblia: “Say laman to sikato naani tadtariwa nen say laman na ugaw; sikato ompawil ed saray agew na kaugawan to.” (Job 33:25) Agaylan liket so pangibantak na saramay antepara, katulongan ed idengel, saklay, wheelchairs, tan saray tambal! Aglan balot nakaukolan iray ospital, doktor, tan dentista.
10. Anto so nagawa ed patey?
10 Saray totoon mangayaga ed ontan ya inkabunigas et agmalabay ya ompatey. Tan agnagawa ed sikara, ta say katooan so andi-la ed panamenben na atawir ya ag-inkayadyari tan ipapatey. Si Kristo so “nepeg a manuley a bilang ari ya anggad pangipasen na Dios ed amin a kakabusol to diad leksab na sali-sali to. Unong a say unor a kabusol, say patey so naandi.” “Say regalon iter na Dios so andi-anggaan a bilay.”—1 Corinto 15:25, 26; Roma 6:23; nengnengen met so Isaias 25:8.
11. Panon so panegek na Apocalipsis ed saray gungguna ed balon mundo?
11 Diad panegek ed amin iray gungguna ya onagus a manlapud manataliman Dios ed atooan a pamilya diad Paraiso, say kaunoran a libro na Biblia kuanto: “Tan punasen to [say Dios] so amin a lua ed kamataan da, tan anggapo la so patey, nisay pannangis nisay pandageyem nisay ot-ot. Saray gendat a bengatla so naandi la.”—Apocalipsis 21:3, 4.
Onoli Iray Inaatey
12. Panon ya indemostra nen Jesus so inter-Dios a pakayari ton mamaoli?
12 Ginawa nen Jesus so nagkalalo nen say impanpaabig ed sakit tan impantambal ed lupoy. Pinaoli to met iray totoo ed lubok. Sirin indemostra to so makapakelaw a pakayari na kioli ya inter na Dios ed sikato. Kasin nanonotan yo sanen aminsan et si Jesus so linma ed abung na sakey a lakin inatey so marikit to? Inkuan nen Jesus ed inatey ya ugaw a bii: “Ugaw a bii, bangon ka!” Diad anton resulta? “Tampol a binmangon so ugaw a bii tan ginmapon nanakar.” Diad impakanengneng ed atan, saray totoo diman “so atalagnaw a tuloy ed inkasikaran dili.” Agda nasabaan so liket da!—Marcos 5:41, 42; nengnengen met so Lucas 7:11-16; Juan 11:1-45.
13. Antoran nengneng na totoo so napaoli?
13 Diad balon mundo, “wala so kioli na matunong tan say agmatunong.” (Gawa 24:15) Diad atan a panaon usaren nen Jesus so inter-Dios a pakayari to a mamaoli ed inatey lapud, unong ya inkuanto, “Siak so say kiolian tan say bilay. Siopaman a mangagamil na pananisia ed siak, anggaman sikato so ompatey, so ombilay.” (Juan 11:25) Inkuanto met: “Amin na saraman so wala ed pakanodnonotan a lubok [diad pakanodnonotan na Dios] so makadngel na boses to [nen Jesus] tan ompaway ira.”—Juan 5:28, 29.
14. Lapud naandi la so patey, antoran bengatla so naekal?
14 Baleg so gayaga ed sankadalinan sano mantutumbokan a grupo na saray inatey so napaoli ed bilay pian miulop ed saray inadaro ra! Anggapo laray niimprinta ed dyaryon pakabat na inaatey a mangitarok na ermen ed saray niliktar. Imbes, say kasuniyan na atan: saray pakabat na balobalo niran apaoli a mangitarok na gayaga ed saraman so inadaro ra. Kanian anggapo laray punerarya, puneraryan panag-ornoan, panagpoolan ed bangkay, odino sementeryo!
Sakey a Tuan Mareen a Mundo
15. Panon a nadampot so propesiya nen Miqueas ed sankagnapan a pantalos?
15 Say tuan kareenan ed amin a paspasen na bilay so nadampot. Saray bakal, manangiyalibansa na bakabakal, tan saray pagawaan na ayura et bengatla ed apalabas. Akin? Lapud say manangapag ed nasyonal, inka-tribu, tan rasyal iran interes so naandi. Insan, diad sankagnapan a pantalos, “agda iyayag naani so kampilan, a sumpa ed sananey a nasyon, tan ag-ira met la naani manaral na bakal.”—Miqueas 4:3.
16. Panon so gawaen na Dios pian magmaliw ya imposibli so bakabakal?
16 Ompatnag a makapakelaw iya nisesengeg ed napgaan-ed-dala ya awaran na too ed maparanay a bakal. Balet agawa itan lapud say katooan so walad leksab na uley na too tan demonyo. Diad balon mundo, diad leksab na uley na Panarian, saya so nagawa: “Galidia, sikayon totoo, nengnengen yoray kimey nen Jehova . . . Patundaen to so bakabakal anggad kasampotan na dalin. Balbalen to so bekang tan puteren to so gayang; saray carusa [na bakal] so poolen to ed apuy.”—Salmo 46:8, 9.
17, 18. Diad balon mundo, anton siglaotan so niwala ed baetan na too tan ayayep?
17 Say too tan ayep so niwala met ed kareenan, a singa diad Eden. (Genesis 1:28; 2:19) Ikuan na Dios: “Et diad atan ya agew migawaan ak na sipan ed sikara nipaakar ed atap ya ayayep ed uma tan ed mantekkiab iran pinalsa ed katawenan tan ed korongkorong a bengatla ed dalin, tan . . . padokolen ko ra naani a maligeligen.”—Hosea 2:18.
18 Panon kalaknab so pagmaliwan na atan a kareenan? “Say lobo miayam naani ed kordero, tan say leopardo so miakdol ed kilaw na kanding, tan say kilaw na baka tan kilaw na leon tan say pinataban ayep so mantitipon iran amin; tan sakey a melag ya ugaw so mangitonton ed sikara.” Aglan balot magmaliw iray ayep a katakotan na too odino ed inkasikara. Anggan “say leon so mangan naani na dayami a singa say baka”!—Isaias 11:6-9; 65:25.
Magmaliw a Paraiso so Dalin
19. Magmaliw so dalin ya anto?
19 Say interon dalin so magmaliw a paraison ayaman parad katooan. Atan no akin a nayarian ya isipan nen Jesus ed too ya anisia ed sikato: “Wala ka naani ed siak diad Paraiso.” Ikuan na Biblia: “Say kalawakan tan say amagan dalin mangayaga ra, tan say kabueran a lawak manliket naani tan manbolaklak a singa sapron. . . . Ta dia ed kalawakan ombositsit iray danum, tan saray subol ed kabueran a lawak.”—Lucas 23:43; Isaias 35:1, 6.
20. Akin a say eras so aglan balot mamairap ed katooan?
20 Diad leksab na Panarian na Dios, aglan balot mamairap so eras ed nilaksalaksa. “Wala naani so daakan ya ilik ed dalin; diad toktok na saray palandey wala so panlepleppua.” “Et say kiew ed uma mamapaway na bunga to, tan say dalin mangiter na munat to, et maligeligen ira naani ed dalin da.”—Salmo 72:16; Ezequiel 34:27.
21. Anto so nagawa ed inkaandi-ayaman, eskuater, tan mauges iran kakaabay?
21 Anggapo la naani so inkaduka, totoon andian na ayaman, eskuater, odino kakaabay a nilaknapan na krimen. “Mangipaalagey ira naani na kaabungan tan panayaman da; tan peteg a sikara so mantanem naani na saray ubasan tan kanen da so bunga ra. Tan agla ra manpaalagey tan sananey so manayam; ag-ira mantanem tan sananey so mangan.” “Onyurong ira, balang sakey ed silong na kiew to ya ubas tan ed silong na kiew to a higos, tan anggapo naani manaktakot ed sikara.”—Isaias 65:21, 22. Miqueas 4:4.
22. Panon so paneskribe na Biblia ed saray bendisyon na uley na Dios?
22 Nabendisyonan iray totoo na sarayan amin a bengatla, tan nagkalalo ni, diad Paraiso. Ikuan na Salmo 145:16: “Lukasan mo [Dios] so limam tan peneken mo so pilalek na amin a bengatlan mabilay.” Agpankelawan ya iyabawag na propesiya na Biblia: “Saray mauyamo a mismo so mangayarian na dalin, tan manliket ira a dili ed inkadaakan na kareenan. . . . Saray matunong a mismo so mangayarian na dalin, tan sikara so manayam ed tapew to diad ando lan ando.”—Salmo 37:11, 29.
Pangekal ed Apalabas
23. Panon ya ekalen na Panarian na Dios so amin a kairapan a naeksperiensia tayo?
23 Say uley na Panarian na Dios so mangekal ed amin a deral ya agawa ed atooan a pamilya ed apalabas lan anemiran libon taon. Saray gayaga ed atan a panaon et palumbasan to so dinanman a kairapan a naeksperiensia na totoo. Say bilay so agnasigensigen na antokaman a mauges a pakanodnonotan ed apalabas a kairapan. Saray makapaalagey a kaisipan tan kimey a magmaliw ya inagew-agew a kabibilay na totoo so sankankaninot a mangekal ed makapaot-ot iran pakanodnonotan.
24, 25. (a) Anto so impasakbay nen Isaias a nagawa? (b) Akin a makapanseguro itayo a saray pakanodnonotan ed apalabas a kairapan so naandi?
24 Iyaabawag na manataliman Dios: “Mamalsa ak na balon katawenan [sakey a balon mangatatawen a gobierno a manguley ed katooan] tan sakey a balon dalin [matunong a sosyedad na too]; tan saray inmuna a bengatla ag-ira la nanonotan, ag-ira onla ed puso. Balet mangayaga, sikayon totoo, tan manliket kayo ed ando lan ando ed saman so palsaen ko.” “Say interon dalin so wala ed painawa, ta sikato so bulos ed pakasigensigen. Nagmaliw a maliket iray totoo tekep na magayagan kelyaw.”—Isaias 14:7; 65:17, 18.
25 Kanian diad panamegley na Panarian to, kumpleton baliktaren na Dios so abayag lan mauges a situasyon. Diad andi-geter ipanengneng to so baleg a panangasikaso to ed sikatayo diad pangiter na saray bendisyon a nagkalalon tuloy a kasalat na antokaman a pasakit a naawat tayo ed apalabas tayo. Saray datin gonigon a naeksperiensia tayo so napurak ed pakanodnonotan ed saman, no sikatayo so sinononot ed saratan ya amin.
26. Akin a manbayar so Dios ed sikatayo ed antokaman a kairapan ed apalabas?
26 Ontan so panbayar na Dios ed sikatayo lapud irap a nayarin sinungdoan tayo ed sayan mundo. Kabat ton agtayo kasalanan so inkiyanak tayon ag-ayadyari, ta atawir tayo so ag-inkayadyari ed inmunan atateng tayo. Agtayo kasalanan a sikatayo so niyanak ed satanikon mundo, ta no si Adan tan si Eva so nanmatoor, sikatayo komon so niyanak ed paraiso. Kanian tekep na baleg a panangabagey say Dios so nagkalalon manumang nisesengeg ed apalabas a mauges ya amasakit ed sikatayo.
27. Antoran propesiya so makanengneng ed makapakelaw a kasumpalan da ed balon mundo?
27 Diad balon mundo, makaeksperiensia so katooan na kawayangan a nipasakbay ed Roma 8:21, 22: “Pian say pinalsa a dili niliktar ed inkaaripen na kabulokan tan nawalaan na kawayangan na gloria na saray anak na Dios. Ta amta tayo a say lapag a pinalsa a maningel ira ya amin tan maniirap ira ya amin anggad natan.” Diad atan nanengneng na totoo so kumpleton kasumpalan na pikakasi: “Onsabi komon so panarian mo. Nagawa komon so linawam, diad tawen, ontan met ed dalin.” (Mateo 6:10) Saray makapakelaw a kipapasen ed Paraison dalin so mangisindag ed saray kipapasen diad tawen.
[Saray litrato ed pahina 23]
Diad balon mundo, say matatken so ompawil ed biskeg na kalangweran
[Litrato ed pahina 24]
Amin a sakisakit tan beblay so naekal ed balon mundo
[Litrato ed pahina 25]
Anggan say inatey so napaoli ed bilay diad balon mundo
[Litrato ed pahina 26]
‘Aglara manaral na bakal’
[Saray litrato ed pahina 27]
‘Lukasan na Dios so lima to tan mamenek ed pilalek na amin a bengatlan mabilay’
[Litrato ed pahina 27]
Saray totoo tan ayayep so niwala ed sigpot a kareenan diad Paraiso
[Litrato ed pahina 28]
Say Panarian na Dios so nagkalalon ontumang nisesengeg ed amin a kairapan a sinungdoan tayo