Parte 11
Say Letnegan Na Balon Mundo So Natitibukel La
1, 2. Diad kasumpalan na propesiya na Biblia, anto so nagagawa ed mismon imaton tayo?
NO ANTO met so makapakelaw et say katuaan a say letnegan na balon mundo na Dios so natitibukel la natan, anggaman nagegeba so daan a mundo nen Satanas. Diad mismon imaton tayo, say Dios so manutugyop na totoo manlapud amin a nasyones tan titibukelen ira ed letnegan na sakey a balon mangaraldalin a sosyedad ya asingger lan onsalat ed sayan ag-nankakasakey a mundo natan. Diad Biblia, diad 2 Pedro 3:13, sayan balon sosyedad so atawag a “sakey a balon dalin.”
2 Ikuan met na propesiya na Biblia: “Dia ed saray kaunoran ya agew [say panaon a panbibilayan tayo natan] . . . , dakerakel a baley so onla tan kuanda: ‘Dago kayo, sikayon totoo, tan ontatdang itayo ed palandey nen Jehova [say tuan panagdayew to], . . . tan ibangat to itayo ed saray dalan to, tan manakar itayo diad saray basbas to.’”—Isaias 2:2-3.
3. (a) Diad siopa so kasusumpalan na propesiya nen Isaias? (b) Panon so pankomento na kaunoran a libro na Biblia nipaakar ed saya?
3 Atan a propesiya so nasusumpal la natan ed limog na saraman so pasakup ed ‘saray dalan na Dios tan manakar ed saray basbas to.’ Say kaunoran a libro na Biblia so manasalambit ed sayan maaro-ed-kareenan ya internasyonal a sosyedad na totoo a bilang ‘baleg ya ulop . . . a manlapud amin a nasyones tan tribu tan baley tan pansasalita,” sakey a tuan sankagloboan ya impanaagi a manlilingkor a nankakasakey ed Dios. Tan ikuan met na Biblia: “Saraya sikara so nanlapud baleg a kairapan.” Salanti, sikara so makaliktar ed anggaan na sayan mauges a sistema na bengabengatla.—Apocalipsis 7:9, 14; Mateo 24:3.
Sakey a Tuan Internasyonal ya Impanaagi
4, 5. Akin a say sankamundoan ya impanaagi na Tastasi nen Jehova so posible?
4 Sisimoon iray nilaksalaksan Tasi nen Jehova a mangugunaet a manbilay a mitunosan ed saray bilin tan dalan na Dios. Say ilalo ra ed andi-geter a bilay so nikawing ed balon mundo na Dios. Diad inagew-agew a panangikondukta ra na bilay da diad itutulok ed saray ganggan na Dios, ipapanengneng da ed sikato so inkamabulos dan manpasakup ed paraan na pananguley to namparan natan tan diad balon mundo. Inerman, antokaman so nasyonalidad odino rasa ra, tutuloken daray parehon estandarte—ya indatak na Dios ed Salita to. Sikato no akin a sikara so tuan internasyonal ya impanaagi, sakey a balon mundon sosyedad a gawa na Dios.—Isaias 54:13; Mateo 22:37, 38; Juan 15:9, 14.
5 Ag-ipapasen na Tastasi nen Jehova so inkasikaran responsable ed impagmaliw dan nikadkaduman sankagloboan ya impanaagi. Kabat da a saya so resulta na makapanyarin espiritu na Dios a mangikukurang ed totoon manpapasakup ed saray ganggan to. (Gawa 5:29, 32; Galacia 5:22, 23) Atan so gawa na Dios. Unong ya inkuan nen Jesus, “saray bengatla ya agnayari ed saray totoo sikara so nayari ed Dios.” (Lucas 18:27) Kanian say Dios a nanggawan posibli ed mansiasiansian talba et sikato met so manggawan posibli ed pansiansia na balon mundon sosyedad.
6. Akin a say impanaagi na Tastasi nen Jehova so natawag a modernon milagro?
6 Kanian, say dalan na pananguley nen Jehova ed balon mundo so nanengneng la ed no anto so papawalaen to ed letnegan a parad balon mundon natitibukel la natan. Tan say ginawa to ed Tastasi to, diad pantalos et sakey a modernon milagro. Akin? Lapud sikato so amalagey ed Tastasi nen Jehova ed sakey a tuan sankamundoan ya impanaagi, sakey ya agbalot napultot na manangapag a nasyonal, rasyal, odino relihyoson interes. Anggaman saray Tasi so manbilang na nilaksalaksa tan manbibilay ed masulok a 200 daldalin, sikara so nankakasakey diad agnapoltot a bedber. Sayan sankamundoan ya impanaagi, a nikadkaduma ed amin ya awaran, so peteg a sakey a milagro—gawa na Dios.—Isaias 43:10, 11, 21; Gawa 10:34, 35; Galacia 3:28.
Panangibiig ed Totoo na Dios
7. Panon a nabidbiran iray tuan patumbok nen Jesus unong ed kuan to?
7 Panon a nagkalalon nadetermina no siopa so totoo ya uusaren na Dios a bilang letnegan parad balon mundo to? Bueno, siopa so manusumpal ed saray salita nen Jesus ed Juan 13:34, 35? Inkuanto: “Iter ko ed sikayo so balon ganggan, a manaarowan so sakey tan sakey ed sikayo; unong na impangarok ed sikayo, pian manaarowan met so sakey tan sakey ed sikayo. Diad saya naamtaan dan amin a sikayoray babangatan ko, no walaan kayo na aro ed limog yon dili.” Saray Tasi nen Jehova so manisia ed saray salita nen Jesus tan onkikiwas unong ed saratan. Unong ya ibibilin na Salita na Dios, sikara so “nawalaan na ampetang ya arowan ed balang sinansakey.” (1 Pedro 4:8) “Kinawesan [da so inkasikara] na aro, ta atan so ayadyarin bedber na pankakasakey.” (Colosas 3:14) Kanian say impanaagin aro so say “kula” a mamenben ed sikaran nankakasakey ed sankamundoan.
8. Panon a say 1 Juan 3:10-12 so lalon mangipabidbir ed totoo na Dios?
8 Ontan met, ikuan na 1 Juan 3:10-12: “Mapatnag ira so anak na Dios tan saray anak na Diablo ed sayan katuaan: Siopaman ya agmanggawa na katunongan so agkien na Dios, anggan say agto arowen so agi to. Ta saya so balita a nadngel yo nanlapu ed gapo, a manaarowan so balang sinansakey; aliwan singa si Cain, a nanlapu ed mauges a sakey tan pinatey to so agi to.” Kanian, saray totoo na Dios so aliwan maramsak, a sankagloboan ya impanaagi.
Sananey a Pakabidbiran a Nengneng
9, 10. (a) Diad anton kimey so pakabidbiran na saray ariripen na Dios ed kaunoran iran agew? (b) Panon so panusumpal na saray Tasi nen Jehova ed Mateo 24:14?
9 Wala ni so sananey a dalan a nabidbir iray ariripen na Dios. Diad propesiya to nipaakar ed anggaan na mundo, imbaga nen Jesus iray dakel a bengatla a mananda ed sayan peryodo na panaon a bilang say kaunoran iran agew. (Nengnengen so Parte 9.) Say manunan nengneng na sayan propesiya so abitla ed saray salita to ed Mateo 24:14: “Sayan maong a balita na panarian so nipulong ed amin a panaayaman a dalin pian pantasi ed amin a nasyones; insan onsabi so anggaan.”
10 Kasin anengneng tayon nasusumpal itan a propesiya? On. Nanlapulad inggapo na kaunoran iran agew nen 1914, saray Tasi nen Jehova so mangipupulong na maong a balita na Panarian na Dios ed interon mundo diad paraan ya inganggan nen Jesus, salanti, diad saray ayaman na totoo. (Mateo 10:7, 12; Gawa 20:20) Ondadalaw iray nilaksalaksan Tastasi ed totoo ed balang nasyon pian itongtong ed sikara so nipaakar ed balon mundo. Saya so angipaarap ed inpakaawat yo na sayan brosyur, unong a say kimey na Tastasi nen Jehova et laktipen to so panangimprinta tan panangibunog na binilbilyon iran piraso na literatura nipaakar ed Panarian na Dios. Wala ta ni so siopaman a kabat yon manpupulong nipaakar ed Panarian na Dios ed kab-kaabungan ed interon dalin? Tan ipapanengneng na Marcos 13:10 a sayan panagpulong tan panagbangat a kimey so nepeg a gawaen ya “ununa,” sakbay ya isabi na anggaan.
Pangebat ed Komaduan Baleg a Salisalan
11. Anto ni so susumpalen na Tastasi nen Jehova ed panpapasakup ed uley na Dios?
11 Diad panpasakup ed saray ganggan tan prinsipyo na Dios, susumpalen na Tastasi nen Jehova so sananey nin bengatla. Ipapanengneng dan si Satanas so matila sanen ibabaga ton saray totoo so agnayarin manmatoor ed Dios diad leksab na subok, sirin eebatan so komaduan baleg a slaisalan, a lalanoren to so katooran na too. (Job 2:1-5) Bilang sakey a sosyedad na nilaksalaksan totoo manlapud amin a nasyones, idemostra na Tastasi, a bilang sakey a laman, so katooran ed uley na Dios. Anggaman sikara so ag-ayadyarin totoo, itatandoro ra so dapag na Dios ed salisalan na sankatalbaan ya inkasoberano, anggaman ed satanikon desdes.
12. Diad panamegley na pananisia ra, siopa so aaligen na Tastasi?
12 Natan, sarayan nilaksalaksan Tasi nen Jehova so mangarum ed paneknek da ed andukey a linya na arum iran tasi diad apalabas a panaon ya angidemostra na katooran ed Dios. Arum ed saraya et di Abel, Noe, Job, Abraham, Sara, Isaac, Jacob, Debora, Rut, David, tan Daniel, diad pamitla lambengat na pigara. (Hebreos, kapitulo 11) Sikara so, singa ed ikuan na Biblia, a sakey a ‘baleg a lurem na matoor a tastasi.’ (Hebreos 12:1) Saraya tan saray arum a pati saray babangatan nen Jesus so nansiansian matoor ed Dios. Tan intarya a mismo nen Jesus so sankabalgan ya alimbawa diad impamasiansia na ayadyarin katooran.
13. Antoran salita nen Jesus nipaakar ed si Satanas so apaneknekan a tua?
13 Papaneknekan na saya a say inkuan nen Jesus nipaakar ed si Satanas ed saray relihyoson papangulo so tua: “Balet natan seseetan yo ak a pateyen, toon angibaga ed sikayo na katuaan a nadngel ko ed Dios. . . . Sikayo so nanlapu ed ama yon Diablo, tan kaliktan yon gawaen iray pilalek na ama yo. Atan a sakey so managpatey sanen sikato so ginmapo, tan agtinmalindeg a malet ed katuaan, ta anggapo ed sikato so katuaan. Sano sikato so mansalita na tila, mansalita nipaakar ed kayarian to, ta sikato so matila tan say ama na tila.”—Juan 8:40, 44.
Anto so Pilien Yo?
14. Anto so nagagawa ed letnegan na balon mundo natan?
14 Say letnegan na balon mundo a titibukelen la natan na Dios diad internasyonal a sosyedad na Tastasi nen Jehova so ombibiskeg lan ombibiskeg. Kada taon nilasus nilibon totoo so manguusar ed kawayangan dan manpili, a nibased suston pikakabat, pian awaten so uley na Dios. Nagmaliw ira a kabiangan na sosyedad na balon mundo, a mangitatandoro ed dapag na Dios ed salisalan na sakatalbaan ya inkasoberano, tan mamapaneknek a matila si Satanas.
15. Anton manangibiig a kimey so gagawaen nen Jesus ed agew tayo?
15 Diad impanpili ed uley na Dios, onkualipika iran nipasen ed “nikawanan a lima” nen Kristo legan ya ibiig to so “say karnero” manlapud “saray kanding.” Diad propesiya to nipaakar ed kaunoran iran agew, impasakbay nen Jesus: “Tan natipon ed arap to iray amin a nasyones, tan panbiiganen to naani so saray totoo ed sakey tan sakey, a singa say pastol ibiig to so karnero ed saray kanding. Tan ipasen to so karnero ed nikawanan a lima to, balet saray kanding ed nikawigi to.” Say karnero et saray mauyamon totoon mililimog tan manusuporta ed saray agagi nen Kristo, a manpapasakup ed uley na Dios. Saray kanding et saray anawet-tenten a totoon angipulisay ed saray agagi nen Kristo tan ag-anuporta ed uley na Dios. Diad anton pansumpalan? Inkuan nen Jesus: “Saraya [saray kanding] so onla ed andi-anggaan a kapegpeg, balet saray matunong [say karnero] dia ed bilay ya andi-anggaan.”—Mateo 25:31-46.
16. Anto so nepeg yon gawaen no labay yo so manbilay ed onsabin Paraiso?
16 Peteg, a manatalima so Dios ed sikatayo! Agmabayag itarok to so makapalikliket a mangaraldalin a paraiso. Kasin labay yo so manbilay ed atan a Paraiso? No ontan, ipanengneng yo so apresasyon ed saray probisyon nen Jehova diad panaral na nipaakar ed sikato tan onkiwas unong ed naaralan yo. “Anapen yo si Jehova, sikayon totoo, ta naromog yo ni. Ontawag kayo ed sikato ta asingger ni. Say marelmeng paulian to komon so dalan to, tan ed too ya aliwa a maptek so saray kanonotan to; et ompawil komon ed si Jehova, et sikato naani kasian to.”—Isaias 55:6, 7.
17. Akin ya anggapo so panabala ed panaon diad panpili ed no siopa so panlingkoran?
17 Anggapo so panabala ed panaon. Say anggaan na sayan daan a sistema so asingsingger la. Manimbawa so Salita na Dios: “Agyo aarowen so mundo odino saray bengatlan wala ed mundo. No siopaman et arowen to so mundo, say aro na Ama so andi ed sikato . . . Niarum ni, say mundo mangangga tan saray pilalek to, balet say mangunor ed linawa na Dios so mansiansia lawas.”—1 Juan 2:15-17.
18. Anton kurang na kiwas so manggawa ed sikayon manilalon sitatalek a manbilay ed makapakelaw a balon mundo na Dios?
18 Nipapasal la natan iray totoo na Dios parad andi-anggaan a bilay diad balon mundo. Aaralen da so espiritual tan arum iran abilidad a nakaukolan pian natibukel so sakey a paraiso. Pasesegen mi kayon pilien so Dios a bilang Manuley tan suportaan so manangilaban-bilay a kimey a pagagawa to ed interon dalin natan. Aralen so Biblia ed Tastasi nen Jehova, tan nakabatan so Dios a peteg a manatalima ed sikayo tan mangitarok na anggaan ed kairapan. Diad sayan dalan sikayo met so magmaliw a kabiangan na letnegan na balon mundo. Insan sitatalek kayon manilalo ed pakagamor na abobon na Dios tan manbilay ya ando lan ando ed saman a makapakelaw a balon mundo.
[Litrato ed pahina 31]
Saray Tasi nen Jehova so walaan na tuan internasyonal ya impanaagi
[Litrato ed pahina 32]
Say letnegan na balon mundo na Dios so natitibukel la natan