Pangayagaan so Bilay na Pamilya

Peteg kasin makapanliket iray pamilya?

Panon a posible itan?

Wala ta so siopaman a pamilyan amta yo a nankakasakey tan maliket a singa nanengneng ed sayan tract? Saray pamilya ed inerman so sigpot a nabubuyak. Say diborsyo, kakulangan na inkaligen ed trabaho, ikakasmak na walad-kasulowan ya atateng, inkadismaya​—sarayan amin so pansesengegan na krisis. Inkuan na sakey ya onsiano ed bilay na pamilya: “Natan, saray nipasakbay ed kakusbo na pamilya so kabkabat na balang sakey.”

Akin a saray pamilya natan so inataki na ontan iran seryoson problema? Panon tayon pangayagaan so bilay na pamilya?

Panon so Inggapo na Pamilya

Pian sarayan tepet so naebatan, kaukolan tayon amtaen so gapoan na panamaley tan say pamilya. Lapud no saraya et walaan na sakey a Manangigapo​—sakey a Manamalsa​—saray membro na pamilya so nepeg a paiwanwan ed sikato, lapud seguradon amta to so sankaabigan no panon tayon pangayagaan a sigpot so bilay na pamilya.

Makapasagyat, sisiaen na dakel a say oksuyan na pamilya so andian na Manangigapo. Ikuan na The Encyclopedia Americana: “Lablabayen ni saray eskolar a sukayan so gapoan na panamaley ed sanparis iran oksuyan na ayayep ya abebbeba nen say too.” Ingen, sinalita nen Jesu-Kristo so panamalsa ed laki tan bii. Inaon to bilang autoridad so asasakbay a rekord na Biblia tan kuanto: “Say impankasakey na Dios agnepeg a siyanen na too.”​—Mateo 19:​4-6.

Kanian duga si Jesu-Kristo. Sakey ya intelihentin Dios so ­amalsa ed inmunan totoo tan angiyareglo parad maliket a bilay na pamilya. Impantipon na Dios so inmunan sanasawa ed panamaley tan inkuanto a say laki so “nepeg a mangiyamong ed ­asawa to tan nepeg a magmaliw iran sakey a laman.” (Genesis 2:22-24) Kanian, kasin saray problema na pamilya natan et ­makasengeg ed pangegemtan na saray estiloy-bilay ya onsumlang ed saray estandarten inletneg na Manamalsa ed Salita to, say Biblia?

Dinan a Dalan so Mamaarap ed Aligwas?

Unong ya andi duaruwan kabat yo, say modernon mundo so mangiyaalibansa ed dilin-interes tan dilin-agawaan. Imbaga na sakey a managpoonan diad sakey a klasen mangraduar ed Estados Unidos a “mabunigas so agum.” “Nayarian yo so magmaliw a maagum tan siansian manliknan maabig nipaakar ed inkasikayo.” Ingen say pangegemtan na materyal iran kayarian so agmangitonton ed aligwas. Diad tua, say materyalismo so sakey ed saray sankabalgan a solon kaatapan ed bilay na pamilya lapud lolooban to so atooan iran siglaotan tan oopoten to so panaon tan kuarta na totoo. Diad kasuniyan, kunsideraen no panon a say duara lambengat ya uliran ed Biblia so ontulong ed sikatayon makanengneng ed no anto so makana ed liket.

“Magmaong so pangan na pising ed totoon inarom nen say pangan na sankaabigan a karne ed kawalaan na gula.”

“Magmaong so pangan na amagan tinapay a tekep na kareenan na kanonotan nen say nawalaan na ponsia ed abung a napno na kolkol.”

Uliran 15:17; 17:​1, “Today’s English Version.”

Mabisbiskeg, agta ontan? Isipen pa so agaylan inkaduma na mundo no amin a pamilya so mangimano ed sarayan manunaan! Itarya met na Biblia so mablin panangiwanwan ed no panon so nepeg a pantrato na saray membro na pamilya ed balang sakey. Kunsideraen so pigara lambengat a giyan iiter to.

Asawan Lalaki: ‘Arowen yo so asawa yo a singa say laman yon dili.’​—Efeso 5:​28-30.

Simple, balet praktikal a tuloy! Iwawanwan met na Biblia so asawan laki a ‘pabtangan to na galang so ­asawa to.’ (1 Pedro 3:7) Saya so gawaen to diad ­pangiter ed sikato na nikaduman imano, tekep na inkatamoy, pakatalos, tan panamaseguro. ­Pablien to met iray opinyon to tan talinengen to. (Ipareng so Genesis 21:12.) Agkayo ta mipakna a siopaman a pamilya so nagunggunaan no sipapagan tratoen na asawan laki so asawa to, unong ed kaliktan ton pantrato da ed sikaton mismo?​—Mateo 7:12.

Asawan Bibii: “Nawalaan na aralem a respeto edasawa [yo].”​—Efeso 5:33.

Say asawan bii so makapangiyarum ed liket na pamilya diad itulong ed asawa ton laki a manumpal ed saray ambelat a responsabilidad to. Ingagalan onia, lapud intarya na Dios so bii a “katulongan to, magmaliw a bilang sakey a kapanoan to.” (Genesis 2:18) Napabli yo ta so bendisyon ed bilay na pamilya sano ipanengneng na asawan bii so respeto ed asawa to diad panuporta ed saray desisyon to tan pikoopera ed sikaton gamoran iray kalat na pamilya?

Sanaasawa: “Saray asawan lalaki tan bibii so nepeg a matoor ed balang sakey.”​—Hebreos 13:​4, TEV.

Sano sikara so ontan, say bilay na pamilya so peteg a mangungguna. Say pikakalugoran so mabetbet a mamubuyak ed sakey a pamilya. (Uliran 6:​27-29, 32) Kanian, sikakabat ya ipapaseseg na Biblia: “Manliket ka ed asawam a bii tan mangayaga ka ed biin inasawam . . . Akin ya iter mo so panangarom ed sananey a bii?”​—Uliran 5:​18-20, TEV.

Atateng: “Ipasal iray [anak yo] unong ed dalan a parad [sikara].”​—Uliran 22:6.

Sano saray atateng so mangiter na panaon tan imano ed ananak, seguradon onaligwas so bilay na pamilya. Kanian, ipapaseseg na Biblia ed atateng ya ibangat iray anak da ed saray dugan prinsipyo ‘sano onyurong ira ed abung da tan sano manaakar ira ed dalan tan sano ondukol ira tan sano ombangon ira.’ (Deuteronomio 11:19) Ikuan met na Biblia a nepeg ya ipanengneng na atateng so panangaro ed saray anak da diad panisiplina ed sikara.​—Efeso 6:4.

Ananak: “Ananak, magmaliw kayon matulok ed atateng yo unong ed Katawan.”​—Efeso 6:​1.

Tua, diad sayan mauges a mundo et aliwan naynay a mainomay so itulok ed atateng yo. Ingen, agta mipakna kayo a makabat a gawaen so ibabaga ed sikatayo na Manangigapo na pamilya? Kabat to no anto so sankaabigan pian magmaliw a mas maliket so bilay na pamilya tayo. Kanian panggunaetan a tuloken iray atateng yo. Magmaliw a determinadon ompaliis ed dakel iran tukso na mundo ed panggawa na mauges.​—Uliran 1:​10-19.

No kada membro na pamilya so mangiyaplikan malaknab ed konseho na Biblia, nagunggunaan so bilay na pamilya. Aglambengat pangayagaan na bilay na pamilya so magmaong a bilay natan noagta nawalaan na makapakelaw ya arapen ed balon mundon insipan na Dios. (2 Pedro 3:13; Apocalipsis 21:​3, 4) Kanian iyugali ed pamilya so mankakasakey a panaral na Biblia! Nilaksalaksan pamilya ed sankadalinan so akaromog a peteg a makagungguna so panangiwanwan a nitarya ed libron Say Sekreto na Liket ed Pamilya.

Likud no nipanengneng, saray amin ya inaon ed Biblia so nanlapu ed New World Translation of the Holy Scriptures.