Siopan Peteg so Manguuley ed Mundo?

Dakel a totoo so onebat ed atan a tepet ed sakey a salita​—Dios. Balet mabitar, inerman et ag-ibabaga na Biblia a balanglan si Jesu-Kristo odino say Ama to so peteg a manuley ed sayan mundo. Diad kasuniyan, inkuan nen Jesus: “Say manuley na sayan mundo so nibantak naani.” Tan inyarum to: “Say manuley na sayan mundo so onsabi. Tan anggapo so pibibiangan to ed siak.”​—Juan 12:31; 14:30; 16:11.

Kanian say manuley na sayan mundo so sumpa ed si Jesus. Siopa kasi iya?

Sakey a Pakatandaan Manlapud Saray Kipapasen ed Mundo

Anggaman ed saray sagpot na walaan na maabig-getman totoo, say mundo so teriblen tuloy a nanirap ed interon awaran. Sengegan iya na panmotektek na manonot iran totoo, a singa si David Lawrence a datin managsulat na editoryal: “‘Kareenan ed dalin’​—ngalngali labay itan na amin. ‘Kamaongan ed totoo’—​ngalngalin amin a totoo ed mundo so makalikna ed atan ed balang sinansakey. Balet anto so problema? Akin a manataktakot ni so bakal anggaman ed nisipor iran pilalek na totoo?”

Singa mansumlangan itan, agta ontan? Anta say gendat a pilalek na totoo et say manbilay ed deen, sikara so kaslakan a manbubusolan tan manpapateyan​—tekep na ontan lan inkarawal. Kunsideraen pa so andi-liknaan iran inkaalablabas diad angkabaleg a karuksaan. Saray totoo so angusar na gas chambers, saray kampo na panangipangawan, panagpugso na apuy, saray bomban napalm, tan arum niran mauges a metodo pian andi-panangasin mamairap tan mamatey ed balang sakey.

Kasin manisia kayo a saray totoo, a mankaliktan na deen tan liket, et sarag da, ed inkasikara, so ontanlan baleg a karelmengan sumpad arum? Antoran puersa so managdag ed totoo ed ontan iran makapadimlan gawa odino mangimaneobra ed sikara ed saray situasyon a no iner et napilitan iran manggawa na saray karelmengan? Kasin naumameng yo la no wala so marelmeng, agnanengneng a pakayarin mangiimpluensya ed totoo a manggawa na ontan a kiwakiwas na karawalan?

Nipabidbir Iray Manuley ed Mundo

Agnakaukolan so panpalbeng ed pamaakaran, ta malinlinew ya ipanengneng na Biblia a sakey a matudio, agnanengneng a persona so mamabanlong ed namparan totoo tan nasyones. Ikuanto: “Say interon mundo so mandukdukol ed pakayari na sakey a marelmeng.” Tan sikato so ipabidbir na Biblia, a kuanto: “Say sakey ya atawag a Diablo tan Satanas . . . so mamapalikdo ed interon panaayaman a dalin.”​—1 Juan 5:19; Apocalipsis 12:9.

Aminsan sanen si Jesus so “tinukso na Diablo,” agsinuppiat nen Jesus so betang nen Satanas bilang manuley na sayan mundo. Isalaysay na Biblia no anto so agawa: “Sikato so inyakar na Diablo ed nikadkaduman atagey a palandey, tan impanengneng to’d sikato so amin a panarian na mundo tan gloria ra, tan inkuanto ed sikato: ‘Amin na sarayan bengatla so iter ko’d sika no ondakmomo ka tan manggawa na sakey a panagdayew ed siak.” Insan inkuan nen Jesus ed sikato: ‘Arawi ka, Satanas!’”​—Mateo 4:​1, 8-10.

Isipen pa iya. Tinukso nen Satanas si Jesus diad impangiyopresi ed sikato na “amin a panarian na mundo.” Ingen, kasin say opresi nen Satanas so sakey a peteg a tukso no si Satanas so aliwan say peteg a manuley na sarayan panarian? Andi, aliwan ontan. Tan imanoen pa, si Jesus so ag-angiburi ya amin na sarayan minumundon gobierno et kayarian nen Satanas, a ginawa to komon no si Satanas et andian na pakayari ed saratan. Kanian, sirin, petepeteg a si Satanas a Diablo so say agnanengneng a manuley na mundo! Diad tua, say Biblia so manawag ed sikato a “say dios na sayan sistema na bengabengatla.” (2 Corinto 4:4) Ingen, panon a say ontan a marelmeng a persona so niwala ed sayan mabiskeg a tuloy a kipapasen?

Samay nagmaliw a Satanas so datin anghel a pinalsa na Dios, balet sikato so inmibeg ed betang na Dios. Inangat to so kanepegan na panuley na Dios. Diad sayan getma inusar to so uleg bilang pinagkasangiyan a palikdoen so inmunan bii, si Eva, tan sikato so atangguyor tan say asawa ton laki, si Adan, pian gawaen so opresi to imbes ya ontulok ed Dios. (Genesis 3:​1-6; 2 Corinto 11:3) Ibabaga to met a nayarian ton ipabeneg so amin ya agni niyanak ya ilalak nen Adan tan si Eva manlapud Dios. Kanian inabuloyan na Dios si Satanas a manalin mamaneknek ed ibabaga to, balet agtinmalona si Satanas.​—Job 1:​6-12; 2:​1-10.

Importante, si Satanas so agmanbukbukor ed panuuley to ed mundo. Sikato so matalona ed impanangguyor ed arum iran angheles a miulop ed sikato diad impanrebelde ed Dios. Saraya so nagmaliw a dedemonyo, espiritun kakaulop to. Sasalitaen na Biblia ira sanen sinimbawa toray Kristianos: “Ontalindeg a malet sumpad saray pangalot na Diablo; ta walaan itayo na pitutulot, aliwan sumpad laman tan dala, noagta . . . sumpad saray manuley na mundo ed sayan kabilungetan, sumpad saray marelmeng ya espiritun puersa ed mangatatawen iran pasen.”​—Efeso 6:​11, 12.

Sumpaen Iray Marelmeng ya Espiritu

Sarayan agnanengneng, marelmeng iran manuley ed mundo so determinadon mamalikdo ed amin a katooan, a pabenegen ira manlapud panagdayew ed Dios. Sakey a paraan a gagawaen iya na marelmeng iran espiritu et diad pangiyaalibansa ed ideyan kililiktar kayari ipatey, anggaman malinlinew ya ipapanengneng na Salita na Dios a say inatey et andian na liknaan. (Genesis 2:17; 3:19; Ezequiel 18:4; Salmo 146:​3, 4; Eclesiastes 9:​5, 10) Kanian, say marelmeng ya espiritu, a mangaalig ed boses na samay inatey, so makapitongtong ed mabilay a kakanayon odino kakaaro to, balanglan diad panamegley na espiritun medyum odino ed sakey a “boses” manlapud agnanengneng a pasen. Say “boses” so mankuwankuwanan a samay tinmaynan, ingen diad tua atan et demonyo!

Kanian no akadngel kayo na ontan a “boses,” agkayo papalikdo. Sumpaen so antokaman ya ibaga to, tan ibelyaw iray salita nen Jesus: “Arawi ka, Satanas!” (Mateo 4:10; Santiago 4:7) Agyo aabuloyan so inkaupapet nipaakar ed espiritun pasen a sengegan na pagmaliw yon nalanor ed marelmeng iran espiritu. Say ontan a kilanlanor so atawag ya espiritismo, tan papasakbayan na Dios iray managdayew to a sumpaen itan ed amin iran nengneng to. Kokondenaen na Biblia so “siopaman a mangagamil na panagparles . . . odino siopaman ya ontupleg ed espiritun medyum odino onsianon managpasakbay ed saray nagawa odino siopaman a mitongtong ed inatey.”​—Deuteronomio 18:​10-12; Galacia 5:​19-21; Apocalipsis 21:8.

Lapud itarok na espiritismo so sakey a too ed silong na impluensya na saray demonyo, sumpaen ya amin iray agamil to anggan panon lan makapaliket, odino makapagayaga, so ipatnag daratan. Ilaktip na sarayan agamil so inengneng ed bolan-kristal, panangusar na Ouija boards, ESP, panagpalar (palmistry), tan astrolohya. Pawalaen met na saray demonyo iray ingal tan arum ya ekstraordinaryon ebento diad kaabungan a ginawa ran teritorya ra.

Niarum ni, mangaanamot iray marelmeng ya espiritu ed makasalanan ya ikiling na totoo diad pangiyaalibansa na literatura, saray sine, tan saray programa ed telebisyon a mangipaparungtal na imoral tan aliwan natural ya awawey ed sekso. Kabat na dedemonyo a saray makapuy a kanonotan no agnipulisay ed nonot so sengegan na agnabural iran impresyon tan mangitonton ed totoo pian onkiwas ya imoral​—a singa saray demonyo a mismo.​—Genesis 6:​1, 2; 1 Tesalonica 4:​3-8; Judas 6.

Tua, dakel so nayarin manludlurey ed ideya a sayan mundo so uuleyan na marelmeng iran espiritu. Balet say agda panisia so aliwan makapakelaw, ta ikuan na Biblia: “Itutultuloy nen Satanas a pagmamaliwen so inkasikato ya anghel na liwawa.” (2 Corinto 11:14) Say sankasiliban a panamalikdo to so diad pamubulag ed dakel ed katuaan a sikato tan saray demonyo to so peteg a wala. Balet agkayo papalikdo! Say Diablo tan saray demonyo to so peteg a wala, tan kaukolan yon sumpaen iran mantultuloy.​—1 Pedro 5:​8, 9.

Makapaliket, asingger la so panaon sano si Satanas tan saray kakaiba to et naandi la! Ipapaseguro na Biblia: “Say mundo [pati saray demonyon manuley to] so onlabas, balet saman so manggawa na linawa na Dios so mansiansia lawas.” (1 Juan 2:17) Agaylan inawa itan sano atan a mauges ya impluensya so naekal! Sirin, sikatayo komon so magmaliw a sakey ed saraman so manggawa na linawa na Dios tan mangayaga ed bilay ya ando lan ando diad matunong a balon mundo na Dios.​—Salmo 37:​9-11, 29; 2 Pedro 3:13; Apocalipsis 21:​3, 4.

Likud no nipanengneng, saray amin ya inaon ed Biblia so nanlapu ed New World Translation of the Holy Scriptures.

[Litrato ed pahina 4]

Iyopresi kasi nen Satanas ed si Jesus so amin na sarayan gobierno na mundo no agto ra kayarian?