Leksion 3
Siopa si Jesu-Kristo?
Akin ya atawag si Jesus bilang “panguloan” ya Anak na Dios? (1)
Akin a sikatoy atawag a “say Salita”? (1)
Akin a si Jesus so linma ed dalin bilang too? (2-4)
Akin a sikato so nanggawa na saray milagro? (5)
Anto so gawaen nen Jesus ed asingger ya arapen? (6)
1. Nanbilay si Jesus ed tawen bilang sakey ya espiritun persona sakbay a sikato so linma ed dalin. Sikato so inmunan palsa na Dios, kanian sikato so atawag a “panguloan” ya Anak na Dios. (Colosas 1:15 Apocalipsis 3:14) Si Jesus so alenleneg ya Anak a pinalsa na Dios a mismo. Inusar nen Jehova so sakbay-toon si Jesus bilang “uloen a komikimey” diad impamalsa ed amin niran bengatla diad tawen tan ed dalin. (Uliran 8:22-31; Colosas 1:16, 17) Sikato met so inusar na Dios bilang say manunan pinagkasangiyan To. Satan no akin a si Jesus so atawag a “say Salita.”—Juan 1:1-3; Apocalipsis 19:13.
2. Imbaki na Dios so Anak To ed dalin diad impangiyalis ed bilay to diad panaganakan nen Maria. Kanian andian si Jesus na atooan ya ama. Satan no akin a sikato so agbalot akatawir na kasalanan odino ag-inkayadyari. Imbaki na Dios si Jesus ed dalin nisesengeg ed taloran rason: (1) Pian nibangat ed sikatayo so katuaan nipaakar ed Dios (Juan 18:37), (2) pian mantinien so naspot ya integridad, a mangitatarya na modelo parad sikatayo a tumboken (1 Pedro 2:21), tan (3) pian ibagat so bilay to a mangibulos ed sikatayo manlapud kasalanan tan ipapatey. Akin a kinaukolan iya?—Mateo 20:28.
3. Diad insunggay ed ganggan na Dios, say inmunan too, si Adan, so nanggawa na tatawagen na Biblia a “kasalanan.” Kanian sikatoy sinentensiaan na Dios na ipapatey. (Genesis 3:17-19) Sikatoy agla makaabot ed saray estandarte na Dios, kanian sikatoy agla ayadyari. Kalkalnan tinmatken tan inatey. Impasa nen Adan so kasalanan ed amin ya ilalak to. Satan so rason a sikatayo met so ontatken, mansakit, tan ompatey. Panon a nisalba so katooan?—Roma 3:23; 5:12.
4. Si Jesus so ayadyarin too a singa met ed si Adan. Balet, aliwan singa si Adan, si Jesus so nagnap a tinmulok ed Dios anggan diad silong na sankabalgan a subok. Diad ontan et nayarian ton ibagat so ayadyarin atooan a bilay to pian ibayaran so kasalanan nen Adan. Saya iman so tutukoyen na Biblia a say “dondon.” Saray ilalak nen Adan so nayarin nibulos sirin manlapud panangondena na ipapatey. Amin a mangiteteen na pananisia ed si Jesus so naperdona ed saray kasalanan da tan makaawat na andi-anggaan a bilay.—1 Timoteo 2:5, 6; Juan 3:16; Roma 5:18, 19.
5. Sanen wadiad dalin et pinaabig nen Jesus so mansasakit, amakan ed saray naeerasan, tan amatunda ed saray bagyo. Amaoli ni ingen na inaatey. Akin a ginawa to irayan milagro? (1) Naabagey to iray totoo a naiirapan, tan labay ton tulongan ira. (2) Saray milagro to so amaneknek a sikatoy Anak na Dios. (3) Impanengneng na saratan so gawaen to parad matulok a katooan sano manguley la bilang Ari ed interon dalin.—Mateo 14:14; Marcos 2:10-12; Juan 5:28, 29.
6. Inatey si Jesus tan pinaoli na Dios bilang espiritun pinalsa, tan sikatoy pinmawil ed tawen. (1 Pedro 3:18) Nanlapulad saman, sikatoy ginawa na Dios bilang Ari. Agla mabayag et ekalen nen Jesus so amin a karelmengan tan panirap ed sayan dalin.—Salmo 37:9-11; Uliran 2:21, 22.
[Saray litrato ed pahina 7]
Say ministeryo nen Jesus so angilaktip ed panagbangat, panaggawa na saray milagro, tan impangiyapay ni ingen ed bilay to parad sikatayo