Leksion 14
No Panon a Saray Tastasi nen Jehova so Naoorganisa
Kapigan a ginmapo so modernon agew a Tastasi nen Jehova? (1)
Panon a saray miting na Tastasi nen Jehova so nikokondukta? (2)
Panon a naaasikaso iray gastos? (3)
Sioparay mangidadaulo ed kada kongregasyon? (4)
Antoran mas ankabaleg a miting so nagagawa ed kada taon? (5)
Anton kimey so nagagawa ed saray hedkuarter tan sangan opisina ra? (6)
1. Ginmapo so modernon agew a Tastasi nen Jehova nen dekada na 1870. Diad gapo, sikaray natatawag a saray Estudyante na Biblia. Balet nen 1931 sikaray angadapta ed Makasulatan a ngaran a Tastasi nen Jehova. (Isaias 43:10) Manlapud melag a gapo say organisasyon so binmaleg ed minilyon a Tastasi, ya okupadon manpupulong ed masulok a 230 a daldalin.
2. Maslak a kongregasyon na Tastasi nen Jehova so walaan na saray miting a mamitlo kada simba. Sika so iimbitaan ya onatendi ed dinanman ed saraya. (Hebreos 10:24, 25) Say Biblia so basian na nibabangat. Saray miting so lulukasan tan sasaraan ed panamegley na pikakasi. Saray impapuson “espiritual a kanta” so kakantaen met diad maslak iran miting. (Efeso 5:18, 19) Libre so iyatendi, tan anggapoy koleksyon a gagawaen.—Mateo 10:8.
3. Maslak a kongregasyon so manmimiting diad Kingdom Hall. Saraya so kaslakan a simplin impaalagey na Tasi iran bulontaryo. Anggapoy nanengneng mon antokaman iran imahen, krus, odino bengatlaran singa saratan diad Kingdom Hall. Sasalipotpotan iray gastos diad panamegley na boluntaryon donasyon. Parad saraman so malabay a mandonasyon, wala ditan so sakey a kahon a pankontribusyonan.—2 Corinto 9:7.
4. Diad kada kongregasyon, walaray mamatatken, odino manangasikaso. Sikaray mangidadaulo ed panagbangat ed kongregasyon. (1 Timoteo 3:1-7; 5:17) Sikaray aasistian na saray ministeryal ya ariripen. (1 Timoteo 3:8-10, 12, 13) Sarayan lalaki so agnipaatagey nen say arum ed kongregasyon. (2 Corinto 1:24) Sikaray ag-iikdan na nikadkaduman titulo. (Mateo 23:8-10) Sikaray agmankakawes a duma ed arum. Nisay sikaray babayaran parad kimey da. Saray mamatatken so sibubulos a mangaasikaso ed espiritual iran pankaukolan na kongregasyon. Sikaray mangitatarya na ligliwa tan panangigiya ed panaon na gonigon.—Santiago 5:14-16; 1 Pedro 5:2, 3.
5. Saray Tastasi nen Jehova so manggagawa na saray ankabaleg iran asamblea odino kombension kada taon. Diad sarayan panaon et dakel a kongregasyon so mankakasakey parad espisyal a programa na instruksyon na Biblia. Say panagbautismo ed balo niran babangatan so regular a kabiangan na kada asamblea odino programa na kombension.—Mateo 3:13-17; 28:19, 20.
6. Say sankamundoan a hedkuarter na Tastasi nen Jehova so wala ed Nueba York. Ditan so kawalaan na Mananguley ya Ulop, say manunan grupo na eksperiensiadon mamatatken a mangaasikaso ed sankamundoan a kongregasyon. Wala met so masulok a 100 a sangan opisina ed sankamundoan. Diad sarayan lugar, saray bulontaryo so ontutulong ed pangimprinta tan pangipatulor ed literatura na Biblia. Niiiter met so panangidirehi parad panangorganisa ed panagpulong. Akin ya ag-iplano so panbisita ed sangan opisina ya asingger ed lugar mo?