Leksion 16

Say Desisyon Mon Manlingkor ed Dios

Anto so nepeg mon gawaen pian magmaliw a kaaro na Dios? (1, 2)

Panon mon gawaen so dedikasyon mo ed Dios? (1)

Kapigan so nepeg mon panpabautismo? (2)

Panon mon nagamoran so biskeg pian mansiansian matoor ed Dios? (3)

1. Pian magmaliw a kaaro na Dios, nepeg mo so nawalaan na maong a pikakabat ed katuaan na Biblia (1 Timoteo 2:3, 4), manisia ed saray bengatlan naaaralan mo (Hebreos 11:6), magbabawi ed saray kasalanan mo (Gawa 17:30, 31), tan manguman ed kurso na bilay mo. (Gawa 3:19) Insan say arom ed Dios so nepeg a mamakiwas ed sika a mangidedika na inkasika ed sikato. Kabaliksan na saya a diad personal, pribadon pikakasi et ibagam ed sikato ya itatalagam so inkasika ed sikato pian gawaen so linawa to.​—Mateo 16:24; 22:37.

2. Kayarin ginawam so dedikasyon mo ed Dios, nepeg mo so nabautismoan. (Mateo 28:19, 20) Say bautismo so mangipaamta ed kada sakey ya indedikam la so inkasika ed si Jehova. Kanian say bautismo so para lambengat ed saraman so susto la’d edad a manggawa na desisyon a manlingkor ed Dios. Sano bautismoan so sakey, say interon laman to so nakaukolan ya ipalgep ed danum a magano.a​—Marcos 1:9, 10; Gawa 8:36.

3. Kayarin ginawam so dedikasyon, sika so iilaloan nen Jehova a manbilay unong ed sipan mo. (Salmo 50:14; Eclesiastes 5:4, 5) Panggunaetan na Diablo a patundaen ka manlapud panlingkor ed si Jehova. (1 Pedro 5:8) Balet onapit ed Dios diad pikakasi. (Filipos 4:6, 7) Aralen so Salita to kada agew. (Salmo 1:1-3) Mansiansian maapit ed kongregasyon. (Hebreos 13:17) Diad panggawa ed saya, nagamoran mo so biskeg pian mansiansian matoor ed Dios. Sirin, diad inkamagnayon et nagawaan mo iray bengatlan kakaukolanen na Dios ed sika!

[Paimano ed leksab]