No Antoray Lugan na Libro
Nayarin nawetwet so sakey a pilpilimero toy onloob ed librarya na dakerakel ya asalansan a libro. Balet lapud antikey a panangisalaysay no panoy inkaalasir na saray libro, agmabayag et naamtaan to lan anapen so labay to. Mipadpara, magmainomay so pananap mo ed Biblia sano natatalosan moy inkaalasir na saray lugan to.
SAY salitan “Biblia” et nanlapud Griegon salita a bi·bliʹa, a kabaliksan toy “lukolukot na papiro” odino “liblibro.”1 Diad tua et say Biblia so sakey a koleksion—sakey a librarya—na 66 ya indibidual a liblibro, say impangisulat ed satan et sinaknapan toy ngalngalin 1,600 taon, manlapud 1513 K.K.P. ya anggad ngalngali 98 K.P.
Say unonan 39 a libro, ngalngalin taloran kakapat na lugan na Biblia, so akabatan bilang Hebreon Kasulatan, lapud kaslakan ed saratan et nisulat ed satan a lenguahe. Sarayan libro so inkalapagan a naapag ed taloran grupo: (1) Maawaran, Genesis ya anggad Ester, 17 a libro; (2) Maanlong, Job ya anggad Kanta nen Solomon, 5 a libro; tan (3) Mapropetiko, Isaias ya anggad Malaquias, 17 a libro. Kokobrian na Hebreon Kasulatan so asasakbay a salaysay nipaakar ed dalin tan ed katooan ontan met ed salaysay ed kadaanan a nasyon na Israel manlapud inggapo to ya anggad komaliman siglo K.K.P.
Say nakekeraan a 27 a libro so akabatan bilang Kristianon Griegon Kasulatan, lapud nisulat iratan ed Griego, say internasyonal a lenguahe ed saman a panaon. Manunan nauksoy iratan unong ed tema: (1) say 5 maawaran a libro—saray Ebanghelyo tan Gawa, (2) say 21 a sulat, tan (3) say Apocalipsis. Iyaapasakey na Kristianon Griegon Kasulatan iray bangat tan aktibidad nen Jesu-Kristo tan ed saray babangatan to nen inmunan siglo K.P.