Napaaligwas Mo so Memoryam
PINALSA nen Jehova a Dios so utek na too a walaan na makapakelaw a pakayarin makatanda. Denisinyo ton magmaliw itan a simpenan a nayarin napangalaan na agnaandi iran mablin bengatla ya inkarga ditan. Say inkadesinyo na utek so mitukoyan ed gagala na Dios a saray totoo so manbilay ya andi-anggaan.—Sal. 139:14; Juan 17:3.
Balet nayarin moriaen mo a no dakerakel lay nononoten mo et naandi iratan. Singano agmo la itan nanonotan. Anto so nayarian mon gawaen pian napaaligwas moy memoryam?
Ipanengneng so Interes
Say interes so importantin kabiangan diad pamaaligwas ed memorya. No ugalien tayo so magmaliw a maimano, magmaliw ya interesado ed totoo tan diad nagagawa ed kaliberliber tayo, naliing so kanonotan tayo. Diad ontan et magmainomay itayon onkiwas tekep na miparan interes sano nabasa odino narengel tayo so bengatlan walaan na magnayon a kablian.
Natural labat ed sakey a toon nairapan a mananda ed kangaranan na totoo. Ingen, bilang Kristianos, amta tayo a saray totoo so importante—saray kaparan Kristiano, saramay pupulongan tayo, tan diad arum a pililimogan tayo legan ya aarapen tayoray nakakaukolan ed bilay. Anto so ontulong ed sikatayon makatanda ed kangaranan? Inlista nen apostol Pablo so kangaranan na 26 ed sakey a kongregasyon a sinulat to. Nipatnag so interes to ed sikara lapud agto lambengat kabat so kangaranan da noagta sinalambit ton espesipiko iray detalye nipaakar ed karaklan ed sikara. (Roma 16:3-16) Arum a modernon-agew a managbiahen manangasikaso na Tastasi nen Jehova so matalem diad pakatanda ed kangaranan, anggaman liliberen daray kongregasyon a kada simba. Anto so ontutulong ed sikara? Nayarin iyugali ran usaren so ngaran na sakey a too a maminpigapiga diad primeron pakapantongtong dan dua. Pambabanikelan dan isiglaot so ngaran na too ed lupa to. Niarum ni, ikdan da na panaon so pilimog ed nanduruman indibidual diad lawak na ministeryo tan diad pandurungo ra. Sano naabet mo so sakey, kasin natandaan mo so ngaran to? Igapo diad pamawala na maabig a rason diad pananda ed ngaran; insan salien so arum ed saray asalambit a suhestion.
Importante met so pakatanda ed abasam. Anto so ontulong ed sikan onaligwas ed sayan pamaakaran? Namparan walaan na betang so interes tan pakatalos. Nakaukolan ya interesado kan maong ed babasaen mo pian niyapasakey mo so sigpot ya imanom ed satan. Agmo natandaan so impormasyon no manyatawyataw so nonot mo legan kan manbabasa. Napaaligwas so pakatalos mo sano isiglaot mo so impormasyon ed saray bengatlan kabisadom la odino diad pikakabat ya amtam la. Tepetan moy inkasika: ‘Panon tan kapigan kon iyaplika iyan impormasyon ed dilin bilay ko? Panon kon usaren itan diad panulong ed arum?’ Napaaligwas met so pakatalos no basaen moray grupo na salita imbes a saray sansakey a salita. Lalon mainomay mon natebek iray ideya tan nibiig iray manunan punto, diad ontan magmainomay iratan a natandaan.
Mangigana na Panaon ed Panrepaso
Saray eksperto ed lawak na edukasyon so mangidadanet ed kablian na panagrepaso. Diad sakey ya impanaral, impalinew na sakey a propesor ed kolehyo a say sakey a minuton panrepaso a tampol so manobli ed karakel na impormasyon a natandaan. Kanian tampol kayarim a nabasan intero—odino say malaglaem a porsyon na satan—repasom ed nonot mo iray manunan ideya ta pian saraya so onsepsep ed kanonotan mo. Isipen no panon mon ipaliwawa ed dilin salitam so antokaman a balo iran punto a naaral mo. Diad panrepresko ed memoryam bektaman ya abasam so sakey ya ideya, ninatnat mo so dukey na panaon a nayarian mon tandaan so punto.
Insan diad ontumbok a pigaran agew, ikdan na pankanawnawa a repasoen so abasam diad panginabang mo’d impormasyon ed arum. Nayarin inabang mo itan ed sakey a membro na pamilya, ed sakey a kakongregasyon, katrabahoan, kaeskuelaan, kaabay, odino diad sakey a naabet mo ed lawak na ministeryo. Panggunaetan mon uliten so Makasulatan a panagkatunongan a misiglaotan ed saratan ya aliwa lambengat ed saray manunan katuaan. Say panggawa ed saya so makagunggona ed sika, ya ontulong ed sikan onsepsep ed memoryam iray importantin bengatla; nagunggonaan met so arum.
Dalepdepen Iray Importantin Bengatla
Niarum ed panrepaso ed abasam tan pangibaga ed satan ed arum, naromog mon makagunggona so pandalepdep ed saray importantin bengatlan naaralan mo. Ontan so ginawa na saray managsulat na Biblia a si Asap tan David. Inkuan nen Asap: “Salambiten [“nodnonoten, ” NW] ko so saray kimkimey nen Jehova; tan nodnonoten ko so gawam a makapakelaw nen una. Umamengen ko so amin a kimey mo, tan mandalepdep ak ed saray gawagawam.” (Sal. 77:11, 12) Miulibay ya insulat nen David: “Dalepdepen taka ed leleg na saray panagbantay ed labi,” tan “nanodnonotan ko so saray inmuna ya agew; manumameng ak ed amin a gawagawam.” (Sal. 63:6; 143:5) Kasin gagawaen mo itan?
Say ontan ya aralem, nisentron panagnonot a momorekdeken iray gawa nen Jehova, saray kalidad to, tan saray balikas na linawa to so lalon makatulong ed sika a natandaan iray katuaan. No iyugalim so ontan a panagnonot, peteg a nipaslep iray makanan bengatla ed pusom. Moldien to so nengneng na inkatoom ed dalem. Saray nanodnonotan so mangirepresenta ed sankaaraleman iran kanonotan mo.—Sal. 119:16.
Say Betang na Espiritu na Dios
Sano panggunaetan tayon nanonotan iray katuaan nipaakar ed saray kimey nen Jehova tan ed saray bengatlan sinalita nen Jesu-Kristo, ag-itayo manbukbukor. Diad samay labi sakbay na impatey to, imbaga nen Jesus ed saray patumbok to: “Sarayan bengatla sinalitak ed sikayo, ambegyan wadia ak ni ed sikayo. Balet say managligliwa [“mananulong,” NW], salanti say espiritu santo, a sikato so ibaki dia na Ama ed ngaran ko, ibanga’to ed sikayo so amin a bengabengatla, tan ipanono’to ed sikayo so amin ya imbagak ed sikayo.” (Juan 14:25, 26) Si Mateo tan Juan so kaiba ed saramay wadman. Kasin say masanton espiritu so apaneknekan ya ontan a mananulong ed sikara? On, peteg! Manga waloy taon ed saginonor, sinumpal nen Mateo ya insulat so inmunan detalyadon salaysay ed bilay nen Kristo, pati saramay makabkabaliksan a pakanodnonotan a singa say Sermon ed Palandey tan say detalyadon tanda ed kiwawala nen Kristo ed kasampotan na sistema na bengabengatla. Anemaplo-tan-liman taon kayari na impatey nen Jesus, insulat nen apostol Juan so Ebanghelyo to, pati saray detalye na imbaga nen Jesus ed samay unor a labin kaiba na saray apostol so Katawan sakbay ya isuko toy bilay to. Andi-duaruwan si Mateo tan Juan so walaan na mabitar a pakanonot ed saray bengatlan imbaga tan ginawa nen Jesus legan a kaiba ra, ingen say masanton espiritu so walaan na manunan betang diad pamaseguro ya agda alingwanan iray importantin detalye a nilabay nen Jehova ed nisulat a Salita to.
Kasin say masanton espiritu so onkikiwas bilang mananulong ed saray lingkor na Dios natan? Petepeteg! Siempre, ag-ikarga na masanton espiritu ed saray kanonotan tayo iray bengatlan agtayon balot naaral, balet ta onkiwas itan a mananulong pian ipanonot ed sikatayo iray importantin bengatlan naaral tayo la ed apalabas. (Luc. 11:13; 1 Juan 5:14) Insan, legan ya onlesa iray pankaukolan, saray pakayari na panagnonot tayo so napakiwas a ‘makanonot ed saray salita ya inkabalikas nensaman na saray masantos a propeta, tan ed ganggan na Katawan tan Manangilaban.’—2 Ped. 3:1, 2.
‘Agmo Lilingwanan’
Aminpigan pinasakbayan nen Jehova so Israel: ‘Agmo lilingwanan.’ Aliwan lapud inilaloan to iran makanonot a nagnap ed amin a bengatla. Balet ag-ira komon masyadon okupado ed personal iran gegemtan a nalingwanan da la iray impideneng nen Jehova. Nepeg a pansiansiaen dan mabilay so pannodnonot da ed impangiliktar nen Jehova ed sikara sanen pinatey na anghel to so amin a panguloan na Ehipto ontan met sanen binelsay nen Jehova so Ambalangan Dayat tan insan to kinapotan, a nilener toy Faraon tan say armada to. Nepeg a nonoten na saray Israelita ya inter na Dios ed sikara so Ganggan to ed Palandey Sinai tan lapud satan et intonton to ra ed kalawakan ya anggad Insipan a Dalin. Ag-ira nepeg a makalingwan ed punton say pannodnonot da ed sarayan bengatla so mantultuloy a nawalaan na mabiskeg ya epekto ed inagew-agew a bilay da.—Deut. 4:9, 10; 8:10-18; Exo. 12:24-27; Sal. 136:15.
Sikatayo met so nepeg a manalwar ya agmakalingwan. Legan ya aarapen tayoray desdes ed bilay, nakaukolan tayon nonoten si Jehova, a lawas nonoten so klase to a Dios tan say aron impatnag to diad impangiregalo to ed Anak to, ya angitarya na dondon para ed saray kasalanan tayo ta pian nawalaan itayo na ayadyarin bilay ed ando lan ando. (Sal. 103:2, 8; 106:7, 13; Juan 3:16; Roma 6:23) Panamegley na maparanay a panagbasa ed Biblia tan say aktibon pibibiang ed saray miting ed kongregasyon tan diad lawak na ministeryo, mansiansian mabilay ed sikatayo irayan mabmablin katuaan.
Sano nidunget ed panagdesisyon, baleg man o melag, nonoten iratan a makanan katuaan, tan abuloyan iratan a mangimpluensia ed panagnonot mo. Agmo lilingwanan. Manilalo ed si Jehova para ed panangiwanwan. Imbes a basta moriaen iray pamaakaran manlapud minumundon pantalos odino manmatalek ed biglan pankaliktan na ag-ayadyarin puso, tepetan mo so inkasika, ‘Anton simbawa odino prinsipyo ed Salita na Dios so nepeg a misiglaotan ed desisyon ko?’ (Uli. 3:5-7; 28:26) Agmo nayarian a nonoten iray bengatlan agmo nin balot abasa odino nadngel. Balet legan a sika so ombubulaslas ed suston pikakabat tan diad panangaro ed si Jehova, onlaknab so agamoran mon pikakabat a nipapanonot ed sika na masanton espiritu, tan say ombabaleg a panangarom ed si Jehova so mamakiwas ed sika a mitunosan ed satan.