Pitatalosan Diad Panamegley na Sulat

SARAY sulat so amaaligwas ed bilay tan walna na minilyon a totoo. Maslak ed saray libro na Kristianon Griegon Kasulatan so diad orihinal et sulsulat. Nayarian tayoy mansulat natan ta pian napabiskeg iray balon mananisia, makapitalosan ed saray kakaaro, napaseseg iray agagin manasakbat ed nikaduma iran responsabilidad, napabiskeg iraman so manasagmak na kairapan, tan nipasabi so impormasyon a nakaukolan pian naasikaso iray aktibidad ed kongregasyon.​—1 Tes. 1:1-7; 5:27; 2 Ped. 3:1, 2.

Say sulat so sakey met ya epektibon paraan ed pampulong. Diad arum a pasen, nayarin walaray baryo tan arum iran pinegetan a lugar ya agnakalakalan pulongan. Walaray mabetbet ya anggapo ed abung, kanian agtayo ra nasabi sano manpulong itayo ed kabkaabungan. Arum so manaayam ed nisulinek iran pasen.

No maminsan et say sakit, agmarakep a panaon, odino ageteran ya oras ed paway so sengeg na agmo la pakapaway ed abung. Kasin nayarian mo so mansulat pian lalon napulongan so sakey a kanayon odino ed sakey ya akitongtongan mo lan impormal? Kasin inmalis so sakey ed saray iyaaralan mo na Biblia? Ompan nakaukolan to so sulat mo ta pian napansiansia ton mabilay so espiritual ya interes to. Odino nayari pan inabang mo so matukoy a Makasulatan ya impormasyon ed saraman so agano nin nankasal, nagmaliw ya atateng, odino inateyan na inad-aro.

Panagtasi Panamegley na Sulat

Sano mansulat a mantasi ed sakey ya agmo nin balot apilupaan, unona et ikabat mo so inkasika. Nayarin ipaliwawam a mibibiang ka ed sakey ya internasyonal a boluntaryon kimey. No ompatnag a matukoy a gawaen, salambiten a sakey ka ed Tastasi nen Jehova. Ipaamta ed too no akin a sika so nansulat imbes a pasyaren mon personal. Mansulat a singano mitotongtong kan mismo ed too. Insan, mitunosan ed direksion a “paneknekan yo so inkasikayon maalwar a singa saray uleg balet mauyamo a singa saray malapati,” asikasoen a maong no kaunongan ya impormasyon so nepeg mon ipaamta nipaakar ed inkasika.​—Mat. 10:16.

Ilaktip ed sulat no anto komon so ibagam ed too no sikato komon so napasyar mo. Nayarin itukoy mo so sakey ya introduksion a manlapud libron Reasoning odino mangusar na sakey a Makasulatan a presentasyon manlapud agano nin paway na Ministeryo Tayo ed Panarian. Nayarin mamalesa ka na sakey a tepet tan pasesegen so toon manisip nipaakar ed satan. Arum a manangipalapag so basta mangipaliwawa a sikatayo so walaan na libren programa diad pangebat ed saray tepet ed Biblia insan manalambit na pigara ed saray titulo na kapitulo ed sakey a katulongan ed panangiyaral tayo. Say sakey a pangaligan a sulat parad panagpulong so wala ed pahina 73. Nayarin pakalaan mo itan na ideya, balet ta maabig no umanen so lugan to. Tano andi, nayarin nasabi panaon et saray totoo so makaawat na naulit-ulit lan sulat.

Walaray totoon masuyat a mamasa ed andukey a sulat manlapud sakey ya agkabat. Kanian makabat a pansiansiaen ya antikey so sulat mo. No masyadon andukey so sulat mo say makaawat so nayarin nakesawan a mamasa. Matukoy so pangilaktip na sakey ya inimprintan imbitasyon ed saray miting ed Kingdom Hall. Nayarian mo met ya ilaktip so sakey a tract, sakey a brosyur, odino sakey a paway na Say Panag-Bantayan odino Awake! tan ipaliwawa a saraya so nayarin nipatulor a regular no labay to. Odino nayarian mon itepet no nayari kasin onla ed abung to pian nagkalalo nin itongtong ed sikato so teman sisingbaten.

Suhestion ed Panaggaway Porma na Sulat

Nengnengen so pangaligan a sulat. Imanoen so onggendan: (1) Malinis, aliwan akesekese. (2) Anggan nawatak so sobre, siansian nabasa na makaawat so ngaran tan address na nansulat. (3) Say gagala na sulat so nipaliwawan simpli tan direkta ed unonan parapo. (4) Kada manunan punto so atukoy ed biig a parapo. (5) Nisesengeg ed gagala na sulat, say sulat so aliwan impormal tan aliwa met a masyadon pormal.

Diad mas pormal a sulat, singa say sakey ya ipawit na sekretaryo ed kongregasyon ed sangan opisina, ilaktip so ngaran na kongregasyon, katekep na mismon ngaran na sekretaryo, address to, tan say petsa. Say ngaran tan address na too odino organisasyon a pangipatuloran ed sulat so itekep met. Saya so tumbokan na matukoy a panangibano. Diad pangisampot ed sulat, diad arum iran lenguahe say balikas a singa say “Sigagalang” odino “Mapagalang” so ompatnag ed tagey na pirma. Nepeg a pirmaan a mismo.

Diad dinanman a sulat, imanoen so manepeg ya espeling, gramatika, puntuasyon tan, siempre, inkalinis. Diad panggawa na ontan et mangiter na dignidad ed sulat mo tan diad mensahen lugan to.

Diad paway na sobre, aglilingwanan ya isulat so address a nanlapuan​—maabig no say mismon postal ya address mo. No liknaen mon aliwan makabat so pangiter ed mismon address mo sano manpupulong panamegley na sulat ed saray agkabat, tepeten ed saray mamatatken no abobonan da so pangusar mo ed address na lokal a Kingdom Hall. Agbalot uusaren so address na Watch Tower Society a para ed sayan gagala, unong ta saya so agsuston mangipatnag a say sulat mo so impawit a nanlapud opisina na Sosyedad tan pansengegan na kagotgot. No anggapo so address a nanlapuan tan wala so literaturan inlaktip, nayarin mangiter met iya na lingon impresyon a say Sosyedad so angipawit.

Seguroen a peketan mo na suston kantidad na selyo, nagkalalo la no angilaktip ka na literatura. No kulang so selyo, say makaawat so nayarin nasingil para ed kaaruman a bayar, tan saya so mamakapuy ed mensahem. Tandaan a diad dakel iran bansa no nilaktip so sakey a brosyur odino magasin, say bayar na selyo so mas mabli nen say kaukolan ed sulat labat.

Say Manepeg a Paraan

Bektan asumpal mo la so sulat mo, basaen pian talosan so lugan to. Antoy nikuan mo ed mensahe to? Kasin makaaro tan mataktika? Say aro tan panangasi so kalaktip ed saray kalidad a panggunaetan tayon ipatnag diad pidedeneng tayo ed arum. (Gal. 5:22, 23) No nalikas mo so negatibon paraan odino daiset a panduaruwa, umanen so inkisulat.

Nasabi na sakey a sulat iray pasen ya agmo nayarian a sabien. Sayan katuaan lambengat so mangiduma la ed satan ya uusaren ed ministeryo. Lapud say sulat mo so mangirepresenta ed sika tan ed saray bengatlan papablien mo, nonoten a maong no anto so ibabaga to, no panon so nengneng to, tan no antoy epekto to. Nayarin mangiter lambengat ed no anto so nakaukolan diad pangigapo, pamabiskeg, odino pamaseseg ed sakey a mablin kamarerwa a manakar ed dalan na bilay.