Nipanengneng so Interes ed Arum a Too

SANO inanabang ed arum iray katuaan na Biblia, kaukolan a mas ni so gawaen tayo nen say pakabatay nonot. Nepeg a sabien tayo so puso. Sakey a paraan na panggawa ed saya et diad pangipanengneng na masimoon a personal ya interes ed saray dumerengel tayo. Nipanengneng so ontan ya interes diad nanduruman dalan.

Imanoen so Punto-de-Bista na Saray Dumerengel Mo. Kinonsidera nen apostol Pablo so kipapasen na panagbilay tan mentalidad na saray onderengel ed sikato. Impaliwawa to: “Dia ed saray Judio, nagmaliw ak a singa Judio, ta pian naalak so saray Judio; dia ed saray wala ed silong na ganggan, singa wala ed silong na ganggan, anggan andi ak a dili ed silong na ganggan, ta pian naalak so saray wala ed silong na ganggan. Dia ed saray anggapo so ganggan, aliwa ya anggapo ak ed ganggan na Dios, noag dia ed silong na ganggan nen Kristo, pian naalak so saray anggapo so ganggan. Dia ed saray makapuy nagmaliw ak a makapuy, pian naalak so saray makapuy. Nagmaliw ak ya amin a ganagana ed amin day totoo, ta pian diad amin a gawa nilaban ko so saray arum. Tan gagawaen ko ra ya amin nisengeg ed ebanghelyo, pian makapinabang ak ed sikato.” (1 Cor. 9:20-23) Panon tayon ‘makapagmaliw ya amin a ganagana ed amin day totoo’ natan?

No walay pankanawnawam a mangimano ed arum, anggan magano labat, sakbay a mitongtong ed sikara, nayarin nanengneng moray pakapatnagan na interes tan sirkumstansya ra. Kasin nibagam no anto so anapan da? Kasin nanengneng moy ebidensya na relihyoson sisisiaen da? Kasin walay pamatnagan ed nengneng na panagbilay na pamilya ra? Base ed naobserbaan mo, kasin nitukoy mo so presentasyon mo ta pian lalon makapasagyat itan ed saray dumerengel mo?

Pian lalon makapasagyat so presentasyon mo, nakaukolan a nonoten mon masakbay no panon mon pitongtongan so totoo ed teritorya yo. Diad arum a pasen, laktipen na saya iramay taga arum a bansa. No saratan a totoo so manaayam la ed teritorya yo, kasin akaromog ka la na epektibon paraan na panpulong ed sikara? Lapud linawa na Dios ya “amin a nengneng na totoo so nilaban komon tan ondago ra ed suston pikakabat ed katuaan,” gawaen mon kalat so pangipresenta ed mensahe na Panarian diad makapasagyat a paraan ed amin a naabet mo.​—1 Tim. 2:4, NW.

Ontalineng a Maong. Anggaman nayarian nen Jehova a kabaten so amin a kaliktan to, sikato so ontatalineng ed arum. Naawat nen propeta Micaya so sakey a pasingawey a naimanon si Jehova so mamapaseseg ed saray anghel a mangibalikas na ideya ra nipaakar ed kaasikaso na sakey a pamaakaran. Diad saman et inabuloyan na Dios so sakey ed saray anghel a gawaen so insuheri na anghel. (1 Ara. 22:19-22) Sanen imbalikas nen Abraham so kapagaan to ed panangukom ya idapo ed Sodoma, si Jehova so mapangasin tinmalineng ed sikato. (Gen. 18:23-33) Diad ministeryo tayo, panon tayon naalig so ehemplo nen Jehova diad itatalineng?

Pasesegen so arum ya ibesngaw day liknaan da. Mangitepet na matukoy, tan ontunda pian ebatan da. Talinengen mon maong. Say sinononot a pangimanom so mamaseseg ed sikaran mansalitan bulobulos. No iparungtal na ebat da so bengatlan paniinteresan da, mataktika nin mantepet. Agka mangitetepet na dakel a personal iran bengatla noagta mataktika, panggunaetan a sikara so kabaten a nagkalalo. Komendaan ira lapud walan pakatalos da no nagawaan mon masimoon. Anggan agka mipakna ed opinyon da, maliket kan mangapresya ed saray imbalikas da.​—Col. 4:6.

Anggaman ontan, kaukolan itayon manalwar pian say interes tayo ed totoo so ag-onlampas ed saman so manepeg. Say pagmaliw tayon mapaga ed arum so agmangiter ed sikatayoy kanepegan pian pibalian so pribadon bilay da. (1 Ped. 4:15) Kaukolan itayon manalwar a say toon kasunian ed sekso so agnawalaan na lingon pantalos ed mapangasin interes ya ipapatnag tayo. Lapud say ipapasen a matukoy a panangipatnag na interes ed arum so manduruma ed balang nasyon, anggan diad sinansakey a totoo, kanian nakaukolan so maabig a pakatebek.​—Luc. 6:31.

Say panagparaan so sakey a tulong diad pagmaliw a maong a dumerengel. No malinew ed kanonotan tayo so mensahe tayo, tulongan to itayon manrelaks tan manimano ed arum diad natural a paraan. Saya so mamarelaks ed sikara tan lalon labay day mitongtong ed sikatayo.

Napagalangan tayoy arum diad italineng ed sikara. (Roma 12:10) Mangipatnag a papablien tayoray kanonotan tan liknaan da. Lapud satan et sikara ni ingen so lalon manimano ed walan ibaga tayo. Sirin, diad maabig a rason et sikatayo so sisimbawaen na Salita na Dios a “masiglat komon ya ondengel, mapalna ed pansalita.”​—Sant. 1:19.

Tulongan so Arum ya Onaligwas. Say panagpaga ed arum so managdag ed sikatayon lawas manisip ed saramay mangipanengneng na interes tan pawilen ira lamet pian inabang so katuaan na Biblia a direktan mamenek ed saray pankaukolan da. No nononoten so ipawil, konsideraen so naaralan mo nipaakar ed sikara diad saramay akaunan imbisitam. Mangiparaan na impormasyon ed sakey a teman manasaglawi ed sikara. Ipabitar so praktikal a kablian na suheto, a tulongan iran mantalos no panon so pakagunggonaan da manlapud aaralen da.​—Isa. 48:17.

No imparungtal na dumerengel ed sika so sakey a situasyon odino probleman mangugonigon ed sikato, saya so moriaen bilang nikaduman pankanawnawa pian inabang so maong a balita ed sikato. Tumboken so alimbawa nen Jesus, a lawas ya akaparaan a manligliwa ed saray nadedetdetan. (Mar. 6:31-34) Paliisan so pangiyopresi na maples a solusyon odino mangiter na palawpaw a simbawa. Lapud saya et nayarin liknaen na too ya andian ka na masimoon ya interes. Imbes, ipalikas so pililikna. (1 Ped. 3:8) Insan mansukimat ed nibase’d-Biblia iran publikasyon, tan inabang so makapabiskeg ya impormasyon ya ontulong ed toon mangarap ed kipapasen to. Siempre, say maaron pililiknam ed dumerengel mo so manebel ed sikan mangiparungtal ed saray kompidensyal a bengatlan imbaga to ed sika likud no wala so maabig a rason na panggawa ed ontan.​—Uli. 25:9.

Nagkalalo lan ipanengneng tayo so personal ya interes ed saraman so iyaaralan tayo na Biblia. Sipipikasin isipen tayo iray kakaukolan na kada iyaaralan, tan manparaan ed panagaral a sankanonot iratan a kakaukolan. Tepetan moy inkasika, ‘Anto so kaukolan ton gawaen ed ontumbok ta pian mantultuloy ya onaligwas ed espiritual?’ Simamaaron tulongan so iyaaralan a natalosan so ibabaga na Biblia tan saray publikasyon na “matoor tan makabat ya aripen” nipaakar ed satan. (Mat. 24:45) Diad arum a kipapasen, nayarin agmagenap so basta pangipaliwawa. Nayarin kaukolan mon ipanengneng ed iyaaralan no panon ton iyaplika so prinsipyo na Biblia, ya aktual mon gawaen so amin a bengatlan mangipanengneng no panon so panangiyaplika ed satan.​—Juan 13:1-15.

Nakaukolan so inkasimbang tan maabig a pakatebek sano tutulongan so arum a mangitukoy na bilay da ed saray estandarte nen Jehova. Saray totoo so walaan na nanduruman abenegan tan abilidad, tan nanduruma so kapeles na iyaaligwas da. Magmaliw a makatunongan ed walan iilaloan mo ed arum. (Fil. 4:5) Agmo ra dadagdagen a pasimbaloen day bilay da. Abuloyan so Salita na Dios tan espiritu to a mamakiwas ed sikara. Kaliktan nen Jehova a sikatoy panlingkoran na totoo a manlapud mabulos a puso, aliwan napipilitan. (Sal. 110:3) Paliisan so pangibalikas na dilin opinyon mo nipaakar ed personal iran dedesisyonan da, tan anggan sano kerewen na arum so opinyon mo, manalwar ya ag-ira idedesisyonan.​—Gal. 6:5.

Mangiter na Praktikal a Tulong. Anggaman si Jesus so manunan mapaga ed espiritual a pankaabigan na saray dumerengel to, sikato so sensitibo met ed arum a kaukolan da. (Mat. 15:32) Anggaman limitado so kayarian tayo, walaray dakel a praktikal a dalan pian makatulong itayo.

Say interes ed arum so managdag ed sikatayon magmaliw a makonsidera. Alimbawa, no say kipapasen na panaon so manidisturbo ed dumerengel mo, onalis ed mas matukoy a pasen, odino iyuksoy so pangituloy na diskusyon ed arum a panaon. No sika so binmisita ed aliwan kombenientin panaon, ibagan ompawil ka la ed arum ya agew. No sakey a kaabay odino sakey a toon interesado so maniinagem odino walad ospital, ipanengneng moy pililiknam diad pangipawit na kard odino antikey a sulat odino diad ipasyar ed sikato. No matukoy, nayarin ikdan mo na simplin nakan odino manggawa na bengatlan maabig.

Legan ya onaaligwas iray iyaaralan na Biblia, nayarin nalikna ra so emosyonal a kakulangan lapud aglara manguusar na malaem a panaon ed saray datin kalimog da. Kaaroen ira. Ipanaon so pitongtong ed sikara kayari na panagaral da ed Biblia tan diad arum niran panaon. Pasesegen iran mamayubo na maabig a pililimog. (Uli. 13:20) Tulongan iran onatende ed saray Kristianon miting. Onyurong ed abay da diad ontan iran pantitipon, tan tulongan iran mangasikaso ed ananak da ta pian amin so sigpot a nagunggonaan ed programa.

Impapuson Ipanengneng so Interes. Say pangipanengneng na interes ed totoo so, aliwan sakey a teknik a kabisadoen, noagta sakey a kalidad na puso. Say kinaaralem na interes tayo ed arum so mapatnag ed dakel a paraan. Nanengneng itan ed itatalineng tayo tan ed no anto so ibabaga tayo. Napatnagan itan panamegley na panangasi tan konsiderasyon ya inanatnat tayo ed arum. Anggan sano anggapo so ibabaga tayo odino gagawaen tayo, omparungtal itan panamegley na awawey tayo tan itsura na lupa tayo. No tuan mapaga itayo ed arum, andi-saew a napatnagan da itan.

Say sankaimportantian a rason ed pangipanengneng tayo na masimoon ya interes ed arum et lapud diad panggawa na ontan, aaligen tayo so panangaro tan panangasi na mangatatawen ya Ama tayo. Saya so ontulong pian onsingger iray dumerengel tayo ed si Jehova tan diad mensahen inter to’d sikatayon ikayat. Kanian, legan ya inanabang mo so maong a balita, panggunaetan a pansiansiaen so inengneng “aliwan diad personal a pankaabigan na inkasikayon dili, noagta ontan met ed personal a pankaabigan na arum.”​—Fil. 2:4, NW.