Mataktika Balet ta Mapekder

SAY inkataktika so abilidad a mideneng ed arum a totoo diad agmakaopendin paraan. Sasaglawien to so pikabat ed no panon tan no kapigan so pangibaga na bengabengatla. Agtutukoyen na saya so panangikompromiso ed no anto so maptek odino pamikewet ed katuaan. Agnepeg ya isiglaot so inkataktika ed takot ed too.​—Uli. 29:25.

Say bunga na espiritu so mangiiter na sankaabigan a pundasyon diad pagmaliw a mataktika. Sirin, say toon pinakiwas na aro so agmalabay a mamasyodot ed arum; sikaray labay ton tulongan. Say sakey a mapangasi tan mauyamo so maulimek ed paraan na panggawa to ed saray bengatla. Say toon mareen so mananap na dalan a mangiyalibansa ed maabig a relasyon ed saray arum. Anggaman saray totoo so mapasang, say sakey a manangitepel so mansiansian kalmado.​—Gal. 5:22, 23.

Balet, anggan panon so kipresenta na mensahe na Biblia, arum a totoo so naopende ed satan. Lapud marelmeng a kipapasen na puso na karaklan ed saray Judio nen inmunan siglo, si Jesu-Kristo so nagmaliw ed sikara a “sakey a bato a katiroran tan sakey a bato a kababaingan.” (1 Ped. 2:7, 8) Mitukoyan ed kimey na panangiyabawag to ed Panarian, inkuan nen Jesus: “Linma ak dia a mangiyan na apoy ed dalin.” (Luc. 12:49) Tan say mensahe na Panarian nen Jehova, a mangilaktip ed pankaukolan na totoon mamidbir ed inkasoberano na Manamalsa ra, so mantutultuloy ya inkaganatan ya isyu a nipapaarap ed katooan. Dakel a totoo so naopende ed mensahe a magano lan ekalen na Panarian na Dios so peles a marelmeng a sistema na bengabengatla. Balet, bilang katutulok ed Dios, itultuloy tayo so panagpulong. Anggaman ontan, legan a gagawaen tayo itan, nonoten tayo lawas so simbawa na Biblia: “No nayari, diad anganggaan na nayarian yo, manayam kayo ed kareenan ed ganaganay totoo.”​—Roma 12:18.

Mataktika Sano Manpupulong. Walaray dakel a sirkumstansya a nitongtong tayo ed arum so nipaakar ed pananisia tayo. Siempre, gawaen tayo so ontan sano walad lawak na ministeryo, balet anapen tayo met so matukoy iran pankanawnawa sano kaarap iray kakanayon, katrabahoan, tan kaeskuelaan. Diad amin na sarayan kipapasen, nakaukolan so inkataktika.

No ipresenta tayo so mensahe na Panarian ed paraan a liknaen na arum a sesermonan tayo ra, nayarin agda labay itan. No ag-ira papatulongan tan ompan agda kaukolan itan, nayarin naopende ira ed antokaman ya ipasagilig a panametek. Panon tayon napaliisan so pakapangiter na makapuy ya impresyon? Makatulong so panaral ed dunong na makaaron pitotongtong.

Panggunaetan ya igapo so pitotongtong diad pangiyarap na sakey a suheton makapainteres ed arum a too. No satan a too so kanayon, katrabahoan, odino kaeskuelaan, nayarin antam la no antoray makapainteres ed sikato. Anggan agmo nin balot nabet itan a too nensaman, nayarin igapom ed sakey a balitan nadngel mo odino abasam ed peryodiko. Say ontan iran suheto so mabetbet a mangipatnag na wala ed kanonotan na dakel a totoo. Sano mankakabkaabungan ka, magmaliw a maimano. Saray dekorasyon na abung, galaw-galaw ed laguerta, relihyoson kagawaan, tan saray isteker ed luluganan ya akaparada so nayarin mangiter na pamatnagan ed interes na unabung. Sano ompaway so unabung ed puerta, sikato so talinengen legan a mansasalita. Say ibaga to so balanglan mamekder odino mametek ed saray konklusyon mo nipaakar ed saray interes tan punto-de-bista to tan mangiter na kaaruman a pamatnagan ed no anto so kaukolan mon konsideraen ta pian makapanpulong.

Kaleganan na pantotongtong, inabang iray punton manlapud Biblia tan diad literaturan nibase’d-Biblia a mitukoyan ed tema. Balet agsusuloen so pansalita. (Ecl. 3:7) Pansalitaen mo so unabung no labay to. Imanoen iray panmoria tan opinyon to. Nayarin saraya so makapangitarya na pakapatnagan a kaukolan mo ta pian magmaliw a mataktika.

Sakbay mon ibaga iray bengatla, konsideraen no panon so panmoria na toon katongtong mo. Isisimbawa na Uliran 12:8 so ‘sangi na inkamakabat.’ Say Hebreon balikas a nausar dia so nisiglaot ed kaisipan a singa say pakatebek tan inkamakabat. Sirin, sasaglawien na inkamakabat so maalwar ed panagsalita bilang resulta na panisip a maong ed sakey a bengatla ta pian onkiwas a makabat. Diad bersikulo 18 na satan lanlamang a kapitulo na Uliran so mamapasakbay a sumpad ‘pansalita a botaktak a singa saray kisaksak na kampilan.’ Posible so pakapangitandoro ed katuaan na Biblia ya ag-itayo makapasakit.

Say basta pangipanengneng na pakatebek diad panagpili na saray salita so nayarin ontulong ed sikan napaliisay agnakakaukolan ya isusuppiat. No say pangusar ed terminon “say Biblia” so pansengegan na isuppiat, nayarin usaren mo so balikas a singa say “masanton sulsulat” odino “sakey a libron nipapalapag la natan ed masulok a 2,000 lenguahe.” No tukoyen mo so Biblia, nayarin tepeten mo so opinyon to ed satan insan ikonsideram iray komento to anggad sampot na tongtongan yo.

Mabetbet a lalanoren na inkamataktika so panetermina ed dugan panaon a pangibaga ed saray bengatla. (Uli. 25:11) Nayarin agka mipakna ed amin ya ibaga na too, balet ta agnakaukolan a suppiaten so kada agmakasulatan a panmoria to. Agmo sasalien ya ibagan maminpinsan ed unabung so amin a bengatla. Imbaga nen Jesus ed saray babangatan to: “Wala ni amayamay a bengatlan ibagak ed sikayo, balet agyo ni nayarian iran talosan natan.”​—Juan 16:12.

No nayari, masimoon a komendaan iraman so pitongtongan mo. Anggan sano masangsang so unabung, siansian nayarian mon komendaan lapud pananisia to ed sakey a punto-de-bista. Ontan so ginawa nen apostol Pablo sanen nansalita ed saray pilosopo ed Areopago diad Atenas. Saray pilosopo so “akisangsangan ed sikato.” Panon ton pinabitar so punto to ya ag-akaopende? Diad akadkauna et naimano to la so dakerakel ya altar a ginawa ra parad dirios da. Imbes a kinondena toray taga-Atenas ed panagtalintao ra, mataktikan kinomendaan to ra ed inkarelihyoso ra. Inkuanto: ‘Nanengneng ko a mapagalang kayon tuloy ed pidiosan nen say arum.’ Sayan paraan so angilukas na dalan pian nipresenta to so mensahe to nipaakar ed tuan Dios. Bilang resulta, arum so nagmaliw a mananisia.​—Gawa 17:18, 22, 34.

Ag-onaalinsuag sano walaray isusuppiat. Mansiansian kalmado. Saraya so moriaen bilang pankanawnawa pian natebek so walad kaisipan na too. Nayarin pisalamatan mo diad impangibalikas to’d saray panmoria to. Anto no bigla-bigla ton ikuan: “Wala lay relihyon ko”? Nayarin itepet mo ed mataktikan paraan: “Kasin sika so relihyoso lan too ed interon bilay mo?” Insan, kayari na ebat to, ituloy: “Kasin isipen mon nasabi panaon et amin a totoo so mankakasakey ed sakey a relihyon?” Nayarin saya so mangilukas na dalan ed mantultuloy nin tongtongan.

Natulongan itayon magmaliw a mataktika no walaan itayo na manepeg a panmoria ed inkasikatayo. Kombinsido itayon malet ed inkaptek na saray dalan nen Jehova tan diad inkamatua na Salita to. Mansalita itayo a walaan na talek nipaakar ed sarayan bengatla. Balet anggapoy rason tayo pian magmaliw a matunong ed sikatayon dili. (Ecl. 7:15, 16) Misalsalamat itayon naamtaan so katuaan tan panggayagaan so bendisyon nen Jehova, balet kabat tayon maong a say impangabobon to ed sikatayo et resulta na agkanepegan a panangasi to tan say pananisia tayo ed si Kristo, aliwan resulta na dilin inkatunong tayo. (Efe. 2:8, 9) Bidbiren tayo so pankaukolan na ‘pantultuloy a suboken no kasin wala itayo ed pananisia, a mantultuloy a paneknekan no anto itayo ed sikatayon dili.’ (2 Cor. 13:5) Kanian no itongtong tayo ed totoo so nipaakar ed pankaukolan na panumbok ed saray kakaukolanen na Dios, mapaabeba tayo ya iyaplika met ed inkasikatayo so simbawa na Biblia. Anggapoy kanepegan tayon mangukom ed kapara tayon too. Si Jehova “so angiter na amin a panangukom ed Anak,” tan diad arap na panangukoman to et sikatayo so onebat unong ed gawaen tayo.​—Juan 5:22; 2 Cor. 5:10.

Diad Pamilya tan Kapara Iran Kristiano. Aliwa labat a diad lawak na ministeryo so pangikanaan tayoy taktika. Lapud say taktika so sakey a panangipatnag na bunga na espiritu na Dios, nepeg ya ipatnag tayo met so taktika ed abung sano midedeneng tayo ed saray membro na pamilya. Sikatayo so pakiwasen na aro a mangipanengneng na pililikna ed arum. Say asawa nen Reyna Ester so aliwan managdayew ed si Jehova, balet ta impatnag nen Ester so respeto tan baleg a pakatebek ed sikato sanen impresenta to ed asawa to iray pamaakaran ya anaglawi ed saray lingkor nen Jehova. (Ester, kap. 3-8) Diad arum iran kipapasen, nayarin kaukolan so inkamataktika diad pidedeneng ed saray membro na pamilyan aliwan-Tasi a say kondukta tayo komon, imbes a say pangipaliwawa ed sisisiaen tayo, so mangiparungtal na katuaan ed sikara.​—1 Ped. 3:1, 2.

Mipadpara, lapud ta no kabisado tayon maong iray membro na kongregasyon et agto labay ya ibagan magmaliw itayon bugta-bugtak odino mapasang ed sikara. Agtayo ikakatunongan a lapud matakken ira’d espiritual et nitepel da la so kipapasen ya agmanreklamo. Nisay manbaraan itayo diad pangibagan: “Ontan ak a talaga lanti.” No naimano tayon say paraan na panangibalikas tayo so makaopende ed arum, nepeg a determinado itayon manguman. Say “agkomon naumas ya aro [tayo] ed sakey tan sakey” so mamakiwas ed sikatayon “manggawa na maabig . . . ed saray kaamong na pananisia.”​—1 Ped. 4:8, 15; Gal. 6:10.

Sano Mansalita ed Dumerengel. Saramay manpaliwawa ed plataporma so kaukolan met a mataktika. Saray dumerengel so tugyopen na totoon manlapud nanduruman panagbilay tan sirkumstansya. Sikara so walad nanduruman kipapasen na espiritual ya aligwas. Arum so nayarin primero ray onatendi ed Kingdom Hall. Arum so nayarin manasagmak na gonigon ya agkabat na mansasalita. Antoy ontulong ed sakey a managpaliwawa pian agto naopende iray dumerengel to?

Mitunosan ed simbawa nen apostol Pablo ed si Tito, gawaen mon kalat ‘so agpansalita na mauges nipaakar ed anggan siopaman, . . . maong komon so linawam, ya ipanengneng so amin a kauyamoan ed saray amin a totoo.’ (Tito 3:2) Ag-aaligen so mundo diad panangusar to ed saray terminon mangipabpaabeba ed totoo na sananey a rasa, lenguahe, odino nasyonalidad. (Apoc. 7:9, 10) Prangkan isingbat iray kakaukolanen nen Jehova, tan ipanengneng so kakabatan na pangiyaplika ed saraya; balet agmansasalita na panleglemew ed saramay agni sigpot a manaakar ed dalan nen Jehova. Imbes, pasesegen so amin a manebek ed linawa na Dios tan gawaen so makapaliket ed sikato. Palemeken iray salita na simbawa tekep na ampetang tan masimoon a komendasyon. Diad paraan na pansalitam tan tono na boses mo, ipasabi so inaagin aro a nepeg a niwala ed balang sinansakey ed sikatayo.​—1 Tes. 4:1-12; 1 Ped. 3:8.