Kapitulo Dies
Sakey a Panarian “Ya Aglan Balot Naderal”
1. Anton katuaan so ipapabitar na saray nagagawa ed mundo diad interon awaran na too?
IPAPABITAR na saray inagew-agew a nagagawa ed mundo so katuaan ya ag-aromog na totoo so liket diad impangipulisay ed inkasoberano nen Jehova tan sasalien dan uleyan so inkasikara. Anggapoy sistema na gobiernoy too ya akapangitarok na paraparan gunggona ed katooan. Anggaman apaaligwas na totoo so sientipikon pikakabat da ed malaklaknab a paraan, agda ayarian a punasen so sakit odino panganggaen so ipapatey, anggapo anggano ed sakey. Agnaekal na uley na too so bakal, karawalan, krimen, kapikewetan, odino kairapan. Saray managpairap a gobierno so siansian manguuley ed totoo diad dakel a daldalin. (Eclesiastes 8:9) Say teknolohiya, inkaagum, tan inka-ignorante so nantetekep a sengegan na karurutakan na dalin, danum, tan dagem. Say aliwan panangimaneho na saray opisyal ed ekonomya so mamapairap ed dakel a makagamor ed saray kakaukolan ed bilay. Say nilibo-libon taon ya uley na too so amabitar ed sayan katuaan: “Say dalan na too anggapo ed sikato lanlamang; aliwa a wala ed too a manakar a mangitonton ed saray kurang to.”—Jeremias 10:23.
2. Anto so alenleneg a solusyon ed saray problema na katooan?
2 Anto so solusyon? Say Panarian na Dios, a satan so imbangat nen Jesus ed saray babangatan to ya ipikasi: “Onsabi komon so panarian mo. Nagawa komon so linawam, unong ed tawen, ontan met ed dalin.” (Mateo 6:9, 10) Adeskribe so mangatatawen a Panarian na Dios diad 2 Pedro 3:13 bilang “saray balo a tawen,” a manuley ed “dalin a balo,” salanti, say matunong a sosyedad na too. Ontanlan kaimportante so mangatatawen a Panarian na Dios a satan so manunaan a tema ya impulong nen Jesus. (Mateo 4:17) Impanengneng ton satan so nepeg a manuna ed saray bilay tayo, ya impaseseg to: “Ingen anapen yo nin unona so panarian, tan say inkatunong to.”—Mateo 6:33.
3. Akin a say panaral nipaakar ed Panarian na Dios so sankaganatan natan?
3 Say panaral nipaakar ed Panarian na Dios so sankaganatan natan, lapud satan a Panarian so onkiwas la pian salatan ed ando lan ando so pananguley ed sayan dalin. Impasakbay na Daniel 2:44: “Dia ed saray agew naani na saratan ya arari [saray gobiernon manuuley natan], say Dios na tawen mamaalagey naani na sakey a panarian [ed tawen] ya anggan kapigan agnaani naderal tan say pananguley to agnaani niiter ed sananey a baley [aglan balot lamet uleyan na totoo so dalin]: balet buybuyaken to naani tan upoten to naani so saraya ya amin a [peles a] panarian, et sikato so mansiansia lawas.” Sirin, panampoten la na Panarian irayan kaunoran ya agew diad paneral to ed sayan interon marelmeng a sistema na bengabengatla. Diad satan et agla nasuppiat so pananguley ed dalin na mangatatawen a Panarian. Agaylan misalsalamat itayo ta say inawan itarok na saya so asingsingger la!
4. Misiglaotan ed Panarian, anto so agawa ed tawen nen 1914, tan akin ya importante itan ed sikatayo?
4 Nen 1914, nitrono si Kristo Jesus bilang Ari tan apabtangan a ‘manuley ed pegley na saray kakabusol to.’ (Salmo 110:1, 2) Ontan met ed saman a taon, “saray kaunoran ya agew” na sayan peles a marelmeng a sistema na bengabengatla so ginmapo. (2 Timoteo 3:1-5, 13) Diad saman met a panaon, saray ebenton anengneng nen Daniel ed mapropetikon pasingawey so peteg ya agawa ed tawen. Say ‘Inkadaan na saray Agew,’ si Jehova a Dios, so angipabtang ed Anak na too, si Jesu-Kristo, “na panuley, tan gayaga, tan sakey a panarian, ya amin so saray baley, saray nasyon, tan pansasalita manlingkor ira komon ed sikato.” Nanreport nipaakar ed pasingawey, oniay insulat nen Daniel: “Say panuley to sikato so lawas a panuley, a sikato so agnaani onlalabas, tan say panarian to ed satan sikato so agnabagbag.” (Daniel 7:13, 14) Diad panamegley na sayan mangatatawen a Panarian ed lima nen Kristo Jesus a panggayagaen na Dios iray manangaro ed inkatunong ed saray daakan a maabig a bengatla a ginagala to sanen impasen to so inmunan paris a too ed Paraiso.
5. Antoran detalye nipaakar ed Panarian so makapainteres a tuloy ed sikatayo, tan akin?
5 Kasin pilalek mo so magmaliw a matoor ya uuleyan na Panarian? No ontan, magmaliw kan interesadon maong ed inkiyuksoy tan kurang na sayan mangatatawen a gobierno. Labay mon amtaen no anto natan so gagawaen la na satan, no anto so gawaen to ed arapen, tan no anto so kakaukolanen to ed sika. Legan ya uusisaen mon maong so nipaakar ed Panarian, say apresasyon mo ed satan so ombulaslas. No manpasakop ka ed pananguley to, sika so lalon natulongan diad pangibaga ed arum nipaakar ed saray makapakelaw a bengatlan gawaen na Panarian na Dios ed matulok a katooan.—Salmo 48:12, 13.
Saray Manuley ed Panarian na Dios
6. (a) Panoy pangipanengneng na Kasulatan no siopan inkasoberano so nipatnag diad panamegley na Mesianikon Panarian? (b) Panon itayon naapektaan ed naaralan tayo nipaakar ed Panarian?
6 Sakey ed saray unonan bengatla ya iparungtal na ontan a panangusisa et sayan Mesianikon Panarian so sakey a pakapatnagan na mismon inkasoberano nen Jehova. Si Jehova so angiter na “panuley, tan gayaga, tan sakey a panarian” ed Anak to. Sanen niiter la ed Anak na Dios so pakayarin onggapon manuley bilang Ari, matukoy ya inyabawag na saray boses ed tawen: “Saray nanarian na mundo agawa ran nanarian na Katawan tayo [si Jehova a Dios] tan si Kristo to: tan manari [si Jehova] ed ando lan ando.” (Apocalipsis 11:15) Sirin antokaman a naimano tayo nipaakar ed sayan Panarian tan no anto so gagawaen na satan so mamaapit ed sikatayo ed si Jehova a mismo. Say naaralan tayo so nepeg a mangipaslep ed sikatayo na pilalek a manpasakop ed inkasoberano to ed ando lan ando.
7. Akin a nagkalautlan makapainteres ed sikatayo a si Jesu-Kristo so Aturon Manangilaman a Manuley nen Jehova?
7 Konsideraen met so katuaan ya introno nen Jehova si Jesu-Kristo bilang Aturon Manangilaman a Manuley. Bilang Marundunong a Komikimey ya inusar na Dios diad impanggawa ed dalin tan totoo, mas kabat nen Jesus iray kakaukolan tayo nen say sikatayo. Nagkalalo ni, nanlapud gapo na awaran na too, impanengneng to so ‘gayaga to ed saray anak na totoo.’ (Uliran 8:30, 31; Colosas 1:15-17) Ontan lan kabaleg so panangaro to ed totoo a sikato so personal a linma dia ed dalin tan insaklang toy bilay to bilang dondon ed sikatayo. (Juan 3:16) Sirin intarya to ed sikatayo so paraan na kibulos manlapud kasalanan tan patey tan say pankanawnawa para ed maandon bilay.—Mateo 20:28.
8. (a) Miduma ed saray pananguley na too, akin a say gobierno na Dios so magnayon? (b) Antoy pisiglaotan na “matoor tan makabat ya aripen” ed mangatatawen a gobierno?
8 Say Panarian na Dios so sakey a gobiernon maligen tan magnayon. Nipaseguro so inkamagnayon na satan diad katuaan a si Jehova a mismo so ag-ompatey. (Habacuc 1:12) Miduma ed saray ararin totoo, si Jesu-Kristo, ya angimatalekan na Dios na inkaari, so agmet ompatey. (Roma 6:9; 1 Timoteo 6:15, 16) Nikasakey ed si Kristo diad mangatatawen iran trono so 144,000 nin arum, matoor iran lingkor na Dios a nanlapud “balang kailalakan, tan salita tan baley, tan nasyon.” Saraya met so naikdan na imortal a bilay. (Apocalipsis 5:9, 10; 14:1-4; 1 Corinto 15:42-44, 53) Karaklan ed sikara so wala la ed katawenan, tan say nakdaan a wala ni ed dalin so manitibukel na peles a “matoor tan makabat ya aripen,” a sitotoor a mamapalaknab ed saray intereses a nisiglaot ed satan a Panarian.—Mateo 24:45-47.
9, 10. (a) Anton manangapag, pikewet iran impluensya so ekalen na Panarian? (b) No agtayo labay so magmaliw a kakabusol na Panarian na Dios, antoran pakagotgotan so nepeg tayon paliisan?
9 Maganggano la, diad aturon panaon to, pakiwasen la nen Jehova iray manamatey a puersa to a manlinis ed dalin. Deralen dan ando lan ando iramay totoon pinili ran mismo ya ipulisay so inkasoberano to tan saramay manludlurey ed saray maaron itatarya to diad panamegley nen Jesu-Kristo. (2 Tesalonica 1:6-9) Satan so agew nen Jehova, say abayag-lan-aalagden a panaon ed kaalangon to bilang Sankatalbaan a Soberano. “Nia! Say agew nen Jehova onsabi, masulit, pati petang tan masebeg a sanok, . . . tan bagbagen to so saray managkasalanan to a manlapu ed sikato.” (Isaias 13:9) “Satan ya agew sikato so agew na sanok, agew na gonigon tan irap, agew na kabagbag tan pankibalatar, agew na bilunget tan uddiem, agew a malurem tan makapal a bilunget.”—Sofonias 1:15.
10 Amin a palson relihyon tan amin a gobierno na too tan saray armada ra, a pinakurang na agnanengneng a marelmeng a manuley na sayan mundo, so naderal la ed ando lan ando. Amin a midapag ed sayan mundo diad pambilay dan binubukor, matila, tan imoral so naderal. Agla makapideneng si Satanas tan saray demonyo to ed saray manaayam ed dalin, a nipisok la ran malet ed kaaralman diad sanlibon taon. Diad satan say Panarian na Dios so sigpot lan mangontrol ed amin a kurang diad dalin. Agaylan pakainawaan na amin a manangaro ed inkatunong!—Apocalipsis 18:21, 24; 19:11-16, 19-21; 20:1, 2.
Saray Gagala na Panarian—No Panon a Nagamoran
11. (a) Panoy panumpal na Mesianikon Panarian ed gagala nen Jehova para ed dalin? (b) Antoy kabaliksan na uley na Panarian para ed totoon manbilay ed satan diad dalin?
11 Sigpot a sumpalen na Mesianikon Panarian so orihinal a gagala na Dios a para ed dalin. (Genesis 1:28; 2:8, 9, 15) Anggad sayan agew, sinmaew so totoon manuporta ed satan a gagala. Anggaman ontan, “say [panayaman] a mundo ya onsabi” so nisilong ed Anak na too, si Jesu-Kristo. Amin a makaliktar ed kipaakseb na panangukom nen Jehova ed sayan daan a sistema so mankakasakey a mankimey ed silong nen Kristo ya Ari, a panliketan dan gawaen so antokaman a panangiwanwan to, ta pian say dalin so magmaliw a sankagloboan a paraiso. (Hebreos 2:5-9) Panliketan la na amin a totoo so sagpot na lima ra tan sigpot iran nagunggonaan ed inkadaakan na bunga na dalin.—Salmo 72:1, 7, 8 , 16-19; Isaias 65:21, 22.
12. Panoy kitarok na inkayadyari ed nonot tan laman na saray uuleyan na Panarian?
12 Sanen apalsa si Adan tan Eva, sikaray ayadyari, tan gagala na Dios para ed dalin a napano itan na ilalak da, a panggayagaan dan amin so inkayadyari ed nonot tan laman. Diad silong na uley na Panarian, satan a gagala so sankarakpan a nagawa. Kaukolan na saya so kaekal na amin ya epekto na kasalanan, tan para ed satan a gagala, ya aglabat la manserbi si Kristo bilang Ari noagta bilang Atagey a Saserdote met. Maanos ton tulongan iray matulok ya uuleyan to pian nagunggonaan ira ed mananakbong-kasalanan a bili na bagat na dilin bilay to bilang too.
13. Antoran pisikal a gunggona so nagamoran diad silong na uley na Panarian?
13 Diad silong na uley na Panarian, naeksperiensya na saray manaayam ed dalin so makapakelaw iran pisikal a gunggona. “Satan la nilukas so saray mata na bulag, tan say layag na saray telek nibuang naani. Satan la manlukso so piley a singa sakey ya ulsa, tan say dila na emel mankanta naani.” (Isaias 35:5, 6) Say laman a kinmumanet lapud inkatakken odino sakit so magmaliw lan tartariwa nen say laman na ugaw, tan say manlelen ikakapuy so sandian la na maligsan bunigas. “Say laman to sikato naani tartariwa nen say laman na ugaw; sikato ompawil ed saray agew na kaugawan to.” (Job 33:25) Onsabi agew sano anggapo lay mangikuan, “Mabeblay ak.” Akin? Lapud saray totoon matakot-ed-Dios so nainawaan la manlapud detdet na kasalanan tan saray makapasinagem ya epekto na satan. (Isaias 33:24; Lucas 13:11-13) On, “punasen [na Dios] so amin a lua ed kamataan da; tan andi gapo la naani ipatey; tan anggapo la naani onnangis o dageyem, o ot-ot: ta saray una a bengatla sikara so linmabas la.”—Apocalipsis 21:4.
14. Anto so lalanoren na pakagamor ed inkayadyari na too?
14 Anggaman ontan, nagkalalo ni so nalalanor diad pakagamor ed inkayadyari nen say pakawalaan na mabunigas a laman tan nonot. Lalanoren na satan so pangipatnag ed saray kalidad nen Jehova, lapud sikatayo so agawa ‘unong ed kaulibay na Dios, diad inalageyan to.’ (Genesis 1:26) Pian nagegemtan itan, nakakaukolan so malaem ya edukasyon. Diad balon mundo, ‘panayaman itan na inkatunong.’ Sirin, singa impasakbay nen Isaias, “saray manaayam ed mundo aralen da so inkatunong.” (2 Pedro 3:13; Isaias 26:9) Sayan kalidad so mangitonton ed kareenan—ed baetan na totoo ed amin a rasa, ed utel na saray maapit a kalimog, diad pamilya na sakey tan, manuna ed amin, diad Dios a mismo. (Salmo 85:10-13; Isaias 32:17) Saramay manaral na inkatunong so mantultuloy a nabangatan ed no anto so linawa na Dios ed sikara. No pirmin onlalamot so aro ed si Jehova diad kapusoan da, tumboken da iray dalan to ed amin ya aspekto na bilay da. Nayarian dan ibaga so inkuan nen Jesus, ‘gawaen kon lawas iray bengatlan makapaliket ed si Amak.’ (Juan 8:29) Agaylan makapaliket a bilay sano tuan nagawa itan ed amin a katooan!
Sankanengneng La Iray Agawaan
15. Diad pangusar ed saray tepet ed sayan parapo, ipabitar iray agawgawaan na Panarian tan ipaimano no anto so nepeg tayon gagawaen la natan.
15 Mapatnag la iray makapasagyat ya agawaan na Panarian na Dios tan saray uuleyan na satan. Saray onggendan a tepet tan teksto so mangipanonot ed sika na arum ed sarayan agawaan, ontan met ed saray bengatlan nagawaan tan nepeg a gawaen la natan na amin ya uuleyan4 na Panarian.
Siopa so inmunan pinagit na Panarian, et antoy nansumpalan? (Apocalipsis 12:7-10, 12)
Say panagtipon ed nakekeraan a membro na anton grupo so inikdan na imano nanlapula’d inkitrono nen Kristo? (Apocalipsis 14:1-3)
Anton kimey so impasakbay nen Jesus a gawaen to kayari ibetag na baleg a kairapan, a singa nikurit ed Mateo 25:31-33?
Anton pagpaunan kimey so nagagawa natan? Sioparay mibibiang ed satan? (Salmo 110:3; Mateo 24:14; Apocalipsis 14:6, 7)
Akin ya agnapatunda na saray mapolitika tan relihyoson sumusumpa so kimey na panagpulong? (Zacarias 4:6; Gawa 5:38, 39)
Antoran pananguman so agawa ed bilay na saramay nampasakop ed uley na Panarian? (Isaias 2:4; 1 Corinto 6:9-11)
Panarian ed Loob na Sanlibon Taon
16. (a) Panon kabayag so panuley nen Kristo? (b) Antoran makapakelaw a bengatla so nagawa legan tan kayari na satan a panaon?
16 Kayari na kikalinsurong nen Satanas tan saray demonyo to, si Jesu-Kristo tan saray 144,000 a kaiba ton mananawir so manuley bilang arari tan saserdote ed sanlibon taon. (Apocalipsis 20:6) Legan na satan a panaon, nitarok so katooan ed inkayadyari, a naandi la ed ando lan ando so kasalanan tan Adamikon patey. Diad sampot na Sanlibon Taon ya Uley, “iter [nen Jesus] so panarian” ed Ama to, “pian say Dios wala ed amin ed ami ganagana” lapud matalonan asumpal toy kimey to bilang Mesianikon Arin-Saserdote. (1 Corinto 15:24-28) Diad satan a punto, nibulos a magano si Satanas pian suboken so arondon a katooan no nipaakar ed pananuporta ra ed sankatalbaan ya inkasoberano nen Jehova. Kasumpal na satan ya unor a subok, galpongen la nen Jehova si Satanas tan saray rebeldin dinmapag ed sikato. (Apocalipsis 20:7-10) Saramay angitandoro ed inkasoberano nen Jehova—say kanepegan ton manuley—so sigpot lan angipanengneng ed satan na ag-ontayer a katooran da. Sikara la ed satan so nitarok ed manepeg a pisisiglaotan da ed si Jehova, a sikara lay awaten to bilang ananak ton lalaki tan bibii, a madibinon naabobonan para ed andi-anggaan a bilay.—Roma 8:21.
17. (a) Anto so nagawa ed Panarian diad sampot na sanlibon taon? (b) Diad anton pantalos a petepeteg a say Panarian so ‘agnaderal’?
17 Sirin, say dilin betang nen Jesus tan say 144,000 so nauman no nipaakar ed dalin. Anto kasi so arapen a kimey da? Agla ibabaga na Biblia. Balet no itandoro tayon sitotoor so inkasoberano nen Jehova, manbilay itayo ed sampot na Sanlibon Taon ya Uley pian naamtaan tayo no anto so gagala nen Jehova parad sikara tan ontan met ed makapakelaw a talba to. Anggaman kuan, say sanlibon-taon a panuley nen Kristo so “lawas” tan say Panarian to so “agnabagbag.” (Daniel 7:14) Diad anton pantalos? Nisengeg ed sakey a bengatla, say autoridad na pananguley so agnipalima ed arum a walaan na miduman getma, ta si Jehova so Manuley. Ontan met, say Panarian so ‘agnaderal’ lapud saray nagawaan to so magnayon lawas. (Daniel 2:44) Tan say Mesianikon Arin-Saserdote tan saray katambayan toran arin-saserdote so ando lan andon napagalangan lapud matoor a serbisyo ra ed si Jehova.
Repason Pantongtongan
• Akin a say Panarian na Dios so alenleneg a solusyon ed saray problema na katooan? Kapigan so igapon panuley na Ari ed Panarian na Dios?
• Anto so nagkalalo lan makapasagyat ed sika nipaakar ed Panarian na Dios tan anto so gawaen na satan?
• Antoran agawaan na Panarian so nanenengneng tayo la, tan anto so betang tayo ed saraya?
[Litrato ed pahina 92, 93]
Diad silong na Panarian na Dios, amin a totoo so manaral na inkatunong