Sikayoran Kalangweran—Anto so Gawaen Yo ed Bilay Yo?

“LABAY kon nagamoran so sankaabigan ed bilay ko.” Ontan so inkuan na sakey a tin-edyer a bii. Seguradon ontan met so labay yo. Balet panon yon nagamoran so “sankaabigan” ed bilay? Say media tan saray kalimog yo, nayarin pati saray maestra o maestro yo, so mangikuan a nadampot itan diad pananap na dakel a kuarta tan panggayaga ed bantog a karera​—pagmaliw a matalona!

Anggaman ontan, papasakbayan na Biblia iray kalangweran a say pangegemtan na itatalona ed materyal so singa “panguusil ed dagem.” (Eclesiastes 4:4) Say sakey a rason et pigpigaran kalangweran so talagan makakadampot na kayamanan tan inkabantog. Tan saraman so makakadampot so mabetbet a pirmin nagogonigon. “Singa itan kahon ya anggapoy karga,” so impangikuan na Britanon kalangweran ya angegemtan na bantog ya akademikon karera. “No imanoen moy loob, anggapoy iyan to.” Tua, no maminsan say trabaho so mangitarok na kayamanan tan pakabidbiran. Balet agnapenek na satan so “espiritual a pankaukolan” yo. (Mateo 5:​3, NW) Likud ni, ipapasakbay na 1 Juan 2:​17 a say “mundo [so] mangangga.” Anggan no nadampot mo so itatalona ed sayan mundo, ag-itan manbayag.

Kanian papasesegen na Eclesiastes 12:1 iray kalangweran: ‘Nonot yo met so Manamalsa yo dia ed saray agew na inkaugaw yo.’ On, say sankaabigan a posiblin dalan a pangusar yo ed bilay yo et diad serbisyo ed si Jehova a Dios. Balet, unona et nepeg ya onkualipika kayo ed serbisyo ed Dios. Panon yon nagawaan itan? Tan anto so lalanoren na serbisyo ed Dios?

Onkualipika a Magmaliw a Tasi nen Jehova

Unona, nepeg yon bayuboan so pilalek a manlingkor ed Dios​—tan satan a pilalek so aliwan automatiko, anggano Kristiano iray atateng yo. Nepeg a nawalaan kayo na dilin relasyon ed si Jehova. “Say pikakasi so ontulong ed sikan nawalaan na dilin relasyon ed si Jehova,” so inkuan na tin-edyer a bii.​—Salmo 62:8; Santiago 4:8.

Ipapabitar na Roma 12:​2, unong ed New World Translation, so sananey nin kundang a nepeg yon gawaen. Inkuanto: “Paneknekan yo’d inkasikayo so maong tan makapaliket tan nasnaspot a linawa na Dios.” Kasin asali yo lay nanduaruwa ed pigaran bengatla a nibangat ed sikayo? Sirin tumboken so bilin na Biblia, tan ‘paneknekan yo ed inkasikayo’ a tua irayan bengatla! Mansukimat kayon mismo. Basa yo so Biblia tan say nibase ed Biblia iran palapagan. Balet, say panaral nipaakar ed Dios et aliwa labat a nipaakar ed pangusar na nonot pian analisaen iray katuaan. Mangigana na panaon a mandalepdep ed no anto so babasaen yo pian ompaslep itan a maong ed piguratibon puso yo. Saya so mamabulaslas na panangaro yo ed Dios.​—Salmo 1:​2, 3.

Insan, panggunaetan so impormal a panginabang ed nanaaralan yo, nayarin diad saray kaeskuelaan yo. Say ontumbok a kundang et say pampulong ed kabkaabungan. Nayarin sagpaminsan a makaabet kayo na kaeskuelaan yo diad panpulong yo, tan satan so pakanerbiyosan yo diad primero. Balet papasesegen itayo na Biblia ya ‘ag-ibaing so ebanghelyo.’ (Roma 1:16) Itatarok yo so mensahe nipaakar ed bilay tan ilalo! Akin ya ibaing itan?

Natan, no Kristiano iray atateng yo, nayarin akapiulop kayo la ed sikara ed sayan kimey. Balet kasin mas ni so nagawaan yo nen say akatanyareg labat ed puerta odino mangipalima labat na saray magasin odino tract? Kasin makapansalita kayon mismo diad puerta, ya usaren so Biblia pian ibangat so unabung? No andi, patulongan kayo ed atateng yo odino ed sakey a matatken ed espiritual a membro na kongregasyon. Gawaen yon kalat so onkualipika bilang agbautismadon manangipalapag na maong a balita!

Nasabi panaon, napakiwas kayon mangidedika​—mansamba ed Dios a manlingkor ed sikato manlapu la’d natan. (Roma 12:1) Balet, say dedikasyon so aliwa labat a pribadan pamaakaran. Kakaukolanen na Dios so amin a manggawa na “mapublikon deklarasyon parad kilalaban.” (Roma 10:​10, NW) Diad panaon na bautismo, unona et manggawa kayo na insalitan deklarasyon na pananisia yo. Ontumbok so bautismo ed danum. (Mateo 28:​19, 20) Tua, say bautismo so seryoson kundang. Balet agkayo magmamaliw a masuyat lapud liknaen yon ompano onsaew kayo. No mandependi kayo ed biskeg ya iter na Dios, ikdan to kayo na “pakapanyari ed labas na gendat” pian tulongan to kayon ontalindeg a malet.​​—2 Corinto 4:​7, NW; 1 Pedro 5:10.

Diad panaon na bautismo, magmaliw kayon sakey ed saray Tastasi nen Jehova. (Isaias 43:10) Nepeg a walaan iya na mabiskeg ya epekto ed no panon yon usaren so bilay yo. Sasaglawien na dedikasyon so ‘pangibeneg yo ed inkasikayo.’ (Mateo 16:24) Nayarin ipulisay yo iray pigaran personal a kalat tan ambisyon tan ‘anapen ya unona so panarian na Dios.’ (Mateo 6:33) Diad ontan et say dedikasyon tan bautismo so mangipaarap ed dakel a pankanawnawa diad panggawa ed satan. Konsideraen tayo so pigara ed saratan.

Saray Pankanawnawan Manlingkor ed Dios a Sigpot-Panaon

● Say Panagpayunir so sakey a pankanawnawa. Say sakey a manangipalapag a payunir so napanuliranan a bautismadon Kristiano ya angiyareglon mangusar na sankaabebaan a 70 oras kada bulan diad panangipulong ed maong a balita. Say pangusar na malaglaem a panaon ed lawak so ontulong ed sikayo pian nabayuboan iray dunong yo ed panagpulong tan panagbangat. Dakel a payunir so nanggayaga diad panutulong da ed saray iyaaralan da na Biblia a magmaliw a bautismadon Tastasi. Anton sekular a trabaho so posiblin makapaliket tan makapenek?

Pian walay panggastos da, maslak a payunir so walaan na part-time a sekular iran trabaho. Dakel so masakbay a mangiplaplano parad sayan responsabilidad diad panaral na dunong ed eskuelaan odino manlapud atateng da. No isipen yo tan say atateng yo a pankaabigan yo so pangala na kaaruman a kipasal kayari pangraduar ed haiskul, seguroen a say motibo yo et aliwan say pananap na dakel a kuarta noagta pian suportaan so ministeryo yo tan nayarin manlingkor bilang sigpot-panaon a ministro.

Balet, say akasentroan na bilay na payunir et aliwan say sekular a trabaho to noagta say ministeryo to​—pananulong ed arum pian gamoray bilay! Akin ya aggawaen a personal a kalat so panpayunir? Say panagpayunir so mabetbet a mangitonton ed arum niran pribilehyo. Alimbawa, arum a payunir so linma ed saray lugar a babaleg so pankaukolan parad saray manangipalapag na Panarian. Arum so nanaral na duman lenguahe tan manlilingkor balanglan diad lokal a kongregasyon a mansasalitay duman lenguahe odino anggan diad arum a bansa. On, say panagpayunir so makatumang a dalan na bilay!

● Say School for Kingdom Evangelizers et sananey nin pankanawnawa. Sayan duay bulan ya kurso et adesinyo pian ipasal iray abayag lan pioneer a mabulos ya onalis pian ontulong ed lugar a kaukolay managpulong. Singa da ibabagan, “Wadia ak, ibaki mo ak,” bilang pangalig ed sankamaongan ya Ebanghelisador ya nanlingkor ed dalin, si Jesu-Kristo. (Isaias 6:8; Juan 7:29) No ibaki da rad arum a lugar, ompan kaukolan dan pasimpliey bilay da. Nayarin man-adjust irad kultura, klima, tan naakan ed laen da. Ompan kaukolan da ni ingen so manaral na balon lenguahe. Ontulong iyan eskuelaan ed saray single brother tan sister tan ed saray sanasawa, a mantaon na 23 anggad 65, pian niwalad sikaray ugali tan abilidad ya kaukolan ed asainmin da pian mas nausar iran maong nen Jehova tan na organisasyon to.

● Say Serbisyo ed Bethel so manasaglawi ed panlingkor bilang boluntaryo diad sakey ed saray pasilidad na sanga na Tastasi nen Jehova. Arum a membro na pamilyay Bethel so manlilingkor a direkta diad pamapawala na literaturay Biblia. Arum so naikdan na kimey diad itulong ed pamapawala na saray literatura, a singa say panagmantini ed saray bilding tan kagawaan odino panangasikaso ed pisikal iran pankaukolan na pamilyay Bethel. Amin ya asainmin et sagradon pribilehyo na serbisyo ed si Jehova. Niarum ni, saraman so walad Bethel so manggagayaga ed pikabat ya antokaman so gagawaen da, satan so pakagunggonaan na dakel ya agagi ra ed interon mundo.

No maminsan et saray agagin walaan na nikaduman dunong so naiimbitaan a manlingkor diad Bethel. Balet, maslak so makakaawat na panangipasal kasabi ra. Saramay walad Bethel so agmanlilingkor nisengeg ed materyal a gunggona noagta napepenek ed saray probisyon a tagano, panayaman, tan melag a personal a panggastos da. Onia so impaneskribe na sakey a kalangweran a membro na pamilyay Bethel nipaakar ed serbisyo to: “Alay abig na satan! Say rotina so makapaangat, balet makakagamor ak na dakel a bendisyon diad panlilingkor ko’dia.”

● Say panaglingkor ed Konstruksion so mangiyabuloy ed sakey a mibiang ed panangipaalagey ed saray pasilidad na sanga tan saray Kingdom Hall. Saray construction servant, a singa tawag ed sikara, et ontutulong ed ontan a panagpaalagey a kimey. Sakey met iyan nengneng na sagradon serbisyo, a mipadpara ed kimey na saraman so angipaalagey na templo nen Solomon. (1 Arari 8:​13-​18) Saray uksoyan parad panangasikaso ed saray construction servant so mipara ed saraman so membro na pamilyay Bethel. Agaylan pribilehyo na sarayan agagin lalaki tan bibii diad pakapanlingkor ed sayan sankamundoan a kimey parad kidayewan nen Jehova!

Manlingkor ed si Jehova ed Interon-Kamarerwa

Say panlingkor ed si Jehova et sankaabigan a paraan a pangusar yo ed bilay yo. Akin ya agnonoten so pangiletneg na personal a kalat a sigpot-panaon a panlingkor ed Dios? Isingbat so sigpot-panaon a serbisyo ed saray atateng yo, ed saray mamatakken, tan manangasikaso na sirkito yo. No interesado kayo ed Bethel odino School for Kingdom Evangelizers, onatendi ed saray miting parad saray posiblin makapan-aplay a gagawaen ed saray regional a kombension.

On, aliwan amin so onkualipika odino makayarin manlingkor a sigpot-panaon. No maminsan saray problema ed bunigas, kipapasen ed pinansyal, tan saray obligasyon ed pamilya so manlimita ed nagawaan na sakey. Anggaman ontan, amin a dedikadon Kristiano so nepeg a mangunor ed ganggan na Biblia: “Aroen mo so Katawan a Dios mo ed masimoon a pusom, tan dia ed masimoon a kamarerwam, tan dia ed masimoon a nonot mo.” (Mateo 22:37) Kakaukolanen nen Jehova a gawaen yoy sankaabigan ya iyabuloy na sirkumstansya yo. Kanian antokaman so situasyon yo, gawaen a manuna ed bilay yo so panlingkor ed si Jehova. Mangiletneg na realistiko iran teokratikon kalat. On, ‘nonot yo met so Manamalsa yo dia ed saray agew na inkaugaw yo’​—tan sikayoy nabendisyonan ya andi-anggaan diad panggawa yo ed satan!

Nilikud no sananey so nipanengneng, amin ya inaon ed Biblia so inala ed Pangasinan a Biblia a PBS.