No Panon a Napaliket so Dios

ANTOY nagawaan tayo pian napaliket so Dios? Wala kasi so nayarin iter tayo ed sikato?— Ibabaga nen Jehova: “Amin ya ayep na katakelan kien ko ra.” Inkuan to met: “Say pilak kayarian ko, say balitok, kayarian ko.” (Salmo 24:1; 50:10; Aggeo 2:8) Ingen, wala so bengatlan nayarian tayon iter ed Dios. Anto itan?—

Aabuloyan itayo nen Jehova a manpili no kasin manlingkor itayo ed sikato odino andi. Agto itayo pipiliten a manggawa na labay ton gawaen tayo. Talosan ta pa no akin a pinalsa itayo na Dios pian makapanpili tayo no kasin manlingkor tayo ed sikato odino andi.

Nayarin antam la no anto so robot. Sakey itan a makina a ginawa pian manggawa na antokaman a labay na nanggawa ed satan a gawaen to. Kanian agmakapampili so robot na gawaen to. Nayarian komon nen Jehova a gawaen itayon amin a singa robot. Nagawaan to itayo komon ya ontan ta pian nagawaan tayo labat so labay ton gawaen tayo. Balet ag-itan ginawa na Dios. Antam no akin?— Onia’ay, arum a gakgalaw et robot. No napaandar, say nagawaan labat na saratan et say indesinyo na nanggawa ed gakgalaw. Kasin akanengneng ka la na ontan a gakgalaw?— Mabetbet ya onsawa iray totoo a manggalaw na ontan lapud aka-programa lay nagawaan to. Aglabay na Dios ya ontulok itayo ed sikato a singa robot ya aka-programa a manlingkor ed sikato. Labay nen Jehova a manlingkor itayo ed sikato lapud sikatoy inaro tayo tan lapud labay tayoy ontulok ed sikato.

Anto kasi so liknaan na Ama tayo a wala ed tawen no ontulok itayo ed sikato lapud labay tayo?— Ibagam pa ed siak no panon a say ugalim so mangapekta ed atateng mo?— Ibabaga na Biblia a say makabat ya anak et ‘paliketen to so ama [to]’ balet say bagel ya anak “et makapabelat ed ina to.” (Uliran 10:1) Kasin naimanom a no gawaen mo so ipapagawa nen nanay tan tatay mo et manliket ira?— Balet antoy liknaan da no agmo ira tuloken?—

Natan nonoten ta pa so Ama tayo a wala ed tawen, si Jehova. Ibabaga to ed sikatayo no panon tayon napaliket. Alam pay Bibliam tan ibukay mo ed Uliran 27:11. Wadtan so Dios a mitotongtong ed sikatayo: “Ana’ko, onkabat ka, tan paliketen mo so pusok, pian naebatan ko so mamabalaw ed siak.” Antam no antoy kabaliksan na mamabalaw o mankakantiaw ed sakey?— Onia’ay, say sakey a too so nayarin mankantiaw ed sika diad panelek to ed sika tan ibaga ton agmo nayarian a gawaen so imbagam a nagawaan mo. Panon a kakantiawan nen Satanas si Jehova?— Talosan ta.

Tandaan mo a naaralan ta diad Kapitulo 8 ed sayan libro a labay nen Satanas so magmaliw a Manunaan kanian labay ton ontulok so amin ed sikato. Ibabaga nen Satanas a manlilingkor iray totoo ed si Jehova lapu labat ta ikdan ira nen Jehova na andi-anggaan a bilay no gawaen da itan. Kayarin apalikdo nen Satanas si Adan tan Eva pian onsumlang ed si Jehova, inangat nen Satanas so Dios. Inkuan to ed Dios: ‘Manlilingkor iray totoo ed sika lapu labat ed naala da ed sika. Ikdan mo ak na tsansa, tan pabenegen ko so siopaman ed sika.’

Tua, saratan ya eksakton salita so agnaromog ed Biblia. Balet no basaen ta so nipaakar ed si Job, magmaliw a malinew a singa ontan so imbaga nen Satanas ed Dios. Talagan importante ed si Satanas tan ed si Jehova no kasin si Job so manmatoor ed Dios odino andi. Lukasan ta so Biblia ed Job kapitulo 1 tan 2 pian nengnengen no antoy agawa.

Diad Job kapitulo 1 et naamtaan ta a wadman si Satanas ed tawen sanen linma iray anghel pian nengnengen si Jehova. Kanian intepet nen Jehova ed si Satanas: “Iner so nanlapuan mo?” Inmebat si Satanas a sikatoy nanliberliber ed interon dalin. Kanian intepet nen Jehova: ‘Kasin naimanom si Job, a sikatoy nanlingkor ed siak tan anggapoy ginawa ton mauges?’​—Job 1:6-8.

Tampol a nankatunongan si Satanas. ‘Si Job so manlilingkor labat ed sika lapud anggapoy problema to. No ekalen moy proteksion tan panamendisyon mo ed sikato, sumpaen to ka.’ Kanian inmebat si Jehova: ‘Sige, Satanas, nayarian moy manggawa na antokaman a labay mo, balet agmo sasakitan si Job.’​—Job 1:9-12.

Antoy ginawa nen Satanas ey?— Impatakew to ed totoo iray baka tan asno nen Job tan impapatey toray mangaasikaso ed saratan. Insan amawala na kirmat, ya amatey ed saray karnero tan ed saray mangaasikaso ed saratan. Kabekta, sinmabi iray totoo tan tinatakew da iray kamelyo tan pinapatey da iramay mangaasikaso ed saratan. Kaunoran, pinawala nen Satanas so maksil a dagem tan ginaygay toy abung a kawalaan na samploran ananak nen Job, tan inatey iran amin. Anggaman agawa irayan amin, siansian manlilingkor si Job ed si Jehova.​—Job 1:13-22.

Sanen anengneng lamet nen Jehova si Satanas, impaimano nen Jehova a siansian matoor si Job. Nambaraan si Satanas, a kuanto: ‘No abuloyan moak a sakitan koy laman to, sumpaen to ka a lupalupaan.’ Kanian inabuloyan nen Jehova si Satanas a sakitan so laman nen Job balet ta pinasakbayan ton agto papateyen si Job.

Tampol a dinapoan nen Satanas si Job na sakit, a say interon laman to et apelpelsaan. Makapadimla so angob na satan kanian anggapoy malabay ya onasingger ed sikato. Anggan say asawa nen Job inkuanto ed sikato: “Sumpam lay Dios, tan ompatey ka!” Saramay mankuankuanan a kakaaro nen Job so binmisita tan pinaloor da so liknaan to diad impangikuan da a walay mauges iran ginawa to kanian asagmak ton amin iratan. Anggaman ed amin na problema tan ot-ot a pinawala nen Satanas ed si Job, siansian matoor a manlilingkor si Job ed si Jehova.​—Job 2:1-13; 7:5; 19:13-20.

Anto kasi liknaan nen Jehova lapud inkamatoor nen Job?— Sikatoy aliketan lapud inkuan nen Jehova ed si Satanas: ‘Nengneng moy Job! Panlilingkoran toak lapud labay to itan.’ Labay mo kasin aligen si Job, bilang sakey a nituro nen Jehova bilang ehemplo a mamapaneknek a matila si Satanas?— On, sakey a pribilehyo so pangiter na ebat ed ibabaga nen Satanas a nayarian ton pabenegen so siopaman manlapud panlingkor ed si Jehova. Seguradon impasen nen Jesus itan bilang pribilehyo.

Agbalot inabuloyan na Sankamaongan a Managbangat a sikatoy sagyaten nen Satanas a manggawa na antokaman a mauges. Isipen pa no panon ya amaliket ed Ama to so ehemplo to! Nayarian nen Jehova ya ipaimano si Jesus tan ibaga ed si Satanas: ‘Nengneng mo so Anak ko! Sikatoy sigpot a matoor ed siak lapud inaro toak!’ Isipen met so liket nen Jesus diad impamaliket to ed si Ama to. Lapud satan a liket, atepelan ni ingen nen Jesus so panamairapan a kiew.​—Hebreos 12:2.

Labay mon aligen so Sankamaongan a Managbangat tayo tan paliketen si Jehova?— Itultuloy sirin ya aralen so labay nen Jehova a gawaen mo, tan paliket mo diad panggawa ed satan!